قۇلجا اۋدانىنىڭ نان كاسىبى باقشاسىندا 2 مىڭنان استام ادام جۇمىستاندى

  • كەلۋ قاينارى: ىلە گازەتى
  • 04:07:48 14/10/2020

 

    ءتىلشىمىز گو جۇن، ەرىكتى ءتىلشى لي مەي قۇلجادان حابارلايدى. تاياۋدا جالپى 30 ميلليون يۋاننان استام قارجى قوسىلعان قۇلجا اۋدانىنىڭ نان كاسىبى باقشاسى رەسمي وندىرىسكە قوسىلدى، «1 ـ قازان» دەمالىسىندا بۇل ارانىڭ ساۋداسى كۇسەتتەندى.

    10 ـ ايدىڭ 5 ـ كۇنى ٴتىلشى قۇلجا اۋدانىنىڭ نان كاسىبى باقشاسىنىڭ ٴوندىرىس ـ مانەرلەۋ رايونىنا بارعاندا، ولشەمدەنگەن ٴوندىرىس سەحتارىنىڭ كەڭ دە جارىق، تاتتانبايتىن بولاتتان جاسالعان جۇمىس تەكشەسىنىڭ تازا دا رەتتى ەكەنىن كوردى. اق ٴتۇستى قىزمەت كيىمىن كيگەن جۇمىسشىلار جۇمىس ٴبولىسى بويىنشا قاربالاستىققا تۇسكەن. كەيبىرەۋى قامىر يلەپ، كەيبىرەۋى نان جاساپ، كەيبىرەۋى قوسپا ماتەريال دايىنداۋدا، ال، ەڭ قىزىعارلىعى ەلەكتر توناردىڭ الدىندا تۇرىپ، التىنداي جارقىراعان، حوش ٴيىسى اڭقىعان نان پىسىراتىن ناۋبايلار ەدى.

    وتباسىنداعىلاردىڭ ءتىپتى دە جاقسى تۇرمىس كەشىرۋىنە مۇمكىندىك جاساۋ ٴۇشىن، بيىل 31 جاستاعى ناۋباي احمەت وسمان حوتان ايماعىنىڭ گۇما اۋدانىنان قۇلجا اۋدانىنىڭ نان كاسىبى باقشاسىنا كەلىپ جۇمىس ىستەيدى. نان جابۋ جاعىندا ءداستۇرلى تاجىريبەسى بار احمەت تاربيەلەنۋ ارقىلى ەلەكتر تونارعا نان جابۋ تەحنيكاسىن يگەردى. ول تىلشىگە: «بۇل ارادا قىزمەت ىستەۋ ورتاسى جاقسى، كىرىسى تۇراقتى، جاتىن ورىن، تاماقپەن قامدايدى، وزىمنەن ەشقانداي شىعىن جوق، ايلىق ەڭبەكاقىمنان نەبارى نەشە ءجۇز يۋان عانا اقشا الىپ قالىپ، قالعاندارىنىڭ ٴبارىن وتباسىما جىبەرىپ بەرەمىن» دەدى.

    «مەنىڭ نان جاپقانىما 4 جىل بولدى، بۇرىن وتىنمەن، كومىرمەن جاباتىنمىن، ٴتۇتىن دە كوپ شىعاتىن، وت تا جاقسى يگەرىلمەيتىن، ەڭبەكاقى تومەن، ايىنا 2 مىڭ 500 يۋان تاباتىنمىن. بيىل مەن بۇل ارادا وسىزاماندانعان ەلەكتر توناردى پايدالاندىم، تازا، ايىنا 4 مىڭ يۋان ەڭبەكاقى الامىن» دەدى احمەت.

    ۇعىسۋعا قاراعاندا، قۇلجا اۋدانى نان كاسىبى باقشاسىنىڭ يەلەگەن جەر اۋماعى 100 مۋ ەكەن، ٴوندىرىس، مانەرلەۋ رايونى، ەكسكۋرسيالاۋ رايونى، ەرەكشە ونىمدەردى كورمەگە قويىپ ساتۋ رايونى، مادەنيەت كورمە رايونى، ساياحات رايونى، قوراپتاۋ، قامبادان شىعارۋ رايونى سياقتى فۋنكتسيالىق رايوندار قۇرىلىپ، وتىن جاعىلاتىن 70 ەكولوگيالىق تونار ، 60 ەلەكتر تونار، 2 ۇڭگىمە پەش، ٴبىر قاقتاۋ پەشى ورنالاستىرىلعان، نەگىزىنەن قۇلجا اۋدانى فىڭيۋە اس ـ سۋ باسقارۋ، قىزمەت وتەۋ شەكتى سەرىكتىگى ٴوندىرىس، تيجاراتقا جاۋاپتى ەكەن.

    قۇلجا اۋدانى فىڭيۋە اس ـ سۋ باسقارۋ، قىزمەت وتەۋ شەكتى سەرىكتىگىنىڭ ورىنباسار باس ديرەكتورى يىن داندان بىلاي دەپ تانىستىردى: قۇلجا اۋدانى نان كاسىبى باقشاسىندا 5 سەح بار، 9 ـ ايدىڭ 28 ـ كۇنى رەسمي ىسكە قوسىلدى. «1 ـ قازان» التىن اپتالىعى كەزىندە نان كاسىپ باقشاسىنداعى بارلىق قىزمەتكەر بازاردى قامداۋعا كەپىلدىك ەتۋ ٴۇشىن ۇستەمە جۇمىس ىستەپ نان جاپتى. سەرىكتىك تاعى ونىمدەردى زەرتتەۋ ـ اشۋ ۇيىرمەسىن ۇيىمداستىرىپ، ەرەكشە نانداردى زەرتتەپ جاسادى، باستىسى، جەمىس قويمالجىڭى نانى، كەپتىرىلگەن جەمىس نانى، قارا ٴبيداي نانى سياقتى 40 نەشە ءتۇردى قامتيدى، تاياۋ مەزگىلدەگى ساتۋ جاعدايىنان قاراعاندا، ەرەكشە نان قالىڭ تۇتىنۋشىلاردىڭ قىزۋ قارسى الۋىنا بولەنگەن.

جاۋاپتى رەداكتور: گۇلدەن ماقسات قىزى