تەكەس اۋدانى كاسىپتەندىرۋدە «شاعىن تيجارات كولىگىن» شارۋالارعا سيعا تارتتى

  • كەلۋ قاينارى: ىلە گازەتى
  • 03:55:54 29/05/2020

   ٴتىلشىمىز جاڭ جينفىڭ تەكەستەن حابارلايدى. «قوجايىن، پالاۋ اكەلىڭىز»، «جارايدى!». 5 ـ ايدىڭ 24 ـ كۇنى تەكەس اۋدانىنىڭ كونە ورتالىق قاتىناس بەكەتىندەگى جايما قوجايىنى تۇرعان قۇربانجان مەن ايەلى قاربالاستىققا ٴتۇستى. قايشالىسقان قاريدارلار ەكى ساعاتقا جەتكىزبەي ٴبىر قازان پالاۋدى تاۋسىپ ۇلگىردى. بۇگىن ول تەك پالاۋ ساتقاننان 400 يۋان اقشا تاپتى.

    تۇرعان - ءشيلى وزەك قالاشىعى قوبى قىستاعىنىڭ تۇرعىنى، 2014 ـ جىلى ول ارحيۆتەستىرىلىپ، كارتوچكالاندىرىلعان كەدەي وتباسى دەپ تۇراقتاندىرىلعان، باعىمشىلىقتى دامىتۋ جانە سىرتتا جۇمىس ىستەۋ ارقىلى 2018 ـ جىلى كەدەيلىكتەن ارىلعان.

    تۇرعان قۇلشىنا ۇيرەنەتىن، 2019 ـ جىلدىڭ باسىندا قىستاقتا اشىلعان شەبەرلىك كۋرسىنا قاتىناسادى ٴارى جۇڭگوشا اسپازدىق كۋالىگىن الادى. بىلتىر 6 ـ ايدا قىستاق تۇرعىندار كوميتەتى وعان جابىق تيجارات كولىگىن اقىسىز ۇسىندى. ۇسىنىلعان كولىك سارعىش بولعاندىقتان شارۋالار ونى «سارعىش تيجارات كولىگى» دەپ اتادى. كونە قاتىناس بەكەتىندە جايما اشىپ پالاۋ، لاڭمان ساتقان ول 4 ايدا 40 مىڭ يۋاننان استام كىرىس كىرگىزدى.

    تۇرعان: «بيىل 3 ـ ايدىڭ 21 ـ كۇنىنەن باستاپ جايما اشتىم، ساياحاتشىلاردان سىرت، جول جوندەۋشىلەر دە بار، كوپتەگەن جۇك اۆتوموبيل شوفەرلەرى دا وسى ارادان تاماقتانادى، بيىل تاعى تاڭەرتەڭگى تاعامدى قوستىم، ساۋدامنىڭ بۇدان كەيىن ٴتىپتى دە جاقسى بولاتىنىنا سەنىمدىمىن» دەدى.

    جۇك اۆتوموبيلىنىڭ شوفەرى ەرلان ابىلحان ۇلى: «3 – ايدىڭ 17 ـ كۇنىنەن باستاپ وسى ارادا جول جوندەۋدەمىز. بۇرىن تاماقتانۋ قولايسىز ەدى، جۇك ماشينا اۋدان ورتالىعىنا كىرە المايدى، تەك كىرە كولىككە وتىرىپ باراتىنبىز. قازىر بەكەت بار، ارناۋلى كولىك توقتاتۋ الاڭى قۇرىلدى. تاماقتانۋ، كولىك توقتاتۋ قولايلى بولدى، ۋاقىت ۇنەمدەلدى.بۇل جەردەگى تاعامداردىڭ ٴدامى، ٴتۇرى، باعاسى ايتارلىقتاي. كوپشىلىك بۇل اراعا كەلۋگە قۇشتار» دەدى.

    ۇعىسۋعا قاراعاندا، كونە ورتالىق قاتىناس بەكەتى قوبى قىستاعىنا ورنالاسقان، اۋدان ورتالىعىنان 7.5 كيلومەتر قاشىقتىقتا ەكەن. تولىقسىز ساناققا قاراعاندا، ساياحات ماۋسىمىندا كۇنىنە 2 مىڭنان استام ۇلكەندى - كىشىلى اۆتوموبيل قاتىنايتىن كورىنەدى. بىلتىر قىستاق تۇرعىندار كوميتەتى ءوتىنىش ەتۋ ارقىلى 50 مۋ جەرگە كولىك توقتاتۋ الاڭىن، ساياحات دارەتحاناسىن سالىپتى، 5 - ايدان باستاپ، اۋداندىق ادام كۇشى بايلىعى جانە قوعامدىق قامتاماسىزداندىرۋ مەكەمەسى بۇل قىستاقتاعى شارۋالاردى كاسىپتەندىرۋگە 8 تيجارات كولىگىن بەرىپ، ارحيۆتەستىرىلىپ، كارتوچكالاندىرىلعان 20 كەدەي وتباسىنى جەرگىلىكتى ەرەكشە ٴونىم ساتۋ، دۇكەن، اسحانا اشۋعا جۇمىلدىرىپ، 5 ايداعى تيجارات كىرىسىن 40 مىڭ يۋاننان اسىرىپتى.

    ءشيلى وزەك قالاشىعى ساياسي ـ زاڭ كوميتەتىنىڭ ورىنباسار شۋجيى قاناتبەك دالەلقان ۇلى: «قوبى قىستاعىنان سىرت، قالاشىقتا اتتىڭ تاۋى قىستاعى، ورتا مىس قىستاعىندا كولىك تۇراعى سالىنعان، 20 تيجارات كولىگى بار. قازىر ارحيۆتەستىرىلىپ، كارتوچكالاندىرىلعان 60 كەدەي وتباسىنىڭ كاسىپتەنىپ، كەدەيلىكتەن ارىلىپ اۋقاتتانۋى جۇزەگە استى. بۇدان كەيىن تيجارات كولىگى ايالداماسىنا حالىقتىق تۇسەلحانا، مونشا، كولىك جۋۋ ورىندارى سالىنىپ، اۋىل ـ قىستاق ساياحاتى بارىنشا دامىتىلىپ، جول بويىنداعى تۇرعىنداردىڭ ساياحاتپەن اۋقاتتانۋىنا مۇمكىندىك جاراتىلادى» دەدى.

جاۋاپتى رەداكتور: جازيرا بولاتباي قىزى