«جۇمىستى قالپىنا كەلتىرۋ قارىز اقشاسى» جەكەشە ساۋدا – ونەركاسىپشىلەردىڭ جۇمىستى، ٴوندىرىستى قالپىنا كەلتىرۋىنە دەم بەردى

  • كەلۋ قاينارى: ىلە گازەتى
  • 03:11:56 20/03/2020

  

    ءتىلشىمىز مىڭ شيا حابارلايدى. 3 – ايدىڭ 17 – كۇنى قۇلجا قالاسىنداعى جەكە ساۋداگەر ۋىن فاڭ قارىز اقشا بەرۋ ساياساتىن ۇعىسىپ، ودان قارىز اقشا الۋ ٴءوتىنىشىن تولتىرىپ، ىلە اۋىل شارۋاشىلىق – ساۋدا بانكەسى بەيجيڭ جولى تارماق بانكەسىنىڭ كەپىل زاتسىز، كەپىل ادامسىز، ءوسىمىن ۇكىمەت كوتەرەتىن قارىز اقشاسىنا يە بولۋعا ءبىر كۇن عانا ۋاقىت جۇمسادى.

    «بۇل 80 مىڭ يۋان قارىز اقشا دەر كەزىندە بەرىلىپ، ءبىز سياقتى جەكەشە ساۋدا – ونەركاسىپشىلەردىڭ قيىنشىلىق قىسپاعىنان شىعۋىنا شىنىمەن سەپتىگىن تيگىزدى» دەدى ۋىن فاڭ. ول قۇلجا قالاسى بەيجيڭ جولى ۋتۇڭليجيڭ تۇرعىندار شاعىن اۋماعىنىڭ ماڭىنان اس ٴءۇي، قوناق ءۇي جابدىقتارى جانە ٴءۇي جيھازدارى دۇكەنىن اشقان، ٴاسىلى كوكتەم مەرەكەسىنەن كەيىن اس – سۋ، قوناق ۇيلەرى جابدىق ساتىپ الۋدىڭ قاۋىرت مەزگىلىنە وتەتىن – دى، جاڭا ءتيپتى ايدارشا ۆيرۋس وكپە قابىنۋ ىندەتىنىڭ ىقپالىنان دۇكەنىندە ٴءبىر ايدان استام تيجارات جۇرگىزىلمەدى، زات ساتىپ الۋعا قاجەتتى قوماقتى قارجى ماسەلەسى ۋىن فاڭدى قاتتى الاڭداتىپ وتىرعان – دى.

    جۋىردا اۆتونوميالى رايون جۇمىستى، ءوندىرىستى قالپىنا كەلتىرۋ ساياساتتارىن اتقاردى، 3 - ايدىڭ 14 – كۇنى ىلە اۋىل شارۋاشىلىق – ساۋدا بانكەسى جەكەشە ساۋدا – ونەركاسىپشىلەرگە ءوسىمىن ۇكىمەت كوتەرەتىن شاعىن سومالى سەنىمدى قارىز اقشا بەرۋ جونىندەگى ءتيىمدى ساياساتتى اتقارا باستادى. ساياساتتى بارلىق وتباسىنا جەتكىزىپ، قارىز اقشاعا مۇقتاج بۇقاراعا كومەكتەسۋ ءٴۇشىن، اتالعان بانكە ساياساتتى تارماق بانكەلەرگە جەدەل جەتكىزىپ، تارماق بانكەلەردىڭ قىزمەتكەرلەرى الەۋمەتتىك اۋماقتارمەن دەرەۋ بايلانىس جاسادى، سونىمەن بىرگە، وتباسىلاردى ارالاپ، ساياساتتى ساۋداگەرلەرگە جەتكىزىپ، قارىز سۇرانىسى بار ساۋداگەرلەرگە دەرەۋ كەپىل زاتسىز، كەپىل ادامسىز قارىز اقشا بەردى.

    ىلە اۋىل شارۋاشىلىق ساۋدا بانكەسى بەيجيڭ داڭعىلى تارماق بانكەسىنىڭ ورىنباسار باستىعى قوسىمشا قاريدار ءىسى ديرەكتورى جاڭ شانۋي تىلشىگە: «وسى رەت اتقارىلعان جۇمىستى، ءوندىرىستى قالپىنا كەلتىرۋگە فينانستىق جاقتان تيىمدىلىك جاساۋ ساياساتىنىڭ تەبىنى بۇرىنعىلارمەن سالىستىرعاندا زور بولدى، مۇندا جەكەشە ساۋدا - ونەركاسىپشىلەر 80 مىڭ يۋانعا دەيىن قارىز اقشا الۋىنا بولادى، ءوسىمىنىڭ جارتىسىن مەملەكەت كوتەرەدى، قارىز بەرۋ مەرزىمى جارتى جىل. مىسالى، 80 مىڭ يۋان قارىز اقشا السا، ءبىر ايلىق ءوسىمى 270 يۋان بولادى، ۇكىمەت ءوسىمىنىڭ جارتىسىن كوتەرگەندە ساۋداگەرلەر تەك 135 يۋان ءوسىم تولەيدى» دەدى.

جاۋاپتى رەداكتور: گۇلدەن ماقسات قىزى