قۇلجا اۋدانىنىڭ تۇيە ٴسۇتى پاراشوگىن مانەرلەۋ كاسىپ تىزبەگى ەگىنشىلەر ارمانىن جۇزەگە اسىرۋعا كومەكتەستى

  • كەلۋ قاينارى: ىلە گازەتى
  • 03:34:10 01/09/2020

    قازىرگى جاعدايىن تىلگە تيەك ەتكەن نۇرلان قۋانىشپەن: «7 جىلدىڭ الدىندا مەن تۇيە باعىمشىلىعىن 18 تۇيە باعۋدان باستاعام، قازىر 90 نەشەگە جەتكىزدىم. العاشىندا باسقالارعا ۇقسامايتىن وزگەشە ٴبىر كاسىپتى دامىتۋدى ويلادىم. وسى ەكى جىلدا بازاردىڭ وسىنشاما كۇسەت بولارىن ويلاماعان ەكەنمىن، سونىمەن تاماشا ورايدى قولدان جىبەرمەي قۇلشىنىس جاساۋ ارقىلى وتباسىمدى باياشات تۇرمىسقا كەنەلتتىم» دەدى. وعان باعىمشىلىق تەحنيكاسىن تەز يگەرتۋ ءۇشىن، قىستاق پەن قالاشىق پارتيا مەن مەملەكەتتىڭ ابزال ساياساتىمەن ۇشتاستىرىپ، ارناۋلى ادام جىبەرىپ باعىمشىلىق تەحنيكاسىن ۇيرەتتى؛ ونىڭ ۇستىنە ول قۇلشىنا ۇيرەنىپ، تۇيە باعىمشىلىعىمەن شۇعىلدانعانىنا ۇزاق بولعان قىستاق تۇرعىندارىنان ۇنەمى كىشىپەيىلدىكپەن ۇيرەنىپ، تۇيە باعۋ تەحنيكاسىن تەز ارادا يگەردى.

    30 نەشە بوتادان سىرت، نۇرلاننىڭ 60 تۇيەسىنەن جىلىنا 30 تۇيە ساۋىلادى. تۇيە ٴسۇتىنىڭ كيلوگرامى 35 يۋان، ءبىر تۇيە ورتا ەسەپپەن كۇنىنە ەكى كيلوگرام شاماسىندا ٴسۇت بەرەدى. ونىڭ ٴۇيى كۇنىنە 60 نەشە كيلوگرام ٴسۇت ساۋادى، ٴسۇت ونىمدەرى سەرىكتىگى ٴۇش كۇندە ٴبىر رەت كەلىپ تۇيە ٴسۇتىن ساتىپ الادى ەكەن. نۇرلان: «مەن تەك تۇيە باعۋ، تۇيە ساۋۋ جۇمىستارىن ويداعىداي ىستەسەم بولدى، باسقالارىنان الاڭداۋىمنىڭ قاجەتى جوق، ءبىر جىلدىق تازا كىرىسىم 400 – 500 مىڭ يۋانعا جەتەدى، مول كىرىس مەنىڭ تۇيە باعۋ ويىمدى ونان ارى بەكەمدەي ءتۇستى. سوڭعى مەزگىلدە مەن باعىمشىلىق كولەمىن ۇزدىكسىز كەڭەيتىپ، تۇيە سانىن 200 ـ 300 گە دەيىن ارتتىرۋدى ويلاستىرۋدامىن» دەدى.

    نۇرلان جاراسۋ قىستاعىنداعى تۇيە باعىمشىلىعىمەن ەڭ ەرتە شۇعىلدانعان قىستاق تۇرعىنى ەمەس، ونىڭ ۇيىنە تاياۋ جەردەگى سەرىك راحىمەتجان ۇلى وسى قىستاقتاعى تۇيە باعىمشىلىعىمەن ەڭ ەرتە شۇعىلدانعان قىستاق تۇرعىنى. 12 جىلدىڭ الدىندا، سەرىك پەن ايەلى مال باعۋ، كوكونىس ساتۋ ارقىلى كۇنەلتەتىن، تالاي جىل باسقالاردىڭ تىرشىلىك جاعدايىن باعامداعان ول تۇيە باعىپ، ٴسۇتىن ساتۋعا بەكيدى. سونىمەن ول تۇيە باعىمشىلىعىن العاشقى 5 تۇيەدەن باستاپ، باعىمشىلىققا جىل سايىن قارجى قوسىپ، 90 نەشە تۇيەگە جەتكىزىپ، بىلتىر 20 نەشە تۇيە ساتىپتى. قازىر ول 20 - 30 تۇيە ساۋادى ەكەن. «العاشىندا تۇيە ٴسۇتىن جاقسى ساتا المادىق. ول كەزدە ادامدار تۇيە ٴسۇتىنىڭ قورەكتىك قۇنىن تولىق بىلە بەرمەيتىن، قازىر جاقسى بولدى، جازدا ٴبىر كيلوگرام تۇيە ٴسۇتى ەڭ جوعارى بولعاندا 70 - 80 يۋانعا دەيىن ساتىلادى، مەنىڭ جەتەكشىلىگىمدە قازىر جاراسۋ قىستاعىنداعى تۇيە باعىمشىلىعىمەن شۇعىلداناتىن 3 وتباسىنداعى تۇيە سانى 200 گە جۋىقتادى» دەدى سەرىك.

    سول كۇنى تىلشىلىك بارىسىندا، ىلە قارعالداق ٴسۇت شارۋاشىلىعى شەكتى سەرىكتىگىنىڭ ٴسۇت ساتىپ الۋشىلارىنا جولىقتىق. ىلە قارعالداق ٴسۇت شارۋاشىلىعى شەكتى سەرىكتىگىنىڭ باس ديرەكتورى جاڭ جىڭشياڭ تانىستىرىپ: «قازىر ىلە اڭعارىندا شامامەن 3 مىڭ تۇيە بار، كۇنىنە 10 توننا تۇيە ٴسۇتى جينالادى. سەرىكتىگىمىزدىڭ تۇيە ٴسۇتىن كۇندىك مانەرلەۋ قۋاتى 30 - 50 توننا، سوندىقتان ءبىز التاي، تارباعاتاي سياقتى جەرلەردەن تۇيە باعىمشىلىعى بازاسىن قۇرىپ، سەرىكتىكتىڭ مانەرلەۋ، ٴوندىرۋ نىساناسىن قاناعاتتاندىرماقشىمىز» دەدى.

جاۋاپتى رەداكتور: گۇلدەن ماقسات قىزى