شي جينپيڭ بيرما اقپارات قۇرالدارىندا اۆتورلى ماقالا جاريالادى

  • كەلۋ قاينارى: شينجياڭ گازەتى تورابى
  • 02:23:43 19/01/2020

 

    مىڭ جىلدىق باۋىرلاستىق سۇيىسپەنشىلىكتىڭ شىت جاڭا تاراۋىن جازايىق

 

    شينحۋا اگەنتتىگىنىڭ 1 - ايدىڭ 16 - كۇنى بەيجيڭنەن بەرگەن حابارى. 1 - ايدىڭ 16 - كۇنى بيرما فەدەراتسيالىق رەسپۋبليكاسىندا مەملەكەتتىك ساپاردا بولۋدىڭ الدىندا، مەملەكەت ءتوراعاسى شي جينپيڭ بيرمانىڭ «بيرما شۇعىلاسىندا»، «اينا گازەتىندە»، «بيرما جەر شارى جاڭا شۇعىلاسى گازەتىندە» ءبىر ۋاقىتتا «مىڭ جىلدىق باۋىرلاستىق سۇيىسپەنشىلىكتىڭ شىت جاڭا تاراۋىن جازايىق» تاقىرىبىندا اۆتورلى ماقالا جاريالادى. ماقالا تومەندەگىدەي:

    مىڭ جىلدىق باۋىرلاستىق سۇيىسپەنشىلىكتىڭ شىت جاڭا تاراۋىن جازايىق

    جۇڭحۋا حالىق رەسپۋبليكاسىنىڭ ءتوراعاسى شي جينپيڭ

    ۋىنمين زۇڭتۇڭنىڭ شاقىرۋىمەن جۇڭگو مەن بيرمانىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى قارساڭىندا بيرمادا مەملەكەتتىك ساپاردا بولاتىندىعىما ايرىقشا قۋانىشتامىن. 2009 - جىلى مەن بۇل كورىكتى جەردە ساپاردا بولعان ەدىم. بيرمانىڭ اسەم دە جانعا جايلى كورىنىستەرى، مىڭ بوياۋلى مادەنيەتى، ەڭبەكشىل، اق ەدىل حالقى ماعان تەرەڭ اسەر قالدىرعان بولاتىن. مەن وسى رەتكى ساپارىم ارقىلى بيرماداعى دوستارمەن ”پاۋك - فاۋ“لىق سۇيىسپەنشىلىك تۋرالى بىرگە سىر شەرتىسىپ، سەلبەستىكتىڭ ۇلى جوباسىن بىرگە اقىلداسۋدى كۇتەمىن.

    جۇڭگو مەن بيرما تاۋ - سۋى جالعاسقان، ۇرپاقتار بويى ىرگەلەس كورشى بولىپ كەلەدى. بيرما تىلىندە ”پاۋك - فاۋ“ ءبىر انادان تۋعان باۋىرلاستار دەگەن ماعىنادا. ەجەلدەن بەرى ەتەنە جاقىن ەكى ەل حالقىنىڭ جۇرەكتەرى توعىسقان، باۋىرلاستىق سۇيىسپەنشىلىك ۇزاقتان جالعاسۋدا. ءبىزدىڭ زامانىمىزعا دەيىنگى 4 - عاسىردىڭ وزىندە ءبىزدىڭ اتا - بابالارىمىز سىچۋان جانە يۇننان ولكەلەرىن بيرمامەن، ينديامەن جالعاستىراتىن ”داڭعىل جول“ اشىپ، ساۋدا جاساسىپتى. جۇڭگونىڭ شالقىعان تاڭ داۋىرىندە بيرمانىڭ پيۋ ەلىنىڭ حانزاداسى بيشىلەر مەن مۋزيكانتتاردان قۇرالعان انسامبىل باستاپ، مىڭ شاقىرىم جولدى الىسسىنباي چاڭ - انعا كەلىپ ساپاردا بولىپتى، ايگىلى اقىن باي جۇي - ي قالام تەربەپ ماڭگى وشپەس عالامات جىر «پيۋ ەلىنىڭ مۋزيكاسىن» جازىپتى. بيرما تۇرلىشە قوعامدىق جۇيەدەگى مەملەكەتتەر ىشىندە ءبىرىنشى بولىپ جاڭا جۇڭگونى مويىنداعان. ەكى ەلدىڭ اعا بۋىن باسشىلارى وزدەرى باس بولىپ، جۇڭگو - بيرما قارىم - قاتىناسىنىڭ دامۋى ءۇشىن قىرۋار ماڭداي تەرىن ارنادى. جوۋ ىنلاي زۇڭلي بيرمادا 9 رەت مەملەكەتتىك ساپاردا بولدى، ول كىسى بيرمانىڭ ۇلتتىق كيىمىن كيىپ، بيرما حالقىمەن بىرگە سۋ شاشۋ مەرەكەسىن قۇتتىقتاعان كورىنىس ادەمى اڭگىمە بولىپ بۇگىنگە جەتتى.

جاۋاپتى رەداكتور: گۇلدەن ماقسات قىزى