مەيىربان سۇن اپاي جانە ونىڭ 46 اعا - باۋىر، اپەكە - ءسىڭلىسى

  • كەلۋ قاينارى: ىلە گازەتى
  • 04:16:53 29/11/2019

 

    يان جيانشيا (ءوز ءتىلشىمىز)

 

    10 - ايدىڭ 31 - كۇنى قۇلجا قالاسى حانبيڭ اۋىلى جيامەي قالامشا ەگۋ ەگىنشىلەر كاسىپتىك سەلبەستىك كووپەراتيۆىنىڭ 30 مۋدان استام قالامشا بازاسىنا بارعانىمىزدا قاتار - قاتار ەگىلگەن امەريكا قىزىل ۇيەڭكىسى، ەرەن، اق ورىك سياقتى 8 ءتۇرلى اعاش ورمانى سامال جەلمەن ىرعالىپ، ەرەكشە ادەمى كورىندى، بەينە ساپقا تىزىلگەن اسكەردەي قاسقايىپ تۇر، سارى، قىزىل كۇرەڭ ارالاس جاپىراقتار العاشقى قىسقا وزىندىك ءسان قوسقانداي.

    «ءبىز قار تۇسەردەن بۇرىن تاعى ءبىراز قالامشانى تولىقتاپ ەگەيىك، ءسىز بارىپ جۇمىسشىلاردى تەزىرەك شاقىرىپ كەلىڭىز» دەدى سەلبەستىك كووپەراتيۆىنىڭ جاۋاپتىسى سۇن جيامەي قاسىندا تۇرعان جۇمىس باقىلاۋشىعا ۇيعۇر تىلىندە. سالدەن سوڭ ورتا جاستار شاماسىنداعى بىرنەشە ەر - ايەل جۇمىسشى كوڭىلدى بەينەدە قالامشا بازاسىنا كەلدى دە، سۇن جيامەيمەن بىرگە جۇمىسقا كىرىستى.

    قۇلجا قالاسى حانبيڭ اۋىلدىق جيامەي قالامشا ەگۋ ەگىنشىلەر كاسىپتىك سەلبەستىك كووپەراتيۆى 2017 - جىلى قۇرىلعان، قازىر 46 تۇراقتى جۇمىسشىسى بار، ونىڭ كوبى ۇيعۇر، قازاق، حۇيزۋ ۇلتى، ايەل جۇمىسشى %70 ىن يەلەيدى، كوپ ساندىسى سۇن جيامەيدىڭ اۋىلداسى. جۇمىسشىلاردىڭ ەڭ ۇلكەنى 61 جاستا، ەڭ كىشىسى 30 نەشە جاستا، ولار قالامشا بازاسىنداعى اعاشتاردى ەگۋ، باپتاۋ جانە قۇلجا قالاسى چۇڭچيڭ وڭتۇستىك جولىنىڭ، شىنجىن وڭتۇستىك جولىنىڭ ورتا تازالىعىن ۇستىنە العان.

    «سۇن اپايدىڭ بۇل قالامشا بازاسىندا جۇمىس ىستەسەك، ءبىر ايدا 2 مىڭ يۋان كىرىس كىرگىزەمىز، ونى ۇيگە جۇمساۋدان سىرت، تاعى كيىم - كەشەك الامىز» دەدى جۇمىس ىستەگەنىنە 3 اي بولعان قالا تۇرعىنى ماستۇران ءتالىپجان، ول دوستارىنىڭ تانىستىرۋىمەن سەلبەستىك كووپەراتيۆىنە كەلىپ جۇمىسقا ورنالاسقان، وقۋ ماعلۇماتى جوعارى ەمەس، ەرتە نەكەلەنگەن، ءداستۇرلى كوزقاراستىڭ بۇعاۋى سالدارىنان ۇيلەنگەن سوڭ وت باسى، وشاق قاسىنان اسا الماعان. دوستارىنىڭ جىگەرلەندىرۋىندە ول اقىرى كاسىپتەنۋگە بەت الدى، اشتى ەڭبەكتىڭ ءتاتتى جەمىسىن كوردى.

    ادەتتە بۇل قالامشا بازاسىنداعى جۇمىسشىلار سۇن جيامەيدى قۇرمەتتەپ «سۇن اپاي» دەپ اتايدى، ۇيتكەنى، كوپشىلىك قانداي قيىنشىلىعى بولسا دا سۇن اپايعا بارسا، دەرۋ كومەككە يە بولادى، نە قىزمەتىن شەشىم ەتەدى، بولماسا جومارتتىق كورسەتەدى، سۇن اپاي بۇل 46 ءار ۇلت جۇمىسشىلارىنىڭ مەيىربان اپەكەسى ىسپەتتى.

    سۇن جيامەي مەن جۇمىسشىلار اراسىنداعى دوستىق سۇيىسپەنشىلىكتى اۋىزعا العاندا، تاعى دا ونىڭ 10 جىلدىڭ الدىندا از ۇلت كورشىلەرىن سىرتقا شىعىپ جۇمىس ىستەۋگە جەبەگەن ىستەرىنەن باستاپ ايتۋعا تۋرا كەلەدى.

جاۋاپتى رەداكتور: گۇلدەن ماقسات قىزى