ەكونوميكالىق ەرەكشە رايون قۇرۋ

  • كەلۋ قاينارى: ىلە گازەتى
  • 04:03:34 24/10/2019

    1979 - جىلى جۇڭگو كوممۋنيستىك پارتياسى ورتالىق كوميتەتى ەكونوميكالىق ەرەكشە رايون قۇرۋ شەشىمىن جاسادى. ەكونوميكالىق ەرەكشە رايون قۇرۋىندا بەلگى ەتىلىپ، جۇڭگونىڭ سىرتقا ەسىك اشۋى ماڭىزدى قادام تاستالدى.

    پارتيا 11 - كەزەكتى ورتالىق كوميتەتىنىڭ ءۇشىنشى جالپى ماجىلىسىنەن كەيىن ەكونوميكالىق ەرەكشە رايون قۇرۋ ويى بىرتىندەپ قالىپتاستى. 1979 - جىلى 4 - ايدا جۇڭگو كوممۋنيستىك پارتياسى ورتالىق كوميتەتىنىڭ قىزمەت ءماجىلىسى اشىلدى، گۋاڭدۇڭ ولكەلىك پارتكومنىڭ جاۋاپتى جولداستارى ورتالىقتاعى باسشى جولداستارعا مالىمەت بەرگەندە، ورتالىقتىڭ ءبىرقانشا ۇقىقتى تومەنگە بەرىپ، شياڭگاڭمەن، اۋمىنمەن ىرگەلەس جاتقان شىنجىن قالاسىندا، جۋحاي قالاسىندا جانە چياۋمين باۋىرلاستار قونىستانعان ماڭىزدى مەكەن − شانتوۋ قالاسىندا ەكسپورتتىق مانەرلەۋ رايونىن قۇرۋعا رۇقسات ەتۋ جونىندە ۇسىنىس بەرەدى. بۇل ۇسىنىس ورتالىقتاعى باسشى جولداستاردىڭ ءمان بەرۋىنە يە بولادى. دىڭ شياۋپيڭ گۋاڭدۇڭ ولكەلىك پارتكومنىڭ جاۋاپتى جولداستارىمەن اڭگىمەلەسكەندە مىنالاردى ءبىلدىردى: ەرەكشە رايون دەپ اتاعانىمىز جاقسى سياقتى، شانشي، گانسۋ، نيڭشيا دا باستابىندا ەرەكشە رايون دەپ اتالعان ەمەس پە! ورتالىقتا اقشا بولماعانىمەن، ساياسات جاعىنان تيىمدىلىك جاساۋىنا بولادى، وزدەرىڭىز باستاپ ىستەپ، جان قيارلىقپەن ءبىر تىڭ جول اشىڭىزدار.

    ىشكەرىلەي مۇقيات تەكسەرۋ - زەرتتەۋ جۇرگىزۋ نەگىزىندە 7 - ايدىڭ 15 - كۇنى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس گۋاڭدۇڭ ولكەلىك پارتكوم مەن فۋجيان ولكەلىك پارتكومنىڭ سىرتقا قاراتىلعان ەكونوميكالىق قيمىلداردا ەرەكشە ساياسات جانە يكەمدى شارا اتقارۋ جونىندەگى بايانداماسىن بەكىتىپ ءتۇسىرىپ، گۋاڭدۇڭ ولكەسى مەن فۋجيان ولكەسىنىڭ سىرتقا قاراتىلعان ەكونوميكالىق قيمىلدارىنا اناعۇرلىم كوپ دەربەستىك ۇقىعىن بەرۋدى ۇيعاردى. سونىمەن بىرگە، الدىمەن شىنجىن قالاسى مەن جۋحاي قالاسىنان ءىشىنارا جەردى ءبولىپ شىعارىپ، ەكسپورت ەرەكشە رايونىن سىناق رەتىندە قۇرۋدى، تاجىريبەگە يە بولعاننان كەيىن بارىپ شانتوۋدا، شيامىندا ەرەكشە رايون قۇرۋدى ويلاستىرۋدى ۇيعاردى.

    1980 - جىلى 5 - ايدىڭ 16 - كۇنى جۇڭگو كوممۋنيستىك پارتياسى ورتالىق كوميتەتى مەن مەملەكەتتىك كەڭەس «گۋاڭدۇڭ ولكەسى مەن فۋجيان ولكەسىنىڭ ءماجىلىس ماڭىزدى ەستەلىگىن» بەكىتتى. «ەكسپورت ەرەكشە رايونىنىڭ» اتى «ەكونوميكالىق ەرەكشە رايون» بولىپ رەسمي وزگەرتىلدى. سول جىلى 8 - ايدا 5 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ 15 - ءماجىلىسى شىنجىندا، جۋحايدا، شانتوۋدا، شيامىندا ەكونوميكالىق ەرەكشە رايون قۇرۋدى قاراپ بەكىتتى ءارى «گۋاڭدۇڭ ولكەسىنىڭ ەكونوميكالىق ەرەكشە رايون ەرەجەسىن» ماقۇلدادى. بۇل جۇڭگونىڭ ەكونوميكالىق ەرەكشە رايونىنىڭ رەسمي دۇنيەگە كەلگەندىگىن ايگىلەيدى.

    1984 - جىلى 1 - ايدىڭ 24 - كۇنىنەن 2 - ايدىڭ 15 - كۇنىنە دەيىن دىڭ شياۋپيڭ ىلگەرىندى - كەيىندى شىنجىن، جۋحاي، شيامىن سىندى 3 ەكونوميكالىق ەرەكشە رايوندى كوزدەن كەشىرىپ، ەرەكشە رايون قۇرىلىسىندا قول جەتكەن تابىستاردى تولىق تۇراقتاندىردى ءارى قۋانا قالام تەربەپ، 3 ەكونوميكالىق ەرەكشە رايونعا جەكە - جەكە ارناۋ ءسوز جازدى.

    ەكونوميكالىق ەرەكشە رايون قول جەتكىزگەن جۇرتتى جالت قاراتارلىق وراسان زور تابىستارى دۇنيە جۇزىنە جۇڭگونىڭ رەفورما جاساۋ، ەسىك اشۋداعى بەرىك بەكىمىن ايگىلەدى، سونىمەن بىرگە، سىرتقا ەسىك اشۋدى بىرتىندەپ كەڭەيتۋگە جانە ەكونوميكالىق ءتۇزىلىس رەفورماسىن ىلگەرىلەتۋگە مول تاجىريبە ازىرلەپ بەردى.

    (شينحۋا اگەنتتىگىنىڭ 10 - ايدىڭ 11 - كۇنى بەيجيڭنەن بەرگەن حابارى)

جاۋاپتى رەداكتور: جازيرا بولاتباي قىزى