بيىلعى الدىڭعى 10 ايدا شينجياڭنىڭ سىرتقى ساۋداسى سايكەس مەزگىلدەگىدەن %28 ارتتى

  • كەلۋ قاينارى: ىلە گازەتى
  • 03:22:58 10/12/2019

 

    شينحۋا اگەنتتىگىنىڭ 12 - ايدىڭ 3 - كۇنى ۇرىمجىدەن بەرگەن حابارى (ءتىلشى سۇن شاۋشيۇڭ). بيىل جىل باسىنان بەرى شينجياڭنىڭ سىرتقى ساۋدا، يمپورت - ەكسپورتى تەز قارقىنمەن ارتۋدى ساقتاپ، الدىڭعى 10 ايدا سىرتقى ساۋدا يمپورت - ەكسپورت جالپى قۇنى 131 ميلليارد 460 ميلليون يۋانعا جەتىپ، سايكەس مەزگىلدەگىدەن %28 جوعارىلادى.

    ءۇرىمجى كەدەنىنىڭ ساناعىنا قاراعاندا، بيىلدىڭ الدىڭعى 10 ايىندا شينجياڭنىڭ سىرتقى ساۋدا ەكسپورتى 100 ميلليارد 160 ميلليون يۋانعا جەتىپ، سايكەس مەزگىلدىگىدەن %19.9، يمپورتى 31 ميلليارد 300 ميلليون يۋانعا جەتىپ، سايكەس مەزگىلدەگىدەن %63.1 ارتقان. شينجياڭنىڭ 10- ايداعى سىرتقى ساۋدا جالپى قۇنى 21 ميلليارد 40 ميلليون يۋانعا جەتىپ، سايكەس مەزگىلدەگىدەن %83.9 ارتىپ، وسى جىلدىڭ ىشىندەگى ەڭ جوعارى ورەنى جاراتقان.

    ءۇرىمجى كەدەنىنىڭ تالداۋ جاساۋىنا قاراعاندا، ساۋدا قۇرىلىمى ۇزدىكسىز ساپالىلانىپ، شينجاڭنىڭ سىرتقى ساۋداسىنىڭ ورنىقتى ارتۋ بارىسىندا ساپاسىن جوعارىلاتۋعا نەگىز قالاعان. الدىڭعى 10 ايدا شەكارا شاعىن سومالى ساۋدا يمپورت – ەكسپورتى 79 ميلليارد 70 ميلليون يۋانعا جەتىپ، سايكەس مەزگىلدەگىدەن %22.6؛ ادەتتەگى ساۋدا يمپورت – ەكسپورتى 42 ميلليارد 810 ميلليون يۋانعا جەتىپ، سايكەس مەزگىلدەگىدەن %28.6 ارتقان؛ شەكارا تۇرعىندارى سەلبەستىك بازارى ساۋداسىنىڭ ومىرشەڭدىك قۋاتى ۇزدىكسىز كۇشەيىپ، ارتۋى كورنەكتى بولعان.

    سونىمەن بىرگە شينجاڭنىڭ نەگىزگى ساۋدا سەرىگى بەكەمدەلىپ، قازاقستانمەن جاسالعان ساۋدا الدىڭعى ورىندى يەلەگەن. بيىلدىڭ الدىڭعى 10 ايىندا شينجياڭنىڭ قازاقستانمەن بولعان يمپورت - ەكسپورتى 60 ميلليارد 220 ميلليون يۋانعا جەتىپ، سايكەس مەزگىلدەگىدەن %28.2 ارتقان؛ قىرعىزستان، اۆستراليا، پاكستان، انگليا، ارگەنتينا، ۆەتنام قاتارلى مەملەكەتتەرمەن ەكسپورت مولشەرى قاۋرىت ارتىپ، ساۋدا وبيەكتى كوپ نەگىزدى بولۋ اۋقىمى جارىققا شىققان.

جاۋاپتى رەداكتور: گۇلدەن ماقسات قىزى