بۋىرشىن اۋدانى حالىقتىق كىتاپ وقۋدىڭ تىڭ داۋىرىنە قادام تاستادى

  • كەلۋ قاينارى: ىلە گازەتى
  • 05:59:43 21/09/2019

 

    ۋاڭ جىحۋا (ءوز ءتىلشىمىز)

 

    عالىمنىڭ حاتى ولمەيدى. كىتاپ وقۋ ءبىر قالانىڭ مادەنيەت ارمانىن ارقالايدى؛ كىتاپقا ءبىر ءوڭىردىڭ مادەنيەتى سىڭىرىلەدى. ءسابي قۇشاعىنداعى بالالار ەرتەگىلەرى، ايەلدەر جاستىعىنا جاستالعان ولەڭدەر، قارتتار قولىنداعى ەلەكتروندىق ەكراندار . . . ءبارى – ءبارى دە بۇل وڭىردەگى سانسىز جانداردى كىتاپ الەمىنە باستاپ، ولاردى ءار ءسات كىتاپ وقۋعا ىنتالاندىرۋدا. كىتاپتىڭ قۇدىرەتى ونىڭ سان - ساناقسىز وقىرماندى جاسىنا، كاسىبىنە، وڭىرىنە قاراماي باۋراي الۋىندا. جالپى حالىقتىڭ كىتاپ وقۋ ارمانى بۋىرشىن سىندى «ەرتەگى قالاشىعىندا» بىرتىندەپ رەالدىققا اينالدى.

    جينشان كىتاپحاناسى – ءبىر قالانىڭ مادەنيەت سارايى

    9 – ايدىڭ 6 – كۇنى بۋىرشىننىڭ قوڭىر كۇزى سالقىن تارتىپ ۇلگىرگەن. قىزىل كەرپىشپەن كومكەرىلگەن قۇرىلىس، بيىك - الاسا كىتاپ سورەسى، كىتاپ قورى مول، جانعا جايلى جينشان كىتاپحاناسىنا قادام تاستادىق. باتىس سولتۇستىك شەكاراداعى بۇل شاعىن اۋدان ورتالىعىندا جاسىرىنىپ جاتقان كولەمدى دە ساۋلەتتى كىتاپحانا كورگەن جاندى تاڭداندىرماي قويمايدى.

    جينشان كىتاپحاناسىن بەلگىلى جازۋشى كاڭ جيان سالدىرعان بولاتىن، كەزىندە وقيىن دەسە دە وقي الماعان ول كىتاپ تولى كىتاپحاناسىنىڭ بولۋىن ارماندايتىن، بۇگىنگى تاڭدا ونىڭ بۇل ارمانى الدە قاشان جۇزەگە استى، ءبىراق ول وسى ارادا تۇرمىس كەشىرىپ جاتقان كوپتەگەن بالالاردىڭ دا تەگىن كىتاپ وقۋ ورتاسى بولۋىن، ولاردىڭ جاقسى وقىپ، ارمانعا قۇلاش سەرمەۋىن ويلاستىردى.

    جينشان كىتاپحاناسى قۇرىلعانىنا 3 جىلدان استى، قازىر بۇل كىتاپحانا بىرتىندەپ بۋىرشىن اۋدانىنىڭ مادەنيەت بەلگىسىنە اينالدى. بۇل ارادا نەشە مىڭداعان كىتاپ ساقتالىپ قانا قويماي تاعى شايحانا، حاتكەرلىك – سۋرەت كورمەسى، جازۋشىلاردىڭ شىعارماشىلىق بازاسى سياقتى زالدار دا جەتەرلىك. بۇل ارادا كىتاپ وقۋ، اقىن – جازۋشىلارمەن پىكىر الماستىرۋ، الەۋمەتتىك يگىلىك مادەنيەتى، كوركەمونەرلىك لەكسيا سياقتىلاردى ورىستەتۋگە بولادى. ءار اپتا سوڭىندا، بۇل ارا كىتاپقۇمارلار باقشاسىنا اينالادى. بىلىمگە شولدەگەن بالالار، ويىنداعى كىتاپتى ىزدەگەن قارتتار، جان دۇنيەسىن دەمالتقىسى كەلگەن كادرلار... بارلىعى دا قاجەتىن تاۋىپ، كىتاپ تەڭىزىندە سەيىلدەيدى.

جاۋاپتى رەداكتور: گۇلدەن ماقسات قىزى