ورىس بولكاسىنىڭ ءۇشىنشى ۇرپاق مۇراگەرلەرى جونىندە

  • كەلۋ قاينارى: ىلە گازەتى
  • 03:27:59 24/05/2020

    ۋاڭ جىحۋا (ءوز ءتىلشىمىز)

    

    5 – ايدىڭ 9 – كۇنى - اپەكەلى – سىڭلىلەر ەلينا مەن ليليا ءۇشىن ماڭىزدى ءارى ۇمىتىلماس كۇن بولدى. ويتكەنى وسى كۇنى ولار بار ىنتا – پەيىلدەرىمەن ات سالىسقان ليۆبا ورىس بولكاحاناسى مەن ەلينا شايحاناسى التىشۋار كوشەسىندەگى ورىس سالت – سانا باقشاسىندا رەسمي جۇمىس باستاپ، ءۇش ۇرپاقتان بەرى جالعاسىپ كەلە جاتقان ەرەكشە تاعام ارقىلى وتباسى ءدامىن ايگىلەمەكشى بولدى.

    «شايحانامىزدىڭ ماڭدايشالىعىنىڭ تومەنگى جاعىنا كىشكەنتاي ارىپتەرمەن جازىلعان >بابۋدىڭ ءۇيى< دەگەن جازۋدى كورگەن بولارسىزدار، بۇل ناعاشى اپا دەگەندى بىلدىرەدى، ال بولكاحانامىزدىڭ اتىن شەشەمىزدىڭ اتىمەن ليۆبا دەپ قويدىق، مۇندا ءبىزدىڭ ناعاشى اپامىزعا دەگەن ساعىنىشىمىز، ارمانداعىداي مەكەنگە دەگەن سۇيىسپەنشىلىگىمىز بايلانعان ءارى وسى ۇلتتىق ەرەكشەلىككە يە تاعامدارىمىز ارقىلى اناعۇرلىم كوپ ادامدارعا وتباسىمىزدىڭ ەرەكشە ءدامىن تاتىرماقشىمىز. دۇكەنىمىزدى اشەكەيلەۋ جانە جابدىقتاۋدا بولسىن ءبار – ءبارىن بار ىنتا – پەيىلىمىزبەن جوسپارلاپ، ستول – ورىندىق، تەرەزە پەردە، شىراق، ستاكان سياقتىلاردى دا اسا ۇقىپتىلىقپەن تاڭدادىق، مۇنداعى ماقساتىمىز - ورىس ۇلتىنىڭ قويۋ سالت – ساناسى مەن جانعا جايلى تازالىعىن سەزىندىرۋ» دەپ تانىستىردى ەلينا.

    بولكا - ورىستاردىڭ كۇندەلىكتى تۇرمىسىندا كەم بولسا بولمايتىن ازىقتىعىنىڭ ءبىرى ەسەپتەلىنەدى، ەلينا مەن ليليانىڭ كىشكەنتاي كەزدەرىندە ناعاشى اپاسى مەن شەشەسىنىڭ نان يلەپ، بولكا پىسىرعان بەينەلەرى كۇنى بۇگىنگە دەيىن كوز الدارىنان كەتپەيدى. «ول كەزدە ءبىر مۋ اۋلامىز سامسىعان جەمىس اعاشتارىنا تولىپ تۇراتىن، داۋال شىرماۋىقتان كورىنبەيتىن. ناعاشى اتامىز ەرتە قايتىس بولدى دا، ناعاشى اپامىز بىزبەن بىرگە تۇرمىس كەشىردى. ول تىم ەڭبەكشىل ەدى، المانى جۋىپ تازالاپ ءدامى ءتىل ۇيىرەتىن ۋارينا جاسايتىن، شىرماۋىقتى كەپتىرىپ الىپ، ونى اشىتقى رەتىندە پايدالاناتىن، اس ۇيدەگى قاقتاما پەشتەن جاڭادان پىسىپ شىققان ءدامدى بولكانىڭ ءيىسى مۇرىندى جاراتىن. اۋلامىزداعى الما، المۇرت، شاپتول سياقتى جەمىس اعاشتارى ناعاشى اپامنىڭ شاي جاساۋداعى العاشقى ماتەريالدارى بولاتىن، قويۋ كۇرەڭ جەمىس شايىنىڭ، كوپىرشىكتەنە تاسىپ تۇراتىن كاۆاسىنىڭ، ءدامى ءتىل ۇيىرەتىن بالسوقتاسىنىڭ ءدامى كۇنى بۇگىنگە دەيىن تاڭدايىمىزدا. شەشەم 1952 – جىلى دۇنيەگە كەلگەن ەكەن، ول دا ناعاشى اپام سياقتى وتە ەڭبەكشىل جان ەدى. كوكتەم سايىن ۇيلەردى اكتەپ، گۇل ەگەتىن، ءتۇرلى ۋارينالار جاسايتىن. ىمىرت ۇيىرىلە ءبىر ءۇيلى جان ءۇزىم سورەسى استىندا باس قوسىپ، ءيىسى بۇرقىراعان بولكانى جەپ شاي ىشەتىنبىز.

جاۋاپتى رەداكتور: جازيرا بولاتباي قىزى