مەملەكەتتىك ساياسي كەڭەس 13 - كەزەكتى كوميتەتىنىڭ 3 - ءماجىلىسى بەيجيڭدە اشىلدى

  • كەلۋ قاينارى: ىلە گازەتى
  • 02:57:18 23/05/2020

    شي جينپيڭ، لي كىچياڭ، لي جانشۋ، ۋاڭ حۋنيڭ، جاۋ لىجي، حان جىڭ، ۋاڭ چيشان ماجىلىسكە قاتىناسىپ قۇتتىقتادى

    ۋاڭ ياڭ ساياسي كەڭەس تۇراقتى كوميتەتىنىڭ قىزمەتىنەن بايانداما جاسادى، جاڭ چيڭلي باسقاردى، جىڭ جيانباڭ ۇسىنىس جوبا قىزمەتى جاعدايىنان بايانداما جاسادى

    

    شينحۋا اگەنتتىگىنىڭ 5 - ايدىڭ 21 - كۇنى بەيجيڭنەن بەرگەن حابارى. اۋەلگى ماقساتتى ۇمىتپاي، گۇلدەنۋدىڭ ۇلى كۇشىن ۇيىستىرىپ، قول ۇستاسا العا باسىپ، دامۋ ۇلى جوباسىن بىرگە اقىلداسايىق. جۇڭگو حالىق ساياسي ءماسليحات كەڭەسى 13 - كەزەكتى مەملەكەتتىك كوميتەتىنىڭ 3 - ءماجىلىسى 5 - ايدىڭ 21 - كۇنى تۇستەن كەيىن حالىق سارايىندا اشىلدى. بۇل رەتكى ءماجىلىس جاپپاي دوڭگەلەك داۋلەتتى قوعام قۇرۋ نىسانالارىمەن، مىندەتتەرىمەن تىعىز بايلانىستىرا وتىرىپ، مەملەكەتتىك ساياسي كەڭەس مۇشەلەرىن بەلسەندى تۇردە بورىشىن اتقارۋعا، جاۋاپكەرلىگىن ادا ەتۋگە ۇيىمداستىرىپ، كەدەيلىكتەن ارىلتۋدان قامال الۋ شەشۋشى شايقاسىنىڭ شەشۋشى جەڭىسىنە جەتۋگە، جاپپاي دوڭگەلەك داۋلەتتى قوعام قۇرۋعا اقىل - پاراسات جانە كۇش توپتايدى.

    حالىق سارايىنىڭ 10 مىڭ ادامدىق زالىندا شامدار جاقۇتتاي جارقىراپ، زال سالتاناتتى مەرەيگە شومدى. ءتوراعالار مىنبەسى ءتورىنىڭ ورتاسىنا ىلىنگەن جۇڭگو حالىق ساياسي ءماسليحات كەڭەسىنىڭ گەربى جارقىراپ نۇرعا بولەنىپ، ەكى جاعىنا بەستەن نارت قىزىل تۋ قويىلدى.

    مەملەكەتتىك ساياسي كەڭەستىڭ ءتوراعاسى ۋاڭ ياڭ، مەملەكەتتىك ساياسي كەڭەستىڭ ورىنباسار ءتوراعالارى جاڭ چيڭلي، ليۋ چيباۋ، پابالا گىلەلاڭجيە، دۇڭ جيانحۋا، ۋان گاڭ، حى حوۋحۋا، لۋ جانگۇڭ، ۋاڭ جىڭۋي، ما بياۋ، چىن شياۋگۋاڭ، لياڭ جىنيىڭ، شيا باۋلۇڭ، ياڭ چۋانتاڭ، لي بين، باتىر، ۋاڭ يۇڭچيڭ، حى ليفىڭ، سۋ حۇي، جىڭ جيانباڭ، گۋ شىڭزۋ، ليۋ شينچىڭ، حى ۋي، شاۋ حۇڭ، گاۋ يۇنلۇڭ ءتوراعالار مىنبەسىنىڭ الدىڭعى قاتارىنان ورىن الدى.

    پارتيا مەن مەملەكەت باسشىلارىنان شي جينپيڭ، لي كىچياڭ، لي جانشۋ، ۋاڭ حۋنيڭ، جاۋ لىجي، حان جىڭ، ۋاڭ چيشان قاتارلىلار ءتوراعالار مىنبەسىنەن ورىن الىپ، ءماجىلىستىڭ اشىلعاندىعىن قۇتتىقتادى.

    مەملەكەتتىك ساياسي كەڭەس 13 - كەزەكتى كوميتەتىنىڭ 3 - ماجىلىسىنە قاتىناسۋعا ءتيىستى مۇشە 2 مىڭ 151 ادام، ناقتى قاتىناسقانى 2 مىڭ 57 ادام، بۇل بەلگىلەمەدەگى ادام سانىنا ۇيلەسەدى.

    تۇستەن كەيىن ساعات 3 تە جاڭ چيڭلي ءماجىلىستىڭ اشىلعاندىعىن جاريالادى، زالداعىلار تۇگەلدەي ورىندارىنان تۇرىپ، مەملەكەت ءانىن شىرقادى. وسىدان سوڭ ماجىلىسكە قاتىناسقان بارلىق ادام ءبىر مينۋت ءۇنسىز تۇرىپ، جاڭا تيپتى ايدارشا ۆيرۋس وكپە قابىنۋ ىندەتىندە قازا بولعان قۇرباندارعا جانە قايتىس بولعان باۋىرلاستارعا قايعىلى ازا ءبىلدىردى.

    ماجىلىستە الدىمەن ساياسي كەڭەس 13 - كەزەكتى مەملەكەتتىك كوميتەتى 3 - ءماجىلىسىنىڭ كەڭەستىك ءتارتىبى قارالىپ ماقۇلداندى.

    ۋاڭ ياڭ ساياسي كەڭەس 13 - كەزەكتى مەملەكەتتىك كوميتەتى تۇراقتى كوميتەتى اتىنان ماجىلىسكە قىزمەتتەن بايانداما جاسادى.

جاۋاپتى رەداكتور: جازيرا بولاتباي قىزى