كوپتەگەن تاراۋ قۇلجا قالاسىنداعى شاعىن تۇرعىندار رايونىنىڭ ٴورت ٴوشىرۋ اۆتوموبيلى جولدارىن قايتالاي تەكسەردى

  • كەلۋ قاينارى: ىلە گازەتى
  • 03:23:59 27/05/2020

    ٴتىلشىمىز سۇن ي - نان حابارلايدى. 5 - ايدىڭ 14 - كۇنى كەشتە وبلىستىق شۇعىل جاعدايعا توتەپ بەرۋدى باسقارۋ مەكەمەسى، وبلىستىق ءورت ءوشىرۋ مەكەمەسى جانە قۇلجا قالالىق ءورت ءوشىرۋ، قاتىناس، اماندىق قورعاۋ سياقتى تاراۋلاردان ۇيىمداسقان 20 نەشە ادامدىق بىرلەسىپە زاڭ اتقارۋ اترەتى قۇلجا قالاسىنداعى ءبىر ءبولىم شاعىن تۇرعىندار رايونىن تۇتقيىل تەكسەرىپ، بايقالعان ماسەلەلەردى ناق مايداندا ءبىر جاقتى ەتتى. تەكسەرۋ بارىسىندا كەيبىر تۇرعىندار شاعىن رايونىندا «تىرشىلىك ارناسىنا» ءمان بەرمەۋ، الباتى اۆتوموبيل توقتاتۋ جاعدايى ءالى دە ورىن تەۋىپ وتىرعانىن بايقاعان، تەكسەرۋ گرۋپپاسى ەرەجەگە قايشىلىق جاساعان اۆتوموبيل يەلەرىنە ناق مايداندا سىن – تاربيە جۇرگىزدى ءارى قاتىستى جازا قولداندى.

    «ٴار دارەجەلى ۇكىمەت ‹تىرشىلىك ارناسىن› اشۋ ارناۋلى وڭاۋ - رەتتەۋ ارەكەتىنە ەجەلدەن باسا ٴمان بەرىپ كەلەدى، ٴبىر جاعىنان ۇكىمەت باس بولىپ ۇيىمداستىرىپ، ٴتۇيىندى وڭىرلەردى، ماسەلەسى اۋىر وڭىرلەردى يگەردى؛ ەندى ءبىر جاعىنان، ءورت ءوشىرۋ تاراۋلارى رايونعا ءبولىپ باقىلاپ، ۇدايىلانعان تەكسەرۋ جۇرگىزىپ، وبلىسقا توتە قاراستى اۋدان - قالالاردىڭ كەزەكتەگى ٴورت ٴوشىرۋ اۆتوموبيل جولىن يەمدەنىپ الۋ جاعدايىن جاپپاي اداقتاپ، سوڭعى مەزگىلدەگى جاپپاي ىشكەرىلەي جونگە سالۋعا جاقسى نەگىز قالادى» دەدى وبلىستىق ٴورت ءوشىرۋ، قۇتقارۋ تارماق اترەتى ورتتەن ساقتانۋدى باقىلاۋ باسقارماسىنىڭ جاۋاپتىسى جاڭ ۋيچياڭ.

    «ٴورت ٴوشىرۋ اۆتوموبيل ارناسىنىڭ ىركىلىسسىزدىگى حالىق بۇقاراسىنىڭ ٴومىرى مەن مال ـ مۇلىك حاۋىپسىزدىگىنە قاتىستى، بۇگىن ٴبىز بەلگىلەمەگە قايشى اۆتوموبيل توقتاتقان كولىك يەلەرىنە سىن – تاربيە جۇرگىزدىك جانە ناق مايداندا جازالادىق. قالا تۇرعىندارىنىڭ قاتىناس زاڭ - ەرەجەلەرىنە قاتاڭ بويسۇنۋىن، مەيلى جولدا نەمەسە شاعىن تۇرعىندار رايونىندا بولسىن، اۆتوكولىكتەرىن بەلگىلەمە بويىنشا توقتاتۋلارىن ءۇمىت ەتەمىز» دەدى قۇلجا قالالىق قوعام حاۋىپسىزدىگى مەكەمەسى قاتىناس ساقشى ۇلكەن اترەتى 2 ـ تارماق اترەتىنىڭ حالىق ساقشىسى دي گۋاڭۋىن.

    ۇعىسۋعا قاراعاندا، «تىرشىلىك ارناسىن» اشۋ ارناۋلى وڭاۋ قيمىلى ورىستەتىلگەننەن بەرى وبلىسقا توتە قاراستى اۋدان - قالالار تۇرعىندار شاعىن رايونى، الەۋمەتتىك ورىندار سياقتى جەرلەردەگى ءورت ءوشىرۋ اۆتوموبيل جولى جاعدايىنا ىشكەرىلەي تەكسەرۋ جۇرگىزگەن، سونىمەن بىرگە، اشكەرەلەۋ، اشكەرەلەۋدى قابىلداۋ سياقتى تاسىلدەر ارقىلى بۇقارانىڭ «تىرشىلىك ارناسىنا» نازار اۋدارۋى مەن قورعاۋ تانىمىن جوعارىلاتقان. كەزەكتەگى تەكسەرۋ احۋالىنان قاراعاندا، تۇرعىنداردىڭ شاعىن رايونداعى ٴورت ٴوشىرۋ اۆتوموبيلى جولىنا نازار اۋدارۋ دارەجەسى ۇزدىكسىز جوعارىلاعان، قوجالىق تاراۋلارى ٴورت ٴوشىرۋ اۆتوموبيلدەرىنىڭ جول بەلگىلەرىنە سىزىق سىزىپ باسقارۋدا ٴبىرشاما جاقسى ناتيجەگە قول جەتكىزىپ، شاعىن رايون تۇرعىندارىنىڭ اۆتوموبيلدى بەلگىلەمە بويىنشا توقتاتۋ تانىمى ايتا قالسىن جاقسارعان.

جاۋاپتى رەداكتور: جازيرا بولاتباي قىزى