قورعاس كەشەندى باجىسىز اۋماعى بەكىتىلدى

  • كەلۋ قاينارى: شينجياڭ گازەتى تورى
  • 08:28:59 06/10/2020

 

    گازەتىمىزدىڭ جالپىلىق اقپارات قۇرالدارى ءتىلشىسى چىن چياڭۋي 10 - ايدىڭ 4 - كۇنى قورعاستان حابارلايدى. جۋىقتا مەملەكەتتىك كەڭەس جۇڭگو - قازاقستان قورعاس حالىقارالىق شەكارا سەلبەستىك ورتالىعى جۇڭگو جاق سايكەستى ءوڭىرىن قورعاس كەشەندى باجىسىز اۋماعى ەتىپ بىرىكتىرىپ ساپالىلاندىرۋعا قوسىلۋ جونىندە رەسمي بۇرىشتاما جاۋاپ قايتاردى. وسىلايشا، شينجياڭداعى كەشەندى باجىسىز اۋماق 4كە كوبەيدى.

    2006 - جىلى مەملەكەتتىك كەڭەس جۇڭگو - قازاقستان قورعاس حالىقارالىق شەكارا سەلبەستىگى ورتالىعىن قۇرۋعا، سونىمەن بىرگە جۇڭگو جاقتىڭ شەكاراسى ىشىندە، شەكارا سەلبەستىگى ورتالىعىنا تاياۋ جەردە جۇڭگو جاقتىڭ سايكەستى ءوڭىرىن قۇرىپ، ونى شەكارا سەلبەستىگى ورتالىعىنىڭ دامۋىنا تىرەك بولاتىن كاسىپ سالاسى بازاسى ەتۋگە قوسىلعان ەدى.

    وسى رەتكى بىرىكتىرىپ ساپالىلاندىرۋدا، قورعاس كەشەندى باجىسىز اۋماعىنىڭ جوباداعى جەر اۋدانى 3.61 شارشى كيلومەتر بولىپ، جيىنى ەكى بولىككە ءبولىندى، ورىن ابزالدىلىعى جانە ساياساتتىق ابزالدىلىقپەن ۇشتاستىرىلىپ، باجىسىز وڭدەۋ، باجىسىز زات اينالىمى، باجىسىز قىزمەت كورسەتۋ سياقتى كاسىپتەر دامىتىلادى.

    قورعاس باجىسىز اۋماعىن تەكسەرىپ وتكىزىپ الۋ تولىمدى بولعاننان كەيىن، ۇزدىكسىز جۇڭگو - قازاقستان قورعاس حالىقارالىق شەكارا سەلبەستىگى ورتالىعى جۇڭگو جاق سايكەستى اۋماعى ەتىلەدى، سونداي - اق قازىر اتقارىلىپ وتىرعان كەشەندى باجىسىز اۋماققا قاتىستى باجى الۋ جانە شەتەل اقشاسىن باسقارۋ ساياساتتارىنان يگىلىكتەنەدى. مۇنان تىس، زاڭ، زاڭ ەرەجە جانە قازىر اتقارىلىپ وتىرعان ساياساتتاردا باسقا دا بەلگىلەنگەندەرىنەن سىرت، شەكارا سىرتىنداعى زاتتار اۋماققا كىرگەندە باجىسىز بولۋ مەن باجىسى كەشىرىم ەتىلۋدەن يگىلىكتەنەدى؛ زاتتار اۋماقتان شىعارىلىپ، شەكارا ءىشى اۋماعىنان سىرت جەردە ساتىلسا زاتتاردى يمپورت ەتۋدىڭ قاتىستى بەلگىلەمەلەرى بويىنشا كەدەنگە مالىمدەۋ راسمياتتارى بىتىرىلەدى ءارى زاتتىڭ ءىس جۇزىندىك جاعدايى بويىنشا باجى الىنادى، مۇنىڭ ىشىندە وندىرىلگەن، مانەرلەنگەن زاتتاردان سايكەستى يمپورت ەتىلگەن ماتەريالدار بويىنشا كەدەن باجىسى الىنادى؛ شەكارا ءىشى اۋماعىنان سىرت جەردەگى زاتتار اۋماققا كىرگىزىلسە، ەكسپورت ەتىلگەنمەن بىردەي سانالىپ، باجى قايتارۋ ىسكە اسىرىلادى؛ اۋماق ىشىندەگى كاسىپورىندار اراسىنداعى زاتتار ايىرباسىنان ارتقان قۇن سالىعى مەن تۇتىنۋ سالىعى الىنبايدى.

    ”تەكسەرىپ وتكىزىپ الۋ تولىمدى بولعاننان كەيىن، قورعاس كەشەندى باجى اۋماعىندا جۇڭگو جاق سايكەستى اۋماعىنىڭ ساياساتى اتقارىلۋمەن بىرگە، كەشەندى باجىسىز اۋماقتىڭ قاتىستى ساياساتتارى بىردەي اتقارىلادى. سول كەزدە بۇل ارا رايونىمىزداعى ساياساتتىق ابزالدىلىق ەڭ كورنەكتى كەشەندى باجىسىز اۋماققا اينالادى“، - دەدى ءۇرىمجى كەدەنى كاسىپورىن باسقارۋ جانە تەكسەرۋ باسقارماسىنىڭ ورىنباسار باستىعى جاڭ جۇن.

    قازىر شينجياڭدا الاتاۋ ساعاسى كەشەندى باجىسىز اۋماعى، ءۇرىمجى كەشەندى باجىسىز اۋماعى، قورعاس كەشەندى باجىسىز اۋماعى (جۇڭگو - قازاقستان قورعاس حالىقارالىق شەكارا سەلبەستىگى ورتالىعى جۇڭگو جاق سايكەستى اۋماعى)، قاشقار كەشەندى باجىسىز اۋماعى سياقتى 4 باجىسىز اۋماق بار.

جاۋاپتى رەداكتور: گۇلدەن ماقسات قىزى