كۇنەس اۋدانىنىڭ جوعارى ٴونىمدى ۇنەمدەپ سۋارۋ نىسانىندا قۇرىلىس جەدەل جۇرگىزىلۋدە

  • كەلۋ قاينارى: ىلە گازەتى
  • 03:40:51 11/09/2020

    8 - ايدىڭ 31 - كۇنى ٴتىلشى كۇنەس اۋدانى زەكتى قالاشىعى اقشي قۇرىلىس ورنىندا جۇمىسشىلاردىڭ كەيبىرەۋى سۋ ناسوسى بولمەسىن جاساپ، كەيبىرەۋى سۋ كولشىگىنىڭ سۋ توسقىش قاقپاسىنىڭ ۇزىنى مەن ەنىن ولشەۋمەن قاربالاس بولىپ جاتقانىن كوردى. سۋ ناسوسى بولمەسىنىڭ داۋالى ءۇش مەتر بيىكتىكتە قالانعان، جۇمىسشىلار بەتون سوعىپ جاتىپتى. قۇرىلىس جۇرگىزۋشى جاقتىڭ تانىستىرۋىنا قاراعاندا، 8 - ايدىڭ 27 - كۇنىنەن بەرى 11 جۇمىسشى وسى ارادا جۇمىس ىستەپ جاتىپتى. قازىر ۇزىندىعى 71 مەتر، كەڭدىگى 15.2 مەتر، بيىكتىگى 3 مەتر كەلەتىن سۋ ساقتاۋ كولشىگى سالىنىپ بولىپ، سوڭعى مەزگىلدە تيەك سياقتى جابدىقتار ورناتىلىپ بولعان سوڭ، 60 شارشى مەترلىك سۋ ناسوسى بولمەسىنىڭ قۇرىلىس جۇمىسى تامامدالادى ەكەن.

    ۇعىسۋعا قاراعاندا، اقسۋ قىستاعىندا 308 وتباسى، 5 مىڭ 500 مۋ ەگىستىك جەر بار ەكەن. قازىر 3 سۋ ۇنەمدەپ سۋارۋ كولشىگى مەن 3 سۋ ناسوسى بولمەسى سالىنىپ، بۇعان 6 ميلليون يۋان قارجى قوسىلعان. نىساننىڭ اتقارىلۋى جەرگىلىكتى ورىنداعى 30 نەشە قىستاق تۇرعىنىنىڭ كاسىپتەنۋ ماسەلەسىن شەشكەن. قىستاق تۇرعىنى ما جيانگو وتباسىندا بەس ادام بار، بيىل ءوزىنىڭ 10 مۋ جەرىن باسقالارعا ءار مۋىن 770 يۋاننان كوتەرمەگە بەرىپ، ءوزى قۇرىلىس ورنىنداعى جۇمىسشىعا اينالدى. ٴار كۇنى 150 يۋان كىرىس كىرگىزەدى، تەك وسى سۋ ۇنەمدەپ سۋارۋ نىسانىنان 6 مىڭ يۋان اينالاسىندا كىرىس كىرگىزەدى ەكەن.

    اقشي قىستاعىنىڭ ٴبىرىنشى شۋجيى، پارتيا ياچەيكاسىنىڭ شۋجيى چىن شياۋچۋان: ‹‹بۇل قىستاقتىڭ جوعارى ٴونىمدى سۋ ۇنەمدەپ سۋارۋ نىسانى بيىل 5 - ايدىڭ 9 - كۇنى قۇرىلىس باستاعان - دى، سۋ ناسوسى بولمەسى مەن سۋ ساقتاۋ كولشىگى سالىنۋدان سىرت، 9 - ايدا ەگىنشىلەر داقىلدارىن جيىپ بولعان سوڭ اتىزعا سۋارۋ قۇبىر تورىن ورناتادى. مەجەمەن 10 - ايدىڭ سوڭىندا تامامدايدى. نىسان قولدانىسقا بەرىلگەن سوڭ جەردى اينالىمعا سالۋ قاراجاتى مەن ەگىس داقىلدارىنىڭ ءونىمىن جوعارىلاتۋعا بولادى›› دەدى.

    بەستوبە اۋىلى باتباقتى قىستاعى دا 5 مىڭ مۋ جەردە جوعارى ٴونىمدى سۋ ۇنەمدەپ سۋارۋ نىسانىن اتقارىپ، بۇعان 6 ميلليون يۋان قارجى قوسىلعان، مەجەمەن بيىل سۋ ساقتاۋ كولشىگى، سۋ ناسوسى بولمەسى، قۇبىر تورابى سياقتى نەگىزدىك قۇرىلعىلار قۇرىلىسى تامامدالادى ەكەن.

  

جاۋاپتى رەداكتور: گۇلدەن ماقسات قىزى