ايتقۇرمان جىلدىق كىرىسىن 200 مىڭ يۋانعا جەتكىزدى

  • كەلۋ قاينارى: ىلە گازەتى
  • 04:38:29 26/03/2020

    ءوز كۇشىنە سۇيەنىپ مال باعىپ، قاجىرلىلىقپەن ەڭبەكتەنىپ، اۋقاتتانۋ جولىنا ءتۇستى

    

    ەرىكتى تىلشىلەر جياۋ جۇنشيا، جاڭ گوحۇي، ۋاڭ چۇنلين شيحۋدان حابارلايدى. 3 - ايدىڭ 13 - كۇنى شيحۋ قالاسى شىچياۋ اۋىلى تيەجيازى مال شارۋاشىلىق جاڭا قىستاعىنىڭ مالشىسى ايتقۇرمان قىدىربەك ۇلى جايشىلىقتاعىداي ارالاستىرىلعان جەم - ءشوپتى قوي قوراداعى ناۋاعا سالىپ جاتتى، ونىڭ 300 گە جۋىق قىسقى ءتولى قورالانا جەم – شوپكە باس قويدى. ايتقۇرمان قوي قوراداعى بۇل دۋماندى كورىنىستى كورگەندە، ىشتەي قاتتى رازى بولدى.

    ارينە 9 جىلدىڭ الدىندا ول مۇنداي كوڭىلدى بولارىن مۇلدە ويلاماعان ەدى.

    9 جىلدىڭ الدىندا ايتقۇرمان باسقالاردىڭ مالىن باعىپ كۇن كورەتىن، وتباسىلىق كىرىسى دە ناشار ەدى. كەيىن شىچياۋ اۋىلدىق پارتكوم مەن ۇكىمەتتىڭ كومەگىندە ايتقۇرمان وتباسىنداعىلار مالشىلاردى وتىرىقتاندىرۋ ينجەنەرياسىنىڭ ناقتى تيىمدىلىگىنەن يگىلىكتەنىپ، تۇراقتى باسپاناعا يە بولدى، سودان باستاپ ول ءتىپتى دە مول كىرىس كىرگىزۋدى ويلادى.

    2012 - جىلى ايتقۇرمان قىسقى ءتول بازارىنىڭ كۇسەت ەكەندىگىن بايقاپ، قىسقى ءتول باعىمشىلىعىن دامىتۋدى ويلادى، ءبىراق ايەلى وعان مۇلدە قارسى شىقتى، ويتكەنى وتباسىندا باعىمشىلىقتى دامىتاتىنداي ونشالىقتى كوپ قاراجات جوق ەدى.

    ايەلىنىڭ قارسى تۇرۋى دا ورىندى ەدى، دەسە دە ايتقۇرمان ويلانا كەلىپ، نەدە بولسا سىناپ كورۋ بەكىمىنە كەلەدى دە، سول كەزدەگى تيەجيازى مال شارۋاشىلىق جاڭا قىستاعى پارتيا ياچەيكاسىنىڭ ورىنباسار شۋجيى لي جياڭحايدى ىزدەپ بارادى. لي جياڭحاي ايتقۇرماننىڭ مال باعىمشىلىعى ءۇشىن بەرىلەتىن تومەن ءوسىمدى قارىز اقشادان 60 مىڭ يۋانعا ءوتىنىش بەرۋىنە، سونداي - اق ونىڭ باعىمشىلىق فەرمالارىمەن بايلانىس جاساپ، 60 نەشە ساۋلىق ساتىپ الۋىنا كومەكتەسەدى.

    قارجى جاقتان قولداۋ تاپقان سوڭ، ول قالعان ءىستى ءوز قۇلشىنىسىنا سۇيەنىپ شەشتى. ايتقۇرمان ايەلىنە يدەيالىق قىزمەت ىستەۋ ارقىلى ەرلى - زايىپتى ەكەۋى تاجىريبەلى ادامداردى قورادا مال باعۋ تەحنيكاسىن ۇيرەتۋگە ۇسىنىس ەتتى، باعىمشىلىق ينفورماتسياسىنا ءاردايىم نازار اۋدارىپ وتىردى.

    2016 - جىلى قىستاقتا شارۋالار مەكتەبى اشىلعاندا، «ۇعىسۋ، تيىمدىلىك جاساۋ، توعىستىرۋ» بويىنشا قىستاقتا تۇراتىن قىزمەت اترەتىندەگىلەر مەن قىستاق «ەكى كوميتەتى» بۇقارانىڭ تالابىنا ساي، مال شارۋاشىلىق تەحنيكتەرى مەن باعىمشىلىقپەن شۇعىلداناتىن تاجىريبەلى وتباسىلارىن ساباق وتۋگە ۇسىنىس ەتكەندە، وعان ايتقۇرمان مەن ايەلى دە قاتىناسىپ، باعىمشىلىق تەحنيكاسىن ۇيرەندى.

    قازىر ايتقۇرماننىڭ قوراسىندا 600 تۇياققا جۋىق قوي بار، ودان 300 قوزى ەرىپ، قوزىلاردىڭ قاتارعا قوسىلۋى %95 كە جەتتى، بۇل قوزىلار بيىل 7 -، 8 - ايلاردا قورادان شىعارىلادى، ول بۇدان كەم دەگەندە 200 مىڭ يۋان پايدا تابادى.

    ايتقۇرمان: «قويىمىزدى العاشقى 60 تۇياقتان 600 تۇياققا جەتكىزدىك، كىرىسىمىز دە بۇرىنعى 30 مىڭ يۋاننان 200 مىڭ يۋانعا جوعارىلادى، تۇرمىسىمىز بارعان سايىن جاقسارۋدا» دەدى.

جاۋاپتى رەداكتور: جازيرا بولاتباي قىزى