وبلىسقا توتە قاراستى ورىنداردا كۇزگى ەگىس ٴوندىرىسى ٴتارتىپتى ورىستەتىلدى

  • كەلۋ قاينارى: ىلە گازەتى
  • 03:31:27 25/09/2020

 

    ٴتىلشىمىز دۋ لەي حابارلايدى. بيىل اۆتونوميالى رايون وبلىسقا توتە قاراستى ورىندارعا ٴبىر ميلليون 70 مىڭ كۇزدىك ٴبيدايدىڭ تەجەم كورسەتكىشىن مىندەتتەدى، قازىر وبلىسقا توتە قاراستى ورىنداردا كۇزگى ەگىس قىزمەتى ٴتارتىپتى ورىستەتىلۋدە. 9 – ايدىڭ 22 – كۇنىنە دەيىن چاپچال سىبە اۆتونوميالى اۋدانى، توعىزتاراۋ اۋدانى، كۇيتۇن قالاسى، كۇنەس اۋدانى سياقتى جەرلەردە كۇزدىك ٴبيداي ەگۋ قىزمەتى ارت – ارتىنان ورىستەتىلىپ، 48 مىڭ 200 مۋ جەرگە ەگىن ەگىلدى، مەجە بويىنشا اۋدان – قالالار 9 – ايدىڭ سوڭىنا دەيىن ەگىس قىزمەتىن كەڭ كولەمدى ورىستەتىپ، 11 – ايدىڭ 10 – كۇنىنەن بۇرىن كۇزگى ەگىس قىزمەتى مىندەتىن ورىنداپ بولادى.

    9 – ايدىڭ 21 – كۇنى ٴتىلشى چاپچال اۋدانى قاۋىنشى اۋىلى جاڭاتام قىستاعىنىڭ تۇرعىنى بالتاباي ەرالى ۇلىنىڭ ەگىس اتىزىنان ٴىرى تۇرپاتتى تراكتوردىڭ سەيالكامەن اتىزدا ەگىن ەگىپ جاتقانىن كوردى. «اۋا رايىنا بايلانىستى ٴبىزدىڭ بۇل جەردە ٴار جىلعى كۇزگى ەگىس ٴوندىرىسى ٴبىرشاما ەرتە جۇرىلەدى، بۇگىن 40 مۋ جەرگە كۇزدىك ٴبيدايدى ەگىپ بولامىز» دەدى بالتاباي.

    ۇعىسۋعا قاراعاندا، قاۋىنشى اۋىلى وبلىسقا توتە قاراستى ورىندارداعى كۇزگى ەگىس ٴوندىرىسى ەڭ ەرتە جۇرىلەتىن اۋىل ەكەن، بيىل تۇتاس اۋىل بويىنشا 15 مىڭ مۋ جەرگە كۇزدىك ٴبيداي ەگۋ جوسپارلانىپ، 9 – ايدىڭ 2 – كۇنىنەن باستاپ كۇزگى ەگىس ٴوندىرىسى باستالىپ، قازىرگە دەيىن اۋىل بويىنشا 10 مىڭ مۋ جەرگە ەگىن ەگىلىپ بولعان. بۇل اۋىل ەگىس جۇمىسىنىڭ الدى – ارتىندا وتكەلدى قاتاڭ يگەرىپ، ەرتە دايىندالىپ، ەرتە ەگىپ، مىندەتتى ەرتە ورىنداعان، اۋداندىق اۋىل شارۋاشىلىعى جانە اۋىل – قىستاق مەكەمەسىنىڭ سايكەستىرۋىندە اۋىل شارۋاشىلىق ماتەريالدارىن ساتۋ سياقتى تاراۋلارمەن ٴبيداي تۇقىمى، حيميالىق تىڭايتقىش، ٴدارى ارالاستىرىلعان تۇقىم، ەگىس ٴدارىسى سياقتى اۋىل شارۋاشىلىق ماتەريالدارىن تاسىمالداۋ، جەتكىزۋ قىزمەتىن الدىن – الا ويداعىداي كەلىسكەن.

    سونىمەن بىرگە، كۇزدىك ٴبيداي تۇقىمىنا ٴدارى ارالاستىرىپ ەگۋ تەبىنىن كۇشەيتىپ، زياندى جاندىكتەردەن ساقتانۋ قىزمەتىن شىنايى ويداعىداي ىستەگەن.

    بالتاباي بىلاي دەدى: «بيىل وتباسىمىز جازعى استىقتى ساتىپ الۋ كەزىندە تاعى دا مول كىرىس كىرگىزدى، قوسىلعان قارجىنى شىعارىپ تاستاعاندا ٴار مۋ جەردەن 500 يۋاننان كىرىس كىرگىزدىك. بۇدان تىس، مەملەكەت ٴار مۋ جەرگە 220 يۋاننان ەگىستىك جەردى قورعاۋ قوسىمشا قاراجاتىن بەردى، وسىلايشا، ٴار مۋ جەردەن تۇسەتىن كىرىس 700 يۋاننان استى. بۇل رەتكى كۇزگى ەگىس كەزىندە دە ٴبىز تاعى دا الدىن – الا سورتتى تۇقىم ساتىپ الدىق، كەلەر جىلى تاعى دا مول ٴونىم الۋعا نيەتتىمىز».

    چاپچال اۋداندىق اۋىل شارۋاشىلىعى جانە اۋىل – قىستاق مەكەمەسىنىڭ ەگىنشىلىك مامانى ى حىڭبياۋدىڭ تانىستىرۋىنشا، بيىل چاپچال اۋدانى ەگىس كەزىندە ورايدى مىقتى يگەرىپ، كۇزدىك دۇمبە ٴبيداي ەگۋ قىزمەتىن بەلسەنە ويداعىداي ىستەپ، 305 مىڭ مۋ جەرگە كۇزدىك دۇمبە ٴبيداي ەگۋ قىزمەتىن جاپپاي ورىستەتىپ، 10 – ايدىڭ سوڭىنان بۇرىن كۇزگى ەگىس قىزمەتىن ورىنداۋدى جوسپارلاعان.

جاۋاپتى رەداكتور: جازيرا بولاتباي قىزى