باسكەتبولعا قىزىعۋ دا ءبىر باقىت

  • كەلۋ قاينارى: ىلە گازەتى
  • 03:30:45 12/09/2019

    ەڭ اسەرلىسى مەملەكەتتىك كومانداداعى تۇڭعىش جارىسىم ەدى، 1999 – جىلعى فۋگاڭ ازيا جۇلدەلى جارىسى بولدى. ول كەزدە ەندى عانا 19 جاسقا شىققام. اتپال ازامات بولعانىممەن حالىقارالىق جارىس تاجىريبەم از ەدى، ساپارعا شىعاردا ايروپلانعا وتىرىپ شەتەلگە شىعۋدىڭ قۋانىشى، جارىس الاڭىنىڭ قىسىمى، ءوز ونەرىمدى ايگىلەسەم دەگەن ارماندارىم سياقتىلاردى ويلاپ قاتتى تولقىدىم. دەگەنمەن، جارىس مايدانىندا كوڭىل كۇيىمدى رەتكە سالۋدى، الباتى ويلاردان اۋلاق بولۋدى، نەعۇرلىم ۇلكەن جارىس بولعان سايىن كوڭىل كۇيدى سولعۇرلىم رەتتەپ، زەيىن – زەردەمدى شوعىرلاندىرۋىم كەرەك دەپ ءتۇيدىم. سودان باستاپ مەيلى مەملەكەتتىك كوماندا جارىسىندا بولسىن، كەيىنگى NBA كاسىپتىك بىرلەسپە جارىسىندا بولسىن، مەن باستان – اياق جارىس مايدانىندا كوڭىل كۇيىمدى شىنىقتىردىم. ەگەر باسكەتبولداعى ومىرىمدە بەلگىلى ناتيجەلەرگە قول جەتكىزگەن بولسام، ونى كوڭىل كۇي جاقتان شىڭدالۋدىڭ ارقاسى دەر ەدىم.

    ارينە، سپورتشى رەتىندە ەڭ ۇمىتىلماس كەشىرمەم – وليمپيادا جارىسى دەر ەم. 2000 – جىلعى سيدنەي وليمپياداسىنان 2008 – جىلعى بەيجيڭ وليمپياداسىنا دەيىنگى ٴۇش كەزەك وليمپيادا جارىسى سپورتتىق ءومىرىمنىڭ شۇعىلالى ساتتەرىنە اينالىپ قالدى. اسىرەسە، افينا وليمپياداسى مەن بەيجيڭ وليمپياداسىن ايتىڭىز. وتكىزىلەتىن ورىن ءبىرى – وسى زامانعى وليمپيادانىڭ شىققان بەسىگى، ءبىرى – ءوز وتانىم. وسى ەكى رەتكى وليمپيادا جارىسىنا قاتىناسا العانىم ٴارى جۇڭگو ۋاكىلدەر ۇيىرمەسىنىڭ تۋ ۇستاۋشىسى بولعانىم شىنىندا ۇلكەن داڭق ەدى. 2008 – جىلعى وليمپيادانىڭ اشىلۋ سالتى كۇنى قۇس ۇياسى سپورت الاڭىنا كىرەر اۋىزدان 200 مەترگە جەتپەيتىن جەردە مەن بەس جۇلدىزدى قىزىل تۋدى قولىما الدىم، الاڭ سىرتىندا باس قوسقان ءبىر توپ ەرىكتى بىزدەن كوز الار ەمەس. ولاردىڭ جانارىنان جان تەبىرەنىسى مەن شاتتىعى مەنمۇندالايدى. كەنەت ولار جاقتان «قايراتتان جۇڭگو!» دەگەن ۇران كوتەرىلدى. ىلە – شالا تۇتاستاي «قايراتتان جۇڭگو!» دەگەن ەكپىندى اسقاق ۇران بىردەن بىرگە ۇلاسىپ كەتتى. ونداي ساتتە كوڭىلىڭىزدىڭ تولقىماۋى، جاۋاپكەرشىلىگىڭىزدىڭ اۋىر ەكەنىن سەزىنبەۋىڭىز مۇمكىن ەمەس ەدى. قولىمىزداعى قىزىل تۋ قانشاما ۇرپاق جۇڭگو سپورتشىلارىنىڭ ٴۇمىتىن ارقالاپ وتىرسا، ءوز ورتامىزدا وسىنداي ۇلى سپورت سالتاناتى بولىپ جاتسا، ءوزىمىزدى قالايشا باقىتتى سەزىنبەسكە؟!

    باسكەتبول سپورتى 1891 – جىلى تاپقىرلانعان، 1895 – جىلى جۇڭگوعا تارالعان. جۇڭگونى باسكەتبول سپورتىن ەڭ ەرتە قابىلداعان ەلدەردىڭ ءبىرى دەپ ايتۋعا بولادى. ٴجۇز جىلدان استام ۋاقىتتان بەرگى جۇڭگو باسكەتبولىنىڭ تاريحى العاش جارىققا شىققاننان تارتىپ جالپىلىق ىقپالعا يە بولعانعا دەيىنگى دامۋ ساپارى وتانىمىزدىڭ مەملەكەت قۋاتىنىڭ كۇن سايىن كۇشەيۋىمەن ساباقتاسىپ وتىردى. اسىرەسە، جاڭا جۇڭگو قۇرىلعاننان بەرى ەلىمىزدىڭ ەر – ايەل باسكەتبول قۇراماسى ازيا اعا جۇلدەگەرلىگىنىڭ ونداعان مەدالىن الدى، اۋەلى، ايەلدەر باسكەتبول قۇراماسى 1992 – جىلعى وليمپيادا جارىسىندا كۇمىس مەدال الدى. كوماندا مۇشەلەرىن تاربيەلەۋ، مەحانيزم قۇرىلىسى سياقتى جاقتاردا ۇزدىكسىز ساپالىلاندى، كاسىپتىك بىرلەسكەن جارىس بارعان سايىن كوپشىلىكتىڭ نازارىن اۋداردى. دەنە تاربيە كاسىبىنىڭ بازارداعى كومەسكى كۇشى، باسكەتبول نىسانىنىڭ ساۋدا قۇنى دا جوعارىلادى. سپورت – قوعامنىڭ دامۋىن كورسەتىپ بەرەتىن اينا، جۇڭگو باسكەتبولىن وتانىمىزدىڭ العا باسۋ قادامىمەن تەڭ ىلگەرىلەپ، نەعۇرلىم الىسقا، ساليقالى ساپار شەگۋىن ٴۇمىت ەتەمىن.

جاۋاپتى رەداكتور: جازيرا بولاتباي قىزى