شيحۋ باتپاقتى جانارتاۋ شوعىرى كورىنىس رايونى ساياحاتشىلاردى باۋرادى

  • كەلۋ قاينارى: ىلە گازەتى
  • 03:33:24 13/05/2020

    ەرىكتى ءتىلشى ۋاڭ دىگاڭ شيحۋدان حابارلايدى. «1 - مامىر» شاعىن دەمالىسى كەزىندە شيحۋ باتپاقتى جانارتاۋ شوعىرى كورىنىس رايونى جەر – جەردەن كەلگەن مىڭنان استام ساياحاتشىنى قابىلدادى. فوتو سۋرەت اۋەسكەرلەرى مەن ساياحاتشىلار ونداعى گەولوگيالىق عاجايىپ كورىنىستەردى تاماشالاپ، ۇلى تابيعاتتىڭ حيكىمەتىن سەزىندى.

    شيحۋ باتپاقتى جانارتاۋ شوعىرى تيانشاننىڭ سولتۇستىگىندەگى ادىرلى وڭىرگە ورنالاسقان، بايياڭگۋ قالاشىعىنا تاۋەلدى، شيحۋ قالاسىنان 42 كيلومەتر قاشىقتىقتا، بۇل جەردى ەلىمىز گەولوكتارى 2001 – جىلى بايقاعان، دۇنيە ءجۇزى بويىنشا ەڭ ۇلكەن ءارى قازىرگە دەيىن اتىلۋ ۇستىندەگى قوزعالىستاعى باتپاقتى جانارتاۋ شوعىرى ەسەپتەلىنەدى. باتپاقتى جانارتاۋ شوعىرىنان جۇزدەن استام دوڭگەلەك نەمەسە سوپاقشا پىشىندەگى جانارتاۋ اۋزىن كورۋگە بولادى، بۇلاردىڭ ەڭ ۇلكەنىنىڭ ەنى 1.6 مەتر، ەڭ كىشكەنەلەرى اتباس بۇرشاقتاي عانا. ايلاردىڭ اۋىسىپ، جىلداردىڭ جىلجۋىمەن ودان گۋىلدەگەن دىبىس شىعىپ، الۋان رەڭدەگى باتپاقتى قويمالجىڭ شىعارىپ جاتادى.

    شيحۋ قالاسىندا تۇراتىن فوتو سۋرەت اۋەسكەرى لۋ يانگۇڭ شاعىن دەمالىس ورايىن قالت جىبەرمەي وسىندا كەلىپ، باتپاقتى جانارتاۋدىڭ وزگەشە گەولوگيالىق عاجايىپ كورىنىسىن تاماشالادى. «شيحۋدىڭ باتپاقتى جانارتاۋى ۇزدىكسىز كوپىرشىكتەنىپ، سىرتىنا بۇرقىلداپ شىعىپ جاتادى ەكەن، مەن بۇل عاجايىپتى بايتاق جەردىڭ تىنىس الۋى دەپ قارادىم، ماعان توتەنشە ءتىلسىم سەزىلدى! تارتقان سۋرەتتەرىمدى ۆيچات دوستىق شەڭبەرىنە شىعارىپ، اناعۇرلىم كوپ دوستاردى باتپاقتى جانارتاۋدىڭ تاماشا كورىنىسىنەن ءلاززاتتاندىرماقشىمىن، سونىمەن بىرگە ءوزىمىز ءومىر ءسۇرىپ جاتقان ۇلى تابيعاتتى ورتاق قورعاۋعا ۇندەيمىن» دەدى ول.

    ۇعىسۋىمىزشا، بۇل باتپاقتى جانارتاۋ جالعان جانارتاۋ دەپ تە اتالادى ەكەن، ودان بۇلكىلدەپ شىعىپ جاتقان باتپاقتى قويمالجىڭ _ جابىسقاق توپىراق، قيىرشىق، تۇز ۇنتاعى سياقتىلاردان قۇرالعان، ءپىشىنى جانارتاۋعا ۇقسايدى، سوندىقتان دا باتپاقتى جانارتاۋ دەپ اتالعان. كاسىپتىك قۇرىلىمداردىڭ حيميالىق ساراپتاۋ ناتيجەسى كورسەتكىشىندە بۇل بالشىقتىڭ قۇرامىندا مىس، يندي، اشۋداس سياقتى كوپ ءتۇرلى ميكرو ەلەمەنتتەر بار بولعاندىقتان، اسا جوعارى فيزيكالىق جولمەن ەمدەۋ، اجارلاندىرۋ جانە عىلمي زەرتتەۋ قۇنىنا يە. بۇل باتپاقتار نەشە مىڭ مەترلىك جەر قاباتىن بويلاپ شىققاننان كەيىن ويپاڭ جەرلەرگە قاراي اعىپ بارىپ، «سايتان كەرىش تاۋى»، «ساعىم تاۋ»، «جانعان تاس» سياقتى عاجايىپ جەر بەدەرىن قالىپتاستىرادى.

    باتپاقتى جانارتاۋ جانارتاۋعا قاراعاندا وتە از، اسىرەسە، توقتاۋسىز بۇلكىلدەپ شىعىپ جاتاتىن قوزعالىستاعى باتپاقتى جانار تاۋ وتە سيرەك كەزدەسەدى، تەك امەريكا، جاڭازەللانديا سياقتى از ساندى مەملەكەتتەردە جانە ەلىمىزدىڭ تايۋان وڭىرىندە بار. ال شيحۋ قالاسىنداعى باتپاقتى جانارتاۋ شوعىرى جۇڭگودان بايقالعان ەڭ كولەمدى باتپاقتى جانارتاۋ شوعىرى بولىپ ەسەپتەلىنەدى ەكەن.

جاۋاپتى رەداكتور: جازيرا بولاتباي قىزى