«863 جوسپارى»

  • كەلۋ قاينارى: ىلە گازەتى
  • 03:57:25 30/10/2019

 

    1986 - جىلى 3 - ايدىڭ 3 - كۇنى شەتەلدىڭ جوعارى تەحنيكاسىنىڭ دامۋىن سوڭىنا ءتۇسىپ زەرتتەۋ جونىندەگى ۇسىنىس دەگەن تاقىرىپتاعى ءبىر بايانداما جۇڭگو كوممۋنيستىك پارتياسى ورتالىق كوميتەتىنە جولدانادى، كەيىن وسى بايانداما نەگىزىندە قالىپتاسقان جوعارى تەحنيكانى زەرتتەۋ - دامىتۋ جوسپارى «863 جوسپارى» دەپ اتالادى.

    بۇل باياندامانى ايگىلى عالىم ۋاڭ داحىڭ، ۋاڭ گانچاڭ، ياڭ جياچى، چىن فاڭيۇن تورتەۋى بىرلەسىپ ورتاعا قويعان. بايانداما دۇنيە جۇزىندەگى جوعارى عىلىم - تەحنيكا قارىشتاپ دامىعان كوكەي تەستى شىندىققا باعىتتاي وتىرىپ، جۇڭگو كوممۋنيستىك پارتياسى ورتالىق كوميتەتىنە بىلاي دەپ ۇسىنىس قويادى: دۇنيە جۇزىندەگى جاڭا تەحنيكالىق توڭكەرىستىڭ سىن - سايىسى الدىندا، جۇڭگو قاتاردان قالماۋى ءتيىس، قازىردەن باستاپ مىقتى يگەرىپ، قولدا بار قارجىدان جانە ادام كۇشىنەن مۇمكىندىگىنشە پايدالانىپ جاڭا تەحنيكانىڭ دامۋ ۇدرەىسىنىڭ سوڭىنا ءتۇسۋ كەرەك، ەكونوميكالىق ناقتى قۋات ايتارلىقتاي جاقسارىپ السىن دەپ 10 جىل، 15 جىل كۇتىپ وتىرۋعا بولمايدى، ويتپەگەندە ۋاقىت پەن ورايدان ۇتىلىپ، كەيىن ماڭگى ەڭسە كوتەرە الماي كەتەمىز.

    بۇل بايانداما دىڭ شياۋپيڭ جولداستىڭ ايرىقشا ءمان بەرۋىنە يە بولادى، ول تىكە: «بۇل ۇسىنىس ەرەكشە ماڭىزدى» دەپ بەكىتۋ جازادى، سونداي - اق« شەشىم قابىلداۋ ءۇشىن ماماندار مەن قاتىستى جاۋاپتى جولداستاردى شاقىرىپ تالقى جۇرگىزىپ، پىكىر الىپ شىعۋ كەرەك. بۇل ءىستى دەرەۋ ۇيعارعان ءجون، كەشەۋىلدەتۋگە بولمايدى» دەپ نۇسقاۋ بەرەدى.

    كەڭ كولەمدى، جان - جاقتى جانە اسا قاتاڭ عىلمي دالەلدەمەدەن كەيىن، وسى جىلى 11 - ايدىڭ 18 - كۇنى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس «جوعارى تەحنيكانى زەرتتەۋ - دامىتۋ جوسپارى باعدارلاماسىن» رەسمي بەكىتىپ تۇسىرەدى. بۇل جوسپار باعدارلاماسىندا جۇڭگونىڭ بولاشاقتاعى ەكونوميكالىق جانە قوعامدىق دامۋىنا ەلەۋلى ىقپال جاسايتىن بيوتەحنيكا، عارىش تەحنيكاسى، ينفورماتسيا تەحنيكاسى، وزىق قورعانۋ تەحنيكاسى، اۆتوماتتاندىرۋ تەحنيكاسى، ەنەرگيا تەحنيكاسى جانە جاڭا ماتەريال سىندى 7 جوعارى تەحنيكالىق سالا (1996 - جىلى تەڭىز - مۇحيت تەحنيكاسى سالاسى قوسىلدى) ەلىمىزدىڭ جوعارى تەحنيكانى زەرتتەۋ - دامىتۋىنىڭ ماڭىزدى ءتۇيىنى رەتىندە تاڭدالادى.

    بۇل جوسپار ۇسىنىسىنىڭ ورتاعا قويىلۋىن جەدەلدەتۋ مەن دىڭ شياۋپيڭ جولداستىڭ بەكىتۋىنىڭ بارلىعى 1986 - جىلى 3 - ايدا تۋىلعاندىعى سەبەپتى، بۇل جوسپار «863 جوسپارى» دەپ اتالعان. «863 جوسپارىنىڭ» اتقارىلۋى جۇڭگونىڭ دۇنيە جۇزىندەگى جوعارى عىلىم - تەحنيكا سالاسىنان ءتيىستى ورىن الۋى ءۇشىن بەرىك نەگىز قالادى.

    (شينحۋا اگەنتتىگىنىڭ 10 - ايدىڭ 18 - كۇنى بەيجيڭنەن بەرگەن حابارى)

جاۋاپتى رەداكتور: گۇلدەن ماقسات قىزى