بەيدوۋ جۇڭگونىڭ سولتۇستىگىندەگى مالشىلاردىڭ «بۇلانكوزىنە» اينالدى

  • كەلۋ قاينارى: ىلە گازەتى
  • 04:17:56 05/08/2020

   

    شينحۋا اگەنتتىگىنىڭ ءتىلشىسى يۇي جيا 8 - ايدىڭ 1 - كۇنى كوكحوتتان حابارلايدى. جۇڭگونىڭ سولتۇستىگىندەگى ۇلان - بايتاق ىشكى موڭعۇل ساحاراسىنداعى مالشىلار مال سوڭىنان ەكى ەلى اجىراماي ىلەسە باعاتىن ءداستۇرلى قاساڭ قاعيداعا قوش ايتىپ، بەيدوۋ جۇيەسى ارقىلى وزگەشە مال باعۋ ارناسىنا قاراي بەت الدى. بەيدوۋ جاساندى سەرىك جول نۇسقاۋ جۇيەسىنىڭ زەردەلى مال باعۋ قولدانىلمالى تەحنيكاسىنان پايدالانعان مالشىلار ۇيىندە وتىرىپ - اق مال باعا بەرەتىن بولدى.

    وردوس قالاسى يجينحولو قالاشىعى شابارتايگاشاداعى موڭعۇل مالشى اۋتىگىنجىرعالا 60 نەشە سيىرىن 3 تابىنعا ءبولىپ، شالعايداعى جايلاۋعا باعادى. 50 جاستاعى اۋتىگىنجىرعالا بۇرىنعىداي مال تابىنىنا ەرىپ، ورىسكە تەپەڭدەمەيتىن بولدى، ءتىپتى 10 نەشە كيلومەتر شالعايداعى اتىزدىققا ەككەن جۇگەرىنىڭ دە ءوسۋ جاعدايىن ۇيدە وتىرىپ - اق بىلە بەرەدى.

    « مىنە وسىلايشا <بەيدوۋ> مال باعۋ جۇيەسىنىڭ راقاتىن كورىپ مال سوڭىنان سالپاقتامايتىن بولدىم، قولىم دا بوساپ قالعاندىقتان 30 مۋ جەردى كوتەرمەگە الىپ، ەگىمشىلىكپەن دە شۇعىلدانۋىما مۇمكىندىك بولدى» - دەدى اۋتىگىنجىرعالا.

    ول ايتقان «بەيدوۋ» مال باعۋ جۇيەسى سيىر موينىنا تاعىلاتىن «بەيدوۋ» مويىنشاعى جانە قول تەلەفون نەمەسە تاقتايشا كومپيۋتەردەگى ۋيچات باعدارلاماسىنان قۇرالعان ەكەن. ٴتىلشى قارا ءتۇستى «بەيدوۋ» مويىنشاعىنداعى سيليندىر قوندىرعىعا سەگىنال تاراتۋ جانە قابىلداۋ قوندىرعىسى ورناتىلعانىن؛ مويىنشاقتاعى كۇن ەنەرگيالى باتەريا تاقتاسىنىڭ قوندىرعىنى جەتكىلىكتى ەنەرگيامەن قامدايتىندىعىن، وسى مويىنشاقتىڭ سالماعى نەبارى 0.2 كيلوگرام كەلەتىندىگىن كوردى.

    مالشىلار جىلجىمالى تەرمينالدان ۋيچات باعدارلاماسىن قوزعاعاننان كەيىن، ەكراننان سيىردىڭ تۇرعان جاعىراپيالىق ورنىن كورە الادى، مىنە بۇل بەيدوۋ جاساندى سەرىك جول نۇسقاۋ جۇيەسىنىڭ ورىن بەلگىلەۋ يقۋاتىمەن جۇزەگە اسقان.

    ىلگەرتىندە بۇل جۇيەنىڭ جاڭا يقۋاتى دا تىڭنان مولايىپتى. ەكراننان «بەيدوۋ جاساندى سەرىك ىقپالداستىعى» تەتىگىن تاڭداساڭىز، «بەينە كەسكىن فورماسىندا سيىردى بىردەن كورە الادى ەكەنسىز».

    «مال فەرمامىزدا جەر ءتۇزىلىسى بيىكتەۋ جەرگە جوعارى تۇنىقتىقتاعى ۇزىن فوكۋستى كامەرا ورناتتىق، كورۋ ارالىعى 7.5 كيلومەترگە جەتەدى. ەكراندا «بەيدوۋعا» كەسكىندى مەڭگەرۋى ارقىلى سيىردى كورۋ بۇيرىعىن تۇسىرسەڭىز، كامەرا سيردىڭ تۇرعان ورنىنا تۋرالانادى دا، ناق مايدان سۋرەتىن لەزدە جولداپ بەرەدى. يجينحولوشۇنداعى «بەيدوۋ» مال باعۋ جۇيەسىن جالپىلاستىرۋعا تەحنيكالىق جاقتان جەتەكشىلىك ەتەتىن ارناۋلى قىزمەتكەرى چاۋ لۋ بىلاي دەدى: «جوعارىداعىلار بەيدوۋ جاساندى سەرىك جول نۇسقاۋ جۇيەسىنىڭ قىسقا حابار - بايلانىس يقۋاتىن پايدالانعان».

جاۋاپتى رەداكتور: گۇلدەن ماقسات قىزى