الدىڭعى 2 ايدا شينجياڭنىڭ سىرتقى ساۋداسىندا جوعارىلاۋ دا، تومەندەۋ دە بولدى

  • كەلۋ قاينارى: ىلە گازەتى
  • 03:32:53 25/03/2020

    حالىقتىق كاسىپورىندار ەكسپورتتاعى نەگىزگى كۇشكە اينالدى

    

    شينحۋا اگەنتتىگىنىڭ 3 - ايدىڭ 23 - كۇنى ۇرىمجىدەن بەرگەن حابارى. بيىل الدىڭعى 2 ايدا شينجياڭنىڭ سىرتقى ساۋداسىندا بىردە جوعارىلاۋ، بىردە تومەندەۋ جاعدايى بايقالىپ، يمپورت - ەكسپورت جالپى قۇنى 20 ميلليارد يۋان بولدى. ونىڭ ىشىندە حالىقتىق كاسىپورىنداردىڭ ەكسپورتى سىرتقى ساۋدا ەكسپورت جالپى قۇنىنىڭ %93 ىن يەلەپ، شينجياڭنىڭ سىرتقى ەكسپورتىنداعى ماڭىزدى كۇشكە اينالدى.

    ءتىلشىنىڭ ءۇرىمجى كەدەنىنەن ۇعىسۋىنشا، بيىل الدىڭعى 2 ايدا شينجياڭنىڭ سىرتقى ساۋدا يمپورت - ەكسپورت جالپى قۇنى 20 ميلليارد 30 ميلليون يۋان بولىپ، بىلتىرعى ۇقساس مەزگىلدەگىمەن سالىستىرعاندا %3.1 تومەندەگەن. ونىڭ ىشىندە ەكسپورت 12 ميليارد 950 ميلليون يۋان بولىپ، %16.7 تومەندەگەن، مۇنىڭ كوبى توقىما بۇيىمدار، ءۇي جيھازدارى، شابادان - سومكا، اياق كيىم، سۇلياۋ بۇيىمدار سياقتى ءداستۇرلى ەڭبەككۇش شوعىرلانعان ونىمدەر؛ يمپورت 7 ميلليارد 80 ميلليون يۋان بولىپ، %38.5 ارتقان، نەگىزىنەن تابيعي گاز، مۇناي سياقتى قوماقتى تاۋارلار بولعان.

    نازار اۋدارارلىعى، الدىڭعى 2 ايدا شينجياڭداعى حالىقتىق كاسىپورىنداردىڭ يمپورت - ەكسپورتى 14 ميلليارد يۋاننان اسىپ، شينجياڭنىڭ وسى مەزگىلدەگى سىرتقى ساۋدا جالپى قۇنىنىڭ %70 ىن يەلەگەن. ونىڭ ىشىندە يمپورت ءبىر ميلليارد 900 ميلليون يۋاننان، ەكسپورت 12 ميلليارد 100 ميلليون يۋاننان اسقان. الدىڭعى 2 ايدا قازاقستان شينجياڭنىڭ ەڭ ۇلكەن ساۋدا سەرىگى بولۋداي ورنىن ۇزدىكسىز ساقتاپ، يمپورت ـ ەكسپورت مولشەرى شينجياڭنىڭ ۇقساس مەزگىلدەگى سىرتقى ساۋدا جالپى قۇنىنىڭ %50 ىن يەلەگەن، شينجياڭنىڭ قىرعىزستانعا، وزبەكستانعا، رەسەيگە يمپورت ـ ەكسپورتى تۇگەلدەي بىلتىرعى ۇقساس مەزگىلدەگىدەن تومەندەگەن.

جاۋاپتى رەداكتور: جازيرا بولاتباي قىزى