وبلىسقا توتە قاراستى ورىندار كوپ ٴتۇرلى شارا قولدانىپ، ەت باعاسىنىڭ ورنىقتى بولۋىنا كەپىلدىك ەتتى

  • كەلۋ قاينارى: ىلە گازەتى
  • 07:03:40 14/02/2020

 

    ءتىلشىمىز لي يافىڭ حابارلايدى. جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ – تىزگىندەۋ مەزگىلىندە، اۆتونوميالى وبلىستاعى اۋدان - قالالار بازاردىڭ ساتىپ الۋ، تاسىمالداۋ، زاپاس ساقتاۋ، ساتۋ ارنالارىن بەلسەنە ىركىلىسسىزدەندىرىپ، بازاردىڭ قامداۋى جەتكىلىكتى، مول، زات باعاسىنىڭ ورنىقتى بولۋىنا بارىنشا كەپىلدىك ەتتى.

    2 – ايدىڭ 11 – كۇنى تاڭعى ساعات 6 دا قۇلجا قالاسى حالىققا قولايلى توپادوڭ ارناۋلى سيىر، قوي سويۋ الاڭى سيىر، قوي ەتىن تولايىم الاتىن كوپتەگەن ساۋداگەردى قارسى الدى. «سويىسحانادا كۇنىنە 50 سيىر، 300 قوي سويىلادى، كارانتيندەۋدەن ءوتىپ تولىمدى بولعان سوڭ تۇگەلدەي بازاردى قامدايدى» دەدى سويىسحانانىڭ جاۋاپتىسى ءدىليار ابدۇحىلىل. مال سويۋ ورنى، اۆتوكولىك توقتاتۋ الاڭى، سويىلاتىن مالدى قامايتىن ورىن، بالعىن كۇيىندە ساقتاۋ قامباسى سياقتىلاردىڭ ءبارى تەگىن پايدالانۋعا بەرىلىپ، ارالىقتاعى بۋىندار ازايتىلىپ، بازارداعى ەتتىڭ باعاسى تومەندەتىلگەن.

    وبلىستىق ساۋدا ىستەرى مەكەمەسى بازار قۇرىلىسى جانە اينالىم ىستەرىن دامىتۋ باسقارماسىنىڭ باستىعى جاڭ جۇنجيە تانىستىرىپ بىلاي دەدى: «الدىڭعى ءبىر مەزگىلدە قۇلجا قالاسى توپادوڭ كوشەسىندەگى سيىر، قوي سويىسحاناسىنىڭ سويۋعا قاجەتتى سيىر مەن قويدى ساتىپ الۋ، تاسىمالداۋ قيىن بولۋ ماسەلەلەرىنە باعىتتاي وتىرىپ، وبلىستىق ساۋدا ىستەرى مەكەمەسى ءارقايسى جاقتى سايكەستىرىپ، قاتىستى اۋدان، اۋىل، قىستاقتاردى ۇشتاستىرىپ، ٴتىرى مالمەن قامداۋ قاينارىن شەشۋمەن بىرگە بۇرىنعى سيىر، قوي ەتىن تولايىم ساتۋ بازارىن قازىرگى سويىسحاناعا تىكەلەي كوشىرىپ، ارالىقتاعى اينالىم قاراجاتىن تومەندەتتى. ارالىقتاعى بۇل بۋىننىڭ ازايتىلۋى، ەتتىڭ ءار كيلوگرامىنىڭ باعاسىن ورتا ەسەپپەن 2 يۋان تومەندەتتى».

    الما باقشاسى شاعىن اۋماعىندا ءدىليار تولايىم ساتۋ باعاسى بويىنشا 7 قالا تۇرعىنى تاپسىرىس بەرگەن سيىر، قوي ەتىن شاعىن اۋماقتىڭ ەسىگى الدىنا جەتكىزدى. «بۇل ەتتەر سويىسحانادان تۇرعىندارعا تىكەلەي جەتكىزىلىپ، ورتاداعى بۋىن ازايتىلىپ، ەت باعاسى بىرنەشە يۋان ارزانداتىلدى. ەكى كۇننەن بەرى سيىر، قوي ەتىمەن قامداۋ جەتكىلىكتى بولىپ، قوي ەتىنىڭ ءار كيلوگرامى 2 – 3 يۋان، سيىر ەتىنىڭ ءار كيلوگرامى 1 – 2 يۋان تومەندەدى» دەدى ءدىليار.

    ىندەت جاعدايى تۋىلعاننان بەرى كوجە – قاتىق ونىمدەرىنىڭ جەتكىلىكتى، ساپاسىنىڭ حاۋىپسىز بولۋىنا كەپىلدىك ەتۋ ءۇشىن، قۇلجا قالاسى حالىق بۇقاراسىنىڭ ازىق ـ تۇلىك قاجەتىن قاناعاتتاندىرۋدى تياناق ەتىپ، كوپ ءتۇرلى شارا قولدانىپ، مال، قۇس ەتى ونىمدەرىمەن قامداۋدى بارىنشا قامتاماسىزداندىردى.

    قۇلجا قالاسى قارادوڭ اۋىلى گۇلشانباق قىستاعىنداعى باعىمشىلىقپەن شۇعىلداناتىن ءارپات نۇرمامەت قوراسىنداعى 50 نەشە سيىرىنا جەم سالىپ جاتىپ بىلاي دەدى: «4 اي بورداقىلاعاننان كەيىن 70 باس سيىرىمنىڭ ءبارى سويۋعا جارادى. 20 نەشە سيىر سويىلدى، قالعان 40 نەشە سيىردى كەز كەلگەن ۋاقىتتا ساتۋعا بولادى».

جاۋاپتى رەداكتور: گۇلدەن ماقسات قىزى