شي جينپيڭ چاۋشيان ەڭبەك پارتياسى قۇرىلعاندىعىنىڭ 75 جىلدىعى بايلانىسىمەن جين جىڭىنعا قۇتتىقتاۋ تەلەگرامماسىن جولدادى

  • كەلۋ قاينارى: ىلە گازەتى
  • 03:40:22 13/10/2020

 

    شينحۋا اگەنتتىگىنىڭ 10 - ايدىڭ 10 - كۇنى بەيجيڭنەن بەرگەن حابارى. 10 - ايدىڭ 10 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ چاۋشيان ەڭبەك پارتياسى قۇرىلعاندىعىنىڭ 75 جىلدىعى بايلانىسىمەن چاۋشيان ەڭبەك پارتياسىنىڭ كوميتەت باستىعى جين جىڭىنعا قۇتتىقتاۋ تەلەگرامماسىن جولدادى.

    شي جينپيڭ قۇتتىقتاۋ تەلەگرامماسىندا بىلاي دەدى: چاۋشيان ەڭبەك پارتياسى قۇرىلعاندىعىنىڭ 75 جىلدىعى ساتىندە مەن جۇڭگو كوممۋنيستىك پارتياسى ورتالىق كوميتەتى اتىنان ءارى ءوز اتىمنان كوميتەت باستىعى جولداستى ءارى ءسىز ارقىلى چاۋشيان ەڭبەك پارتياسى ورتالىق كوميتەتىن، بۇكىل چاۋشيان ەڭبەك پارتياسىنىڭ مۇشەلەرىن جانە چاۋشيان حالقىن قىزۋ قۇتتىقتايمىن، سونداي - اق ىزگى تىلەك تىلەيمىن.

    شي جينپيڭ بىلاي دەپ اتاپ كورسەتتى: چاۋشيان ەڭبەك پارتياسى داڭقتى دا ۇزاق توڭكەرىستىك داستۇرگە يە، 75 جىلدىق شۇعىلالى تاريحي بارىستا چاۋشيان حالقىن ەرلىكپەن كۇرەسۋگە، ەكپىندەي ىلگەرىلەۋگە ىنتىماقتاستىرىپ، باستاپ، مەملەكەتتىڭ دەربەستىگى مەن حالىقتىڭ ازاتتىعىن جۇزەگە اسىرىپ، سوتسياليزم ىستەرىنىڭ ۇلى جەتىستىكتەرگە قول جەتكىزۋىن جەبەدى. جۋىرداعى جىلداردان بەرى كوميتەت باستىعى جولداس باس بولعان چاۋشيان ەڭبەك پارتياسى ورتالىق كوميتەتىنىڭ پارمەندى باسشىلىعىندا، چاۋشيان پارتياسى مەن حالقى سوتسياليزم جولىمەن مىزعىماستان ءجۇرىپ، پارتيا قۇرىلىسىن جانە ەكونوميكالىق قىزمەتتى كۇش سالا كۇشەيتىپ، ءبىر نيەتپەن ىنتىماقتاسىپ ءتۇرلى قيىنشىلىقتار مەن سىن - سايىستارعا توتەپ بەرىپ، سىرتقا قاراتىلعان بارىس - كەلىستى، سەلبەستىكتى بەلسەندىلىكپەن ورىستەتىپ، ءبىرقىدىرۋ ماڭىزدى تابىستارعا قول جەتكىزدى. جولداس جانە دوس رەتىندە، ءبىز بۇعان شىن كوڭىلدەن قۋانامىز. كوميتەت باستىعى جولداس باس بولعان چاۋشيان ەڭبەك پارتياسى ورتالىق كوميتەتىنىڭ پارمەندى باسشىلىعىندا چاۋشيان پارتياسى مەن حالقىنىڭ، ءسوز جوق، كۇش ۇستىنە كۇش قوسىپ، قۇلشىنا ورگە ۇمتىلىپ، چاۋشياننىڭ سوتسياليزم ىستەرىن ۇزدىكسىز العا ىلگەرىلەتىپ، چاۋشيان ەڭبەك پارتياسىنىڭ 8 - قۇرىلتايىنىڭ جەڭىسپەن اشىلۋىن تاماشا ناتيجەمەن قارسى الاتىندىعىنا سەنەمىن.

    شي جينپيڭ بىلاي دەپ باسا دارىپتەدى: جۇڭگو - چاۋشيان ەكى ەل تاۋ - وزەندەرى جالعاسقان دوس كورشىلەر، ەكەۋى دە كوممۋنيستىك پارتيا باسشىلىعىنداعى سوتسياليستىك ەلدەر. ەكى پارتيانىڭ، ەكى ەلدىڭ اعا بۋىن باسشىلارى ءوز قولىمەن نەگىزىن قالاعان جانە زەر سالا جەتىلدىرگەن جۇڭگو - چاۋشيان ءداستۇرلى دوستىعىنىڭ تامىرى تەرەڭ، ءتۇبىرى بەرىك، ۋاقىت وتكەن سايىن بەكەمدەلە ءتۇستى، بارىنشا قاستەرلەۋگە تاتيدى. جۋىرداعى جىلداردان بەرى مەن كوميتەت باستىعى جولداسپەن كوپ رەت ءديدارلاسىپ، ەكى پارتيانىڭ، ەكى ەلدىڭ قارىم - قاتىناسىن بەكەمدەۋ جانە دامىتۋ جونىندە كوپتەگەن ماڭىزدى ورتاق تانىمدارعا كەلىپ، جۇڭگو - چاۋشيان قارىم - قاتىناسىنىڭ جاڭا تاريحي تاراۋلاردى باستاۋىنا جەتەكشىلىك ەتتىك. قازىر دۇنيە جۇزىندە 100 جىلدا بولماعان زور وزگەرىس پەن جاڭا تيپتى ايدارشا ۆيرۋس وكپە قابىنۋ ىندەتى قاباتتاسىپ، حالىقارالىق جانە وڭىرلىك جاعدايدا كۇردەلى دە تەرەڭ وزگەرىستەر تۋىلۋدا. ءبىز چاۋشياندىق جولداستارمەن بىرگە، جۇڭگو مەن چاۋشياننىڭ قارىم - قاتىناسىن ويداعىداي قورعاپ، ويداعىداي بەكەمدەپ، ويداعىداي دامىتىپ، ەكى ەلدىڭ سوتسياليزم ىستەرىنىڭ ورنىقتى قاداممەن الىسقا جەتۋىن ىلگەرىلەتىپ، ەكى ەلگە جانە ەكى ەل حالىقىنا اناعۇرلىم كوپ باقىت جاراتىپ، ءوڭىردىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن جۇزەگە اسىرۋعا تىڭ دا بەلسەندى ۇلەس قوسۋدى قالايمىز. چاۋشيان ەڭبەك پارتياسىنىڭ ۇزدىكسىز دامۋىن، چاۋشياننىڭ سوتسياليزم ىستەرىنىڭ گۇلدەنۋىن، كوركەيۋىن تىلەيمىز!

جاۋاپتى رەداكتور: گۇلدەن ماقسات قىزى