شينجياڭ كوپ ءتۇرلى شارامەن جايىلىم مال شارۋاشىلىعىنىڭ تيبىن وزگەرتىپ، دارەجەسىن جوعارىلاتۋدى ىلگەرىلەتتى

  • كەلۋ قاينارى: ىلە گازەتى
  • 04:17:35 17/09/2019

   

    شينحۋا اگەنتتىگىنىڭ 9 - ايدىڭ 13 - كۇنى ۇرىمجىدەن بەرگەن حابارى (ءتىلشى سۇن شاۋشيۇڭ). كۇز كەلىسىمەن شينجياڭنىڭ التاي، ىلە سياقتى جەرلەرى پىشەن جيناۋ مەزگىلىنە ءوتتى. بۇرىنعىداي تابيعي وسكەن شوپكە عانا قاراپ وتىرماي، شابىندىق شوپتەردى قازىر مالشىلار كوبىنەسە وزدەرى ەگەدى. مالشىلاردى وتىرىقتاندىرۋ، جايىلىمدى تىنىقتىرۋ، جايىلىم مەن مالدى تەڭگەرۋ سياقتى ساياساتتاردىڭ جۇرگىزىلۋىنە مەڭزەس، شينجياڭنىڭ جايىلىم مال شارۋاشىلىعى جاسىل، باياندى دامۋ جولىنا ءتۇستى.

    بىرنەشە كۇننەن بەرى، بۋرىلتوعاي اۋدانى كوكاعاش اۋىلى كوكجورعا قىستاعىندا پىشەننىڭ جاعىمدى ءيىسى بۇرقىرايدى، ءىرى باقتاشى زاينەش ناۋبەت ۇلى تەمىر تىرمامەن تۋرالعان جەم - ءشوپتى جيناپ، قىمتاپ، اشىتىپ سۇرلەم جاساۋعا دايىنداپ جاتىپتى.

    «ءشوپتى ءوزىمىز ەگەمىز، سىرتتان ساتىپ المايمىز، ءبىر جىلدا جەم - ءشوپ اقىسىنان نەشە مىڭ يۋان ۇنەمدەپ قالامىز، جايىلىمدى دا قورعاپ، تاعى جاردەماقى سيلىق تا الىپ وتىرمىز».

    زاينەشتىڭ ايتۋىنشا، جەرگىلىكتى ۇكىمەتتىڭ دەمەۋىندە، ول ۇيىندەگى ۇساق مالدى ءىرى قاراعا اۋىستىرىپ، ءىرى قارانىڭ تۇقىمىن اسىلداندىرعان، قازىر سيىر تۇقىمىنىڭ ءوزى 3 − 4 ءتۇرلى ەكەن، «بۇل سيىرلار جەرگىلىكتى سيىرلارعا قاراعاندا ءوسىمتال، بازارعا ەرتە سالىنادى، ەتىنىڭ ساپاسى دا جاقسى، ءار سيىردان جىلىنا 4 مىڭ دا 5 مىڭ يۋان تازا تابىس تابادى».

    قازىر شينجياڭنىڭ جايىلىم مال شارۋاشىلىعى وڭىرلەرىن ارالاساڭىز، ءتورت ماۋسىمدا كوشىپ - قونىپ تاۋ - تاستا قوي جاياتىن جاعدايدىڭ ازايىپ بارا جاتقانىن كورەسىز. مالشىلاردى وتىرىقتاندىرۋ، كەدەيلەردى قونىس جاڭالاپ سۇيەمەلدەۋ سياقتى ساياساتتاردىڭ جەدەل ىلگەرىلەتىلۋىنە سايكەس، كوپتەگەن مالشىلار اق تاياقتى تاستاپ، تاۋ ساعالاپ، وزەن جاعالاپ جۇرەتىن كوشپەندى مال باعۋعا قوش ايتىپ، وتىرىقتاندىرۋ تۇيىنىندە جەم - ءشوپ ەگىپ، قورادا باعىپ، مال «جازدا تويىنىپ، كۇزدە قوڭدانىپ، قىستا ارىقتاپ، كوكتەمدە كوتەرەمنەن ولەتىن» كەلەڭسىزدىكتەن قۇتىلىپ، مال شارۋاشىلىعى قۇنتسىز باعىمشىلىقتان شوعىرلى باسقارۋعا بۇرىلىس جاسادى.

    «ءالى دە تاۋ ساعالاپ، وزەن جاعالاپ جۇرەتىن مالشىلار ۇكىمەت بەلگىلەگەن جايىلىم مەن مالدىڭ تەپە - تەڭدىگىن ساقتاپ باسقارۋ ءادىسى بويىنشا جايىلىمعا قاراي مال سانىن تۇراقتاندىرىپ، مال سانىن قاتاڭ مەڭگەرىپ، بەلگىلەمەدەگى مال سانى بويىنشا مال باعادى» دەدى بۋرىلتوعاي اۋداندىق پارتكومنىڭ ورىنباسار شۋجيى نۇربەك ريزابەك ۇلى.

جاۋاپتى رەداكتور: گۇلدەن ماقسات قىزى