ىلە وبلىسىنداعى تىڭنان، جالعاستى سالىناتىن نىساندار تارتىپپەن جۇمىس باستادى

  • كەلۋ قاينارى: ىلە گازەتى
  • 03:52:08 21/03/2020

 

    ءتىلشىمىز گو جۇن حابارلايدى. كوكتەم كەلىپ، كۇللى تىرشىلىك جانداندى. اۆتونوميالى وبلىس جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋدى مىقتى يگەرۋ نەگىزىندە ىندەت سەبەبىنەن زايا كەتكەن ۋاقىتتى ۇتۋعا بارىنشا كۇش سالىپ، تىڭنان، جالعاستى سالاتىن نىسانداردى جاپپاي اداقتاپ، نىسانداردىڭ تارتىپپەن جۇمىس باستاۋىن جەدەل ىلگەرىلەتىپ، ىندەتتىڭ ىقپالىن مۇمكىندىكتىڭ بارىنشا تومەندەتىپ، ەكونوميكانىڭ ورنىقتى، اقاۋسىز دامۋىن قامتاماسىزداندىردى.

    3 -ايدىڭ 16 -كۇنى ءتىلشى مەملەكەتتىك ەنەرگيا توبى ىلە ەلەكتر ستانسياسىنا بارعاندا كاسىپورىننىڭ اي باسىندا - اق جۇمىستى قالپىنا كەلتىرگەندىگىن، قازىر ىلە ەلەكتر ستانسياسىنىڭ 2 مىڭ 350 مەگاۋاتتىق جىلۋ ەلەكتر بىرلەسپە ءوندىرىس نىسانىنىڭ 2 - ءنومىرلى گەنەراتور شوعىرىندا سىناق جۇرگىزىلىپ جاتقاندىعىن كوردى.

    مەملەكەتتىك ەنەرگيا توبى ىلە ەلەكتر ستانسياسىنىڭ ورىنباسار باس ينجەنەرى لي جينچياڭنىڭ تانىستىرۋىنا نەگىزدەلگەندە قازىر ەلەكتر ستانسياسىندا 600 دەن استام قىزمەتكەر بار بولىپ، 2 -ءنومىرلى گەنەراتور شوعىرىندا سىناق جۇرگىزۋدە ەكەن. «3 -ايدىڭ 13 -كۇنى 2 -ءنومىرلى گەناراتور شوعىرىن توراپتاستىرۋ تۇڭعىش رەت ءساتتى بولىپ، اۆتونوميالى وبلىسقا تىزىمگە الدىردىق. قازىر جۇمىس ورنىنا قايتقان قىزمەتكەرلەردىڭ سانى 120 دان استى، مولشەرمەن 2 دە 3 كۇندە بارلىعى تولىق قايتىپ بولادى. ولار 2 -ءنومىرلى گەنەراتور شوعىرىن ىسكە قوسۋدى سىناق ەتۋگە دايىندالادى. جۇمىستى قالپىنا كەلتىرۋ كەزىندە ەلەكتر ستانسياسى ىندەتتەن ساقتانۋ - تىزگىندەۋ جوباسى بويىنشا دەزينفەكسيالاۋ مەن قىزمەتكەرلەردىڭ ىندەتتەن ساقتانۋ - قورعانۋ قىزمەتىن ويداعىداي ىستەيدى» دەدى لي جينچياڭ.

    وسىمەن قاتار ىلەدەگى ەلەكتر جانە جىلۋمەن قامداۋ سەرىكتىكتەرى مەن شينتيان كومىر - حيميا ونەركاسىبى شەكتى جاۋاپكەرلىك سەرىكتىگىن كومىرمەن قامتاماسىز ەتۋ ءۇشىن ىلە شينكۋاڭ كومىر كاسىبى شەكتى جاۋاپكەرلىك سەرىكتىگى ىندەتتەن ساقتانۋ - تىزگىندەۋ قىزمەتىن ويداعىداي ىستەۋمەن بىرگە، كەن جۇمىسشىلارىنان 886 ادامدى قاۋىرت وندىرىسكە ورنالاستىرىپ، 3 - ايدىڭ باسىندا 227 مىڭ توننا كومىر ءوندىرىپ، كۇندىك ورتاشا ءوندىرىس مولشەرىن 16 مىڭ تونناعا جەتكىزدى.

    نىسان قۇرىلىسىن ىلگەرىلەتۋ بارىسىندا اۆتونوميالى وبلىس تىڭنان، جالعاستى سالىناتىن نىسان قۇرىلىستارىن ىلگەرىلەتۋ تەبىنىن ارتتىردى. وبلىستىق دامۋ جانە رەفورما كوميتەتى جۇمىستى قالپىنا كەلتىرۋگە عىلمي تۇرعىدان جەتەكشىلىك ەتىپ، نىسانداردا جۇمىستى ەرتەرەك قالپىنا كەلتىرۋگە، ەرتەرەك باستاۋعا بەلسەندى شارت - جاعداي ازىرلەپ، جاڭادان سالىناتىن نىسانداردا جۇمىس باستاۋ تەبىنىن ارتتىرىپ، ىندەتتىڭ ىقپالىن مۇمكىندىكتىڭ بارىنشا تومەندەتتى.

جاۋاپتى رەداكتور: گۇلدەن ماقسات قىزى