ٴتيىمدى ساياسات وبلىسىمىزداعى كاسىپورىنداردىڭ جۇمىستى، ٴوندىرىستى قالپىنا كەلتىرىپ جەدەل ىلگەرىلەۋىنە دەم بەردى

  • كەلۋ قاينارى: ىلە گازەتى
  • 03:55:06 24/03/2020

    ءتىلشىمىز ما چىڭلۋ، ەرىكتى ءتىلشى ۋاڭ لين حابارلايدى. ەل ىشىندەگى جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ جاعدايىنىڭ ۇزدىكسىز جاقسارۋىنا بايلانىستى ٴار ۇلت بۇقاراسىنىڭ ٴوندىرىس، تۇرمىس ٴتارتىبى بىرتىندەپ قالىپقا ءتۇستى. پارتيا ورتالىق كوميتەتىنىڭ، مەملەكەتتىك كەڭەستىڭ كاسىپورىنداردىڭ جۇمىستى، ءوندىرىستى قالپىنا كەلتىرىپ، ەكونوميكالىق، قوعامدىق دامۋدىڭ قالىپتى ارناعا تۇسۋىنە دەم بەرۋ جونىندەگى تالابىنا ساي، كاسىپورىندارعا مەيىر باعىشتاۋ، تيىمدىلىك جاساۋ جونىندەگى ءبىرقىدىرۋ ساياساتتار وبلىسىمىزداعى كاسىپورىنداردا تياناقتانىپ، ىندەتتەن ساقتانۋ - تىزگىندەۋ مەن ەكونوميكالىق دامۋدى ءبىر تۇتاس ويداعىداي ىلگەرىلەتۋگە بەرىك نەگىز قالادى.

    3 - ايدىڭ 19- كۇنى ٴتىلشى قۇلجا قالاسى بايانداي قالاشىعىنداعى ىلە شينتيان كومىر ـ حيميا ونەركاسىبى شەكتى جاۋاپكەرلىك سەرىكتىگىنە كەلىپ، كاسىپورىن قىزمەتكەرلەرىنىڭ قىزمەت ورىندارىندا رەتتى دە قاربالاس جۇمىس ىستەپ جاتقانىن كوردى. ٴتىلشى قازىر شينتيان كومىر ـ حيميا ونەركاسىبى شەكتى سەرىكتىگىنىڭ قىزمەتكەرلەر قوسىنىنىڭ ورنىقتى، كادرلار مەن جۇمىسشى - قىزمەتكەرلەرىنىڭ سەنىمىنىڭ كۇشتى، ٴتۇرلى زاتتىق قامتاماسىزداندىرۋىنىڭ جەتكىلىكتى بولىپ، ٴوندىرىس جۇيەسى ورنىقتى اينالىمعا تۇسكەنىن، كاسىپورىننىڭ تىكەلەي ىستەتەتىن جۇمىسشىسى 2 مىڭ 978 ادام ەكەنىن، قازىر 2 مىڭ 620 ادامنىڭ جۇمىس ورنىنا قايتىپ كەلىپ جۇمىس باستاعانىن، قىزمەت ورنىنا قايتىپ كەلۋ مولشەرى %88 كە جەتكەنىن، شينجياڭعا سىرتتان كەلەتىن ادامداردىڭ توپقا، رەتكە ٴبولىنىپ، ىركەس - تىركەس تارتىپپەن قايتىپ كەلىپ جاتقانىن ۇعىستى.

    وبلىستىق پارتكوم مەن حالىق ۇكىمەتى ىندەتتەن ساقتانۋ - تىزگىندەۋ مەزگىلىندە كاسىپورىندارعا دەر كەزىندە جاسىل جول اشىپ، پارتيا ورتالىق كوميتەتىنىڭ، مەملەكەتتىك كەڭەستىڭ جانە اۆتونوميالى رايوننىڭ ٴتۇرلى ٴتيىمدى ساياساتتارىنىڭ كاسىپورىنداردا ىركىلىسسىز تياناقتانۋىنا كەپىلدىك ەتتى. 3 - ايدىڭ 15 - كۇنىنە دەيىن ىلە شينتيان كومىر- حيميا ونەركاسىبى شەكتى جاۋاپكەرلىك سەرىكتىگى قىزمەت ورنىن ورنىقتىرۋ قوسىمشا قاراجاتىنان 805 مىڭ يۋان السا، قوعامدىق قامتاماسىزداندىرۋ جاعىنان الىناتىن 3 ميلليون 410 مىڭ يۋان اقىسى كەشىرىم ەتىلىپتى، باجىنى ازايتۋ، كەشىرىم ەتۋ قاراجاتى، ەلەكتر باعاسىندا تيىمدىلىك جاساۋ، قارجىلاي قولداۋ سياقتى ٴتيىمدى ساياساتتار بويىنشا قاتىستى رەسمياتتارى ٴوتىنىش ەتىلىپ، ءبىتىرىلۋ ۇستىندە ەكەن.

    وسى سەرىكتىكتىڭ گازدەندىرۋ سەحىنىڭ قىسىمدى گازدەندىرۋ ءبانىنىڭ باستىعى جاۋ سى - زۇڭ: «ىندەت كەزىندە وبلىستىق ۇكىمەت پەن جىجياڭ ەنەرگيا توبىنىڭ كومەگىندە شينتيان كومىر- حيميا ونەركاسىبى سەرىكتىگىنىڭ ٴبىرىنشى شەبىندەگى جۇمىسشى- قىزمەتكەرلەرگە كۇنىنە 200 يۋان ەكونوميكالىق قوسىمشا قاراجات بەرىلدى، ٴبىرىنشى شەپتەگى قىزمەتكەر بولعاندىقتان بۇعان شىنايى العىس ايتامىن. جەكە باسىمنىڭ اماندىعىن جاقسى قورعاۋمەن بىرگە، ءوز قىزمەتىمدى قۇلشىنا ىستەپ، كاسىپورىننىڭ ورنىقتى اينالىمىنا كەپىلدىك ەتىپ، اۆتونوميالى وبلىستىڭ جۇمىستى، ءوندىرىستى قالپىنا كەلتىرۋىنە جانە ەكونوميكالىق دامۋعا ٴتيىستى ۇلەسىمدى قوسامىن» دەدى.

جاۋاپتى رەداكتور: جازيرا بولاتباي قىزى