ونەرلى جىگىت وردە وزار

  • كەلۋ قاينارى: ىلە گازەتى
  • 03:54:03 09/09/2020

    ٴتىلشى 9 ـ ايدىڭ 1 ـ كۇنى قۇلجا اۋدانى اۋليە جاستار رايونىنىڭ يليبور اۋلا ەگىنشىلىگى الاڭىنان مىڭ مۋدان اساتىن ەگىنشىلىك الاڭىنىڭ جەرى ويلى ـ شۇڭقىر، تابيعاتى بولەك ەكەنىن، شەتىندە 100 مۋ ٴجۇزىم باعى بار ەكەنىن كوردى. ەگىنشىلىك الاڭىنىڭ قوجايىنى ۋاڭ جيانجۇن ٴجۇزىمىن كوتەرىپ، داعدىلى داۋىسىمەن شاقىرعاندا شوجەلەر دەدەكتەگەن بويى ونى قورالاي ۇيمەلەپ، قولىنداعى جۇزىمگە ۇمتىلدى.

    48 جاستاعى ۋاڭ جيانجۇن وسى ەگىنشىلىك الاڭىن 2014 ـ جىلى قۇرعان. ۋاڭ جيانجۇن: «ارمانىم اۋدانداعى ەڭ جاقسى اۋلا ەگىس الاڭىن سالۋ ەدى، بۇل ورماندى القاپتى ٴتورت رايونعا بولگەم، ٴبىرىنشى رايونىنداعى 480 مۋ جەردە 32 ٴتۇرلى كورىنىستىك اعاش بار، سانى 400 مىڭنان اسادى، سونداي ـ اق ورمان باعىمشىلىعىن دامىتىپ، بيىل 4 مىڭنان استام قاز، 5 مىڭنان استام تاۋىق باقتىم» دەدى.

    ەكىنشى رايونداعى 330 مۋدان ارتىق جەرگە جوعارى سورتتى جەمىس كۇڭلۇڭدان ەگۋ ۋاڭ جيانجۇننىڭ ۇزاقتان بەرى ويىنا تۇيگەن ەگىنشىلىك نىسانى ەكەن. ٴۇشىنشى رايونى ٴجۇز مۋداي الحور، جابايى قارا ورىك جانە 100 مۋ ٴجۇزىم ەگىلگەن جەر ەكەن. ٴتورتىنشى رايوندا بۇرىنعى قۇرىلىستاردى وزگەرتىپ سەرۋەنشىلەردىڭ پايدالانۋىنا ۇلەستىرىپتى، ٴبىرتالاي جەرىنە ٴتۇرلى كوكونىستەر دە ەگىپتى.

    ۋاڭ جيانجۇن شوعىرلى ەگۋ، باعۋ، تەرۋ، دەمالۋ ٴبىر تۇلعالانعان كوپ يقۋاتتى ەگىس الاڭىن قۇرۋدى جوسپارلاپ، توڭىرەكتەگى جۇرتشىلىقتى جۇمىستاندىرىپ، كىرىس ارتتىرۋعا جەتەكشىلىك ەتپەكشى ەكەن.

    قۇلجا اۋداندىق يليبور وتباسى ەگىنشىلىك الاڭى قۇلجا اۋدانىنىڭ تەرىستىك تاۋ بوكتەرىندە، ورمان شارۋاشىلىعىنا توتەنشە ۇيلەسەدى. ۋاڭ جيانجۇن بۇل ارانىڭ تابيعي شارت ـ جاعدايىن بايقاعاننان كەيىن 6 جىلدا وتباسى ەگىنشىلىك الاڭىنىڭ سۇلباسى قالىپتاسىپ، شەگىرشىن، ۇيەڭكى، جازدىق ەمەن سياقتى ٴتۇرلى كورىنىستىك اعاش قالامشالارى بۇل اراعا تامىر تارتىپ، وسە باستاپتى. ورماندى بەلدەۋدەن ويداعىداي پايدالانعان ۋاڭ جيانجۇن ساڭىراۋقۇلاق تەكتەس وسىمدىكتەردى دە ەگەدى. «جەر ـ تاۋسىلماس قازىنا، ىڭعايىن تاپساڭ قىرۋار بايلىققا كەنەلتەدى، جەر مەنىڭ ارمانىمدى جۇزەگە اسىرادى، سونداي – اق ٴوز قۇنىمدى ايگىلەۋمەن بىرگە جۇرتشىلىقتى دا اۋقاتتانۋعا باستاۋىما بولادى» دەدى ۋاڭ جيانجۇن.

    ۋاڭ جيانجۇن: «كەلەر جىلى تاعى بالاپان جەتىلدىرۋ بازاسىن سالماقشىمىن، بۇلاي ىستەگەندە ىشكى ولكەدەن بالاپان اكەلمەيمىز، ٴبىر ٴبولىم قارجى ۇنەمدەلەدى، سونداي ـ اق جەرگىلىكتى شارۋالاردى جاقىن ماڭدا كاسىپتەندىرۋگە جەتەكشىلىك ەتۋىمە بولادى. قازىر ەگىنشىلىك الاڭىندا ۇزاق ىستەگەن 20 دان ارتىق جۇمىسكەر بار، ەگىن قاربالاستىعىندا، ٴتىپتى، كوبەيەدى. ٴار ادامنىڭ ايلىق ەڭبەكاقىسى 3 مىڭ يۋاننان اسادى» دەدى.

    ۋاڭ جيانجۇن: «كوپ ٴىس تىندىردىم، تاعى توڭازىتۋ قويماسىن سالۋدى جوسپارلاپ قويدىم، ەگىنشىلىك الاڭىنداعى جەمىس تۇرلەرىن ساقتاپ، ىشكى ولكەدەگى ەگىنشى وتباسىلارمەن سەلبەسىپ، ىشكى ولكە مەن ىلەنىڭ ساپالى جەمىس ـ جيدەكتەرىن ٴوزارا الماستىرۋ، كاسىپتى كەڭەيتىپ، جۇمىسشى سانىن ارتتىرۋ ويىندامىن» دەدى.

جاۋاپتى رەداكتور: گۇلدەن ماقسات قىزى