گى شىڭلي گۇل تەڭىزىن قازىناعا اينالدىردى

  • كەلۋ قاينارى: ىلە گازەتى
  • 03:35:11 30/06/2020

 

    ٴتىلشىمىز يان ليڭ

 

    تاۋ بوكتەرىندەگى نەشە مىڭ مۋ جەرگە ەگىلگەن جۇپار ءشوپتىڭ جايقالعان كورىنىسى تارتىمدى گۇل تەڭىزىن قالىپتاستىرعان، كۇلگىن گۇلدەر سامالدىڭ تەربەۋىمەن اسەم گۇل تولقىنىن كوز الدىڭىزعا اكەلەدى. 6 – ايدىڭ 20 ـ كۇنى ٴتىلشى قورعاس اۋدانى لۋساگۋ قالاشىعى سىگۇڭ قىستاعىندا جول بويىنان سىرتتان كەلگەن اۆتوكولىكتەردىڭ ٴتىزىلىپ تۇرعانىن، جۇپار ءشوپ ەگۋشى ٴارى جۇپار ءشوپ ساياحاتىن جۇرگىزۋشى گى شىڭليدىڭ قاربالاستىقپەن كوپشىلىكتى قابىلداپ جاتقانىن كوردى.

    گى شىڭلي بيىل 50 جاستا، بيڭتۋان 4 ـ ديۆيزيا 65 ـ تۋانى 8 ـ ليانىندە تۇرادى، ورتا بويلى، قارا دومالاق، مايكى سىرتىنان تريكە شاپان كيگەن، توتىعىپ بىلەۋلەنگەن بىلەكتەرىنەن ونىڭ قاراپايىم دا سالاماتتى ەكەنى مەنمۇندالايدى. ول 1997 ـ جىلى 6 ـ ايدان باستاپ جۇپار ءشوپ ەگە باستاعان، 20 جىلدان استام ۋاقىتتان بەرى 20 مۋلىق جۇپار ءشوپ ەگىلگەن جەر اۋماعىن قازىرگى نەشە ٴجۇز مۋعا جەتكىزىپ، شارۋاشىلىق قوجاسىنا، كورىنىس ساياحاتى كاسىبىنىڭ تيجاراتشىسىنا اينالعان، جاقىن جىلدان بەرى جىلدىق كىرىسى 300 مىڭ يۋاننان اسقان.

    قورعاس اۋدانى فرانسيانىڭ پروۆانسىمەن، جاپونيانىڭ حوككايدو رايونىمەن ۇقساس ەندىكتە، دۇنيەدەگى ٴۇش ۇلكەن جۇپار ءشوپ ەگۋ بازاسىمەن بىردەي «جۇڭگونىڭ جۇپار ءشوپ مەكەنى». بۇل اراداعى جۇپار ءشوپتىڭ رەڭى كوركەم، حوش ٴيىستى، ساپاسىندا ايتار جوق. گى شىڭليدىڭ ايتۋىنشا جۇپار ءشوپ ونى اۋقاتتاندىرعان قازىنا ەكەن.

    1998 – جىلى 6 ـ ايدا گى شىڭلي جۇپار ءشوپ كەپتىرىپ جۇرگەندە فۋجيان ولكەسىنەن كەلگەن ٴبىر قوناق ونىڭ جۇپار ءشوپ مايىن العان بولاتىن. بۇرىن ساتىپ كورمەگەندىكتەن كوڭىلىندە ەشتەڭە جوق ول باتىلدىقپەن ەكى ساۋساعىن كورسەتىپ، ەكى ٴجۇز يۋان ەكەنىن بىلدىرگەن. فۋجياندىق قوناقتىڭ كيلوسى 2 مىڭ يۋان دەپ ويلارىن كىم ويلاعان، ناق مايداندا 8 مىڭ يۋان شىعارىپ 4 كيلو ماي العان. ول كەزدە 8 مىڭ يۋان قوماقتىلاۋ بولعاندىقتان، گى شىڭلي نە ىستەرىن بىلمەي اڭتارىلعان. سودان باستاپ ول جۇپار شوپپەن اۋقاتتانۋدىڭ جولىن تاپتى.

    جۇپار ءشوپتىڭ مايىن، كەپتىرىلگەن گۇلىن ساتۋدان سىرت گى شىڭلي جۇپار ءشوپ كوشەتىن دە ساتادى. 2009 ـ جىلى 12 ـ ايدا ٴبىر سىچۋاندىق ساۋداگەر جۇپار ءشوپ ساياحاتى ٴوندىرىس باقشاسىن اشپاق بولىپ، گى شىڭليدى ىزدەپ جۇپار ءشوپ كوشەتىن الادى. گى شىڭلي وعان تۇڭعىش توپتاعى جۇپار ءشوپ كوشەتىن ساتقاننان كەيىن جۇپار ءشوپ ەگۋدى باسقارۋ تەحنيكاسىن دا ۇيرەتەدى. 2 ـ جىلىندا بۇل ساۋداگەر ەككەن جۇپار ءشوپ كوشەتتەرى بۇكىلدەي كوكتەپ شىعادى. بىرنەشە جىلدا ول ساۋداگەر گى شىڭليدان 40 – 50 مىڭ ٴتۇپ جۇپار ءشوپ كوشەتىن الادى. تەك جۇپار ءشوپ كوشەتىن ساتۋدان گى شىڭلي نەشە ميلليون يۋان اقشا تابادى.

جاۋاپتى رەداكتور: گۇلدەن ماقسات قىزى