رايونىمىز سەيىل - سەرۋەن اۋىل شارۋاشىلىعىن جانە اۋىل - قىستاق ساياحاتىن زور كۇشپەن دامىتتى

  • كەلۋ قاينارى: شينجياڭ گازەتى تورابى
  • 03:08:17 18/04/2020

    تاماشالاپ گۇل قىزىعىن كوكتەمدە، سايا بولار جاز سامالى وپكەندە، جەمىس تەرگەن التىن كۇزدىڭ ساتىندە، اۋىل دۋمان قىس كۇنى دە جەتكەندە

    

    گازەتىمىزدىڭ جالپىلىق اقپارات قۇرالدارى ءتىلشىسى رىن جياڭ 4 - ايدىڭ 15 - كۇنى ۇرىمجىدەن حابارلايدى. 4 - ايدىڭ 15 - كۇنى تۇستەن كەيىن ءۇرىمجى اۋدانى شۇيشيگوۋ قالاشىعى شياۋدۇڭگوۋ قىستاعىنىڭ اتىزىندا جەر جىرتۋ ماشيناسى گۇرىلدەپ، قىس بويى تىم - تىرىس جاتقان توپىراق ۇيقىسىنان وياندى. ”بيىل قىستاعىمىز 1100 مۋدان استام جەرگە جوڭىشقا، ەسەكجەم، سۋدان ءشوپ سياقتىلاردى ەگەدى“. وسى قىستاقتىڭ قىستاق تۇرعىندار كوميتەتىنىڭ مەڭگەرۋشىسى ۋاڭ يۋەفۋدىڭ تانىستىرۋىنشا، جوڭىشقا گۇل اشقان كەزدە، ۇشى - قيىرىنا كوز جەتپەيتىن ”گۇلدى القاپپەن“ ۇندەسىپ، اناعۇرلىم كوپ ادامدى ساياحاتتاۋعا باۋرايدى ەكەن.

    2017 - جىلدان باستاپ، شياۋدۇڭگوۋ قىستاعى ءۇرىمجىنىڭ نانشان حالىقارالىق ساياحات ءوڭىرىن قۇرۋ ورايىن بەلسەندى تۇردە مىقتى يگەرىپ، اۋىل - قىستاق ساياحاتىن دامىتىپ، 2000 مۋدان استام جەرگە كورەويسيس جانە سەپپە كوكنار ەگىپ، ايبىندى ”گۇل تەڭىزىن“ قالىپتاستىرىپ، وسىندا كەلەتىن قالىڭ ساياحاتشىلاردىڭ اياعى ۇزىلمەيتىن بولدى، كوپتەگەن قىستاق تۇرعىندارى ساياحاتتىڭ پايداسىنا كەنەلىپ، كىرىستەرى قاۋىرت ارتتى. ”بيىل ءبىز حالىقتىق تۇسەلحانا سالىپ، 50 − 100 مۋ جەردى جيىن - تەرىن ساياحاتىن دامىتۋعا ءبولىپ، ءۇرىمجى قالا تۇرعىندارىنىڭ ’تانىپ الۋ‘ تاسىلىمەن ’كوڭىلدى ەگىس الاڭىنىڭ‘ مۇشەسى بولىپ، اپتا سوڭىندا وسىندا كەلىپ ناعىز ورگانيكالىق كوكونىستەر تەرۋىنە، تاتۋىنا مۇمكىندىك جاساۋدى جوسپارلاپ وتىرمىز“، - دەيدى ۋاڭ يۋەفۋ.

    سوڭعى جىلدارى، شينجياڭ سەيىل - سەرۋەن اۋىل شارۋاشىلىعىن جانە اۋىل - قىستاق ساياحاتىن زور كۇشپەن دامىتتى، شياۋدۇڭگوۋ سياقتى ساياحاتتى دامىتۋ ارقىلى كىرىستى ارتتىرىپ، بەت - بەينەسىن وزگەرتكەن قىستاقتاردىڭ قاتارى بارعان سايىن مولايۋدا. بيىل شينجياڭ بايلىق باسىمدىعىن ونان ارى ساۋلەلەندىرىپ، سەيىل - سەرۋەن اۋىل شارۋاشىلىعى مەن اۋىل - قىستاق ساياحاتىنىڭ تۇتاس وڭىرلىك ساياحاتتاعى ۇلەس سالىستىرماسىن جوعارىلاتىپ، 2020 - جىلى بۇكىل شينجياڭداعى سەيىل - سەرۋەن اۋىل شارۋاشىلىعى مەن اۋىل - قىستاق ساياحاتى بويىنشا قابىلدانعان ساياحاتشىلاردىڭ (رەت) ساياحاتتا قابىلدانعان ادامدار ىشىندە ۇستايتىن سالماعىن %30تەن اسىرۋعا قۇلشىنباق.

    تاماشالاپ گۇل قىزىعىن كوكتەمدە، سايا بولار جاز سامالى وپكەندە، جەمىس تەرگەن التىن كۇزدىڭ ساتىندە، اۋىل دۋمان قىس كۇنى دە جەتكەندە. قازىر، ”تاۋى بار كوز الدىڭدا جاتقان شۇباپ، سۋى بار بەينەدەيىن ءمولدىر سىناپ، اۋىلدىڭ ساعىنىشىن، ۇمىتپا قالقام - شىراق“ دەگەندى وزەك ەتكەن سەيىل - سەرۋەن اۋىل شارۋاشىلىعى مەن اۋىل - قىستاق ساياحاتى شينجياڭنىڭ جەر - جەرىنىڭ ءتۇيىندى دامىتاتىن ساياحات كۇيىنە اينالۋدا. قازىر التاي ايماعى «التاي ايماعىنىڭ اۋىل - قىستاق ساياحاتىن دامىتۋ جوباسىن» جاساپ بولىپ، 3 اۋىل - قىستاق ساياحاتى جەلىسىن جانە ءبىر شەكارا ساياحاتى اۋىل - قىستاق جەلىسىن بەلگىلەپ، ەرەكشەلىگى ايقىن اۋىل - قىستاق ساياحاتىنان ۇلگى كورسەتۋ قىستاعىنان ءبىر توبىن قالىپتاستىردى. 2019 - جىلى تىڭنان 194 حالىقتىق تۇسەلحانا سالىپ، 4300دەن استام توسەك - ورىن دايىندادى. بيىل تىعىزدىعى تومەن، جەكە يگىلىكتەنۋ تۇرىندەگى اۋىل - قىستاق ساياحات ونىمدەرىندە جاڭالىق اشىپ، اۋىل - قىستاقتا كۇتىمدەلۋ، وتباسىلىق باس قوسۋ، اۋىلدا ۋاقىتشا قونىستانۋ، ۇلتتىق عۇرىپ - ادەتتەرمەن تانىسۋ سياقتى ساياحاتتىڭ جاڭا كۇيىن ورتاعا قويدى.

جاۋاپتى رەداكتور: جازيرا بولاتباي قىزى