پىڭ چاڭجين ءاربىر كەدەي وتباسىنا مۇمكىندىكتىڭ بارىنشا كومەكتەستى

  • كەلۋ قاينارى: ىلە گازەتى
  • 08:56:02 04/07/2020

 

    تىلشىلەرىمىز حى رۇڭ، ۋاڭ جۋان حابارلايدى. 6 – ايدىڭ 8 – كۇنى كەنەتتەن اۋا رايى بۇزىلىپ، بوران سوعا باستادى. قۇلجا قالاسى پانجيم قالاشىعى تومەنگى ءپانجيم قىستاعىنىڭ بيىل 66 جاستاعى تۇرعىنى پىڭ چاڭجين اسىعىس ۇيدەن شىعىپ، كوشە، ۇيلەردى ارالاپ، كوكونىس ەگەتىن ءار ۇلت اۋىلداستارىنا سالىستىرمالى بيىك وسەتىن كوكونىستەردى بوراننىڭ قيراتىپ كەتۋىنەن ساقتاۋدى ەسكەرتتى. «وسىنداي قۇبىلمالى اۋارايىنىڭ وسى كەزدەگى ءونىم الۋىمىزعا اسەر ەتۋىنەن ساقتانۋىمىز كەرەك» دەدى پىڭ چاڭجين. مۇنداي قاربالاس ءارى تاۋسىلىپ بەرمەيتىن تۇرمىس كۇيبەڭىنە ول الدە قاشان كوندىگىپ كەتكەن - دى.

    1972 – جىلى تۋعان جەرى سىچۋان ولكەسىنەن كەلگەن پىڭ چاڭجيننىڭ ىلەدە تۇرعانىنا دا مىنەكي 50 جىلعا تايادى. جۋىقتاعى 20 نەشە جىلدان بەرى پىڭ چاڭجين كوكونىس ەگۋمەن اينالىسىپ، ەگىمشىلىكتى دەن قويا زەرتتەۋ جانە امالياتتا سىناقتان وتكىزۋ ارقىلى قۇلجا قالاسىنا العاش كەلگەندەگى قوڭىر – قالتا تۇرمىستان ارىلىپ، قازىر جىلدىق كىرىسى نەشە 100 مىڭ يۋانعا جەتەتىن اۋقاتتى شاڭىراق يەسىنە اينالدى. كىرىسىنىڭ ارتۋىنا ىلەسە ونداعى ءبىر كورنەكتى وزگەرىس - العاشىندا سىچۋان اكسەنتىن ارالاستىرىپ سويلەيتىن ول جەرگىلىكتى ورىنداعى ءار ۇلت تۇرعىندارىمەن قويۋ دوستىق ورناتىپ، ۇيعۇر تىلىندە كىدىرمەي سويلەيتىن بولدى. «كوكونىس ەگۋ ارقىلى تۇرمىسىم جاقساردى. پارتيا مۇشەسى ءارى قۇلجا قالالىق حالىق قۇرىلتايىنىڭ ۋاكىلى بولۋ تۇرعىسىنان مەن كەدەيلىكتەن ارىلتۋدان قامال الۋعا تيەسىلى ۇلەس قوسىپ، ءتىپتى دە كوپ اۋىلداستاردى اۋقاتتانۋ جولىنا باستايمىن» دەدى پىڭ چاڭجين.

    6 – اي - اشىق اتىزداعى كوكونىس قاۋىرت وسەتىن مەزگىل، سونداي – اق، پىڭ چاڭجين ەڭ قاربالاس بولاتىن كەز، ول ءوزىنىڭ كوكونىس اتىزىن ويداعىداي باپتاۋمەن بىرگە، اينالاداعى قىستاق تۇرعىندارىنىڭ اتىزعا اشىق كوكونىس ەگۋىنە بەلسەنە كومەكتەستى. ونىڭ باستاماشىلىعىندا تومەنگى ءپانجيم قىستاعىنداعى تۇرعىنداردىڭ اشىق اتىزعا كوكونىس ەگۋ بەلسەندىلىگى جوعارىلاپ، كىرىسى دە جىل سايىن ارتىپ وتىردى. 2014 – جىلى كوكونىس ەگىمشىلىگىنىڭ اۋماعىن كەڭەيتىپ، كولەمدەندىرۋ ءۇشىن پىڭ چاڭجين ءوزى باستاماشى بولىپ، چاڭجين كوكونىس ەگىمشىلىگى كاسىپتىك كووپەراتيۆىن قۇردى. 2015 – جىلدان باستاپ ول كووپەراتيۆتىڭ مۇشەلەرىنە، وتباسىندا قيىنشىلىعى بار قىستاق تۇرعىندارىنا جىلىنا ورتا ەسەپپەن 100 مىڭ تۇپتەن استام كوكونىس مايساسىن تەگىن تاراتىپ كەلەدى.

    ءار جىلى 5 – ايدا پىڭ چاڭجين قىستاق تۇرعىنى حالمامەت ابدۇرەشيتتىڭ ۇيىنە بارىپ، ونىڭ كارتوپ ەگۋىنە كومەكتەسەدى. 2013 – جىلى قىستاقتا كوكونىس سەلبەستىك كووپەراتيۆى قۇرىلدى، پىڭ چاڭجين ۇنەمى حالمامەت ابدۇرەشيتتىڭ ۇيىنە بارىپ، ونىڭ ەگىمشىلىك جۇمىسىنا جەتەكشىلىك ەتىپ، ەكەۋى اعا – باۋىرداي بولىپ كەتتى.

    حالمامەت ابدۇرەشيت كىشكەنە كەزىندە مەرتىگىپ سودان مۇگەدەك بولىپ قالعان، وتباسى كەدەي. 2014 – جىلى ول 14 مۋ جەرگە كارتوپ ەگىپ، باپتاۋ ويداعىداي بولماعاندىقتان، ءبىر ءبولىم كارتوپ اتىزدا ءشىرىپ كەتكەن. پىڭ چاڭجين بۇدان حاباردار بولعان سوڭ وعان 2 مىڭ يۋان اقشا بەرىپ، ساپالى تۇقىم الىپ، تولىقتاپ ەگۋگە ءناسيحاتتادى. حالمامەت ابدۇرەشيت بىلاي دەدى: «بىرنەشە جىلدان بەرى پىڭ ۇستاز ماعان كوپ كومەكتەستى، وعان شىنايى العىس ايتامىن».

جاۋاپتى رەداكتور: گۇلدەن ماقسات قىزى