قۇلجا اۋدانى كوپ ٴتۇرلى شارانى قاتار اتقارىپ، ەگىستىكتىڭ سۋارىلۋىنا كەپىلدىك ەتىپ، شارۋالاردىڭ كىرىستى ارتتىرۋىن جەبەدى

  • كەلۋ قاينارى: ىلە گازەتى
  • 09:00:40 04/07/2020

  

    ٴتىلشىمىز گو جۇن، ەرىكتى ٴتىلشى لي مەي حابارلايدى. بيىلعى جازدا ىلە اڭعارىنىڭ تەمپەراتۋراسى جوعارى، جاۋىن - شاشىن مولشەرى از بولىپ، كوپ جەرلەردە قۋاڭشىلىق جاعدايى بەلەڭ بەردى. قۇلجا اۋدانى اۆتونوميالى رايوننىڭ، اۆتونوميالى وبلىستىڭ تاسقىننان ساقتانۋ، قۋاڭشىلىققا توتەپ بەرۋ قىزمەتى جونىندەگى ءبىر تۇتاس ورنالاستىرۋى بويىنشا، كوپ ٴتۇرلى شارانى قاتار اتقارىپ، ەگىندى سۋارۋدى قامتاماسىزداندىرىپ، قۋاڭشىلىق جاعدايىنىڭ ىقپالىن مۇمكىندىكتىڭ بارىنشا تومەندەتىپ، شارۋالاردىڭ كىرىسىن ارتتىرۋعا مۇمكىندىك جاراتتى.

    جىرعالاڭ وزەنى قۇلجا اۋدانى وڭىرىندەگى ماڭىزدى وزەن، سۋ مولشەرى اۋدان وڭىرىندەگى 6 اۋىل - قالاشىقتىڭ 11 قىستاعىنداعى 35 مىڭ مۋ ەگىستىك جەردىڭ سۋارىلۋىنا تىكە قاتىستى. قۋاڭشىلىق سالدارىنان جىرعالاڭ وزەنىنىڭ سۋ مولشەرى كورنەكتى ازايدى.

    قۇلجا اۋداندىق سۋ ىستەرىن باسقارۋ باس پۋنكتىنىڭ باستىعى لي يۇيلي تانىستىرىپ بىلاي دەدى: «بىلتىرعى ۇقساس مەزگىلدەگىمەن سالىستىرعاندا، بيىل جىرعالاڭ وزەنىنىڭ سۋ مولشەرى جارىم ەسە ازايدى. بۇل جاعدايعا توتەپ بەرۋ ٴۇشىن، سۋ ىستەرىن باسقارۋ باس پۋنكتى وزەن ارناسىن ارشۋ ارقىلى سۋ باستاۋ مولشەرىن ارتتىرۋمەن بىرگە، وزەن سۋىن ءبىر جىلعاعا نەمەسە ەكى جىلعاعا جيناپ، اعىن كولەمىن شوعىرلاندىرىپ، سۋدىڭ بۋلانۋىن ازايتتى. سونىمەن بىرگە، اۋىل - قىستاق بۇقاراسىن سۋ ناسوسىن ساتىپ الىپ قۋاڭشىلىققا توتەپ بەرۋگە شابىتتاندىرىپ، شۇعىل جاعدايعا توتەپ بەرۋ دايىندىعىن جاقسى ىستەدى، قازىرگە دەيىن 46 سۋ ناسوسى ازىرلەنىپ بولدى».

    6 - ايدىڭ 20 - كۇنى قۇلجا اۋداندىق سۋ ىستەرى تاراۋلارىنىڭ قىزمەتكەرلەرى ۋگۇڭ اۋىلى ياڭشۇي پۋنكتى تەحنيكتەردى ۇيىمداستىرىپ، ناسوس جابدىقتارىن جوندەۋ قارقىنىن جەدەلدەتتى. ۋگۇڭ اۋىلىنىڭ ياڭشۇي سۋ شىعارۋ پۋنكتى ىسكە قوسىلعاننان كەيىن جاستار توعانىنىڭ سۋىن حالىق توعانىنىڭ تارماق توعاندارىنا تولىقتاپ، حالىق توعانىنىڭ تارماق توعاندارىنان قامدالاتىن 6 اۋىل، 11 قىستاقتىڭ سۋ جەتىسپەۋ ماسەلەسىن شەشۋگە بولادى ەكەن.

    ۋگۇڭ اۋىلى جوعارعى ۋگۇڭ قىستاعىنىڭ ەگىنشىسى جۋ جيانشين بيىل 30 مۋ جەرگە جۇگەرى ەككەن ەدى، سول كۇنى قىستاقتىڭ ٴبىر تۇتاس ورنالاستىرۋى بويىنشا سۋارۋ رەتى ونىڭ جۇگەرى اتىزىنا كەلگەن. جۋ جيانشين ەرتە كەلىپ، اتىز باسىندا توسىپ تۇردى، سۋ باسقارۋشى تەلەفون سوعىپ، ونىڭ سۋارۋىنا بولاتىنىن ۇقتىرعان سوڭ ول ەگىنىن سۋارۋعا كىرىسىپ، كوڭىلى ورنىقتى.

    قىستاقتاعى ەگىستىك جەردى سۋارۋعا كەپىلدىك ەتۋ ٴۇشىن، جوعارعى ۋگۇڭ قىستاعى قىستاق تۇرعىندارىن كەزەكپەن سۋارۋعا ۇيىمداستىرۋمەن بىرگە، قۋاڭشىلىققا قارسى تۇرۋ، شۇعىل جاعدايعا توتەپ بەرۋ دايىندىق قىزمەتىن ەرتە باستان جاقسى ىستەدى. جوعارعى ۋگۇڭ قىستاعىنىڭ ٴبىرىنشى شۋجيى نيجات ابدۇقادىر: «سولتۇستىك تاۋ ەتەگىنە ورنالاسقان جوعارعى ۋگۇڭ قىستاعىندا جەر جىرتۋ مەن سۋارۋ ءىسى ءبىرشاما كۇردەلى، بيىل قىستاق ەڭ الدىمەن بۇقارانىڭ جاعدايىن ۇعىسىپ، جوعارى مەن تومەن سايكەسىپ، كىمنىڭ ەگىستىك جەرىندە قۋاڭشىلىق اۋىر بولسا، الدىمەن سول جەردى سۋارۋ ءتۇزىمىن اتقاردى. سونىمەن بىرگە قىستاق تاعى دا 3 سالەركە ناسوسى جانە ءبىر سۋ شىعارۋ ناسوسى، 2 كيلومەترلىك سۋ سورعىش سياقتى شۇعىل جاعدايعا توتەپ بەرۋ جابدىقتارىن دايىنداپ، ەگىستىكتىڭ اپاتقا ۇشىراۋىنان ساقتانۋ قىزمەتىن ىستەۋدە» دەدى.

جاۋاپتى رەداكتور: گۇلدەن ماقسات قىزى