كەزەكتەگى سيفرلى حالىق اقشاسىنىڭ سىناق ءتۇيىنى ءالى دە «4+1» بويىنشا اتقارىلادى

  • كەلۋ قاينارى: ىلە گازەتى
  • 02:54:30 11/11/2020

    ساۋدا ىستەرى مينيسترلىگى جۋىقتا «ساۋدادا جاڭالىق جاراتا دامۋعا قىزمەت وتەۋدىڭ سىناق ءتۇيىنىن جاپپاي ىلگەرىلەتۋدىڭ تۇلعالىق جوباسىن» باسىپ تاراتتى، مۇنىڭ ىشىندە سيفرلى حالىق اقشاسى سىناق ءتۇيىنى ەتىلەتىن ورىندار جاريالاندى: بەيجيڭ – تيانجين – حىبەي، چاڭجياڭ اتىراۋى، گۋاڭدۇڭ – شياڭگاڭ – اۋمىن ۇلكەن شىعاناق رايونى جانە ورتا – شىعىس بولەكتەگى شارت – جاعدايى ازىرلەنگەن سىناق ءتۇيىنى رايوندارى سيفرلى حالىق اقشاسىنىڭ سىناق ءتۇيىنى ەتىلەدى. 8 – ايدىڭ 15 – كۇنى ءتىلشىنىڭ ۇعىسۋىنشا، كەزەكتەگى سيفرلى حالىق اقشاسىنىڭ سىناق ءتۇيىنى ءالى دە «4+1» بويىنشا اتقارىلىپ، الدىمەن شىنجىن، سۋجوۋ، شۇڭ – ان جاڭا رايونى، چىڭدۋ جانە بولاشاقتاعى قىستىق وليمپيادا الاڭدارى اۋماعىندا ىشكى جاقتا جابىق تۇردە سىناق ەتىلەدى دە ءارى باسقا وزگەرىس بولمايدى دەلىنگەن.

    قاتىستى قايراتكەرلەردىڭ اتاپ كورسەتۋىنشە، توراپتا تارالىپ جۇرگەن بەيجيڭ، تيانجين، شاڭحاي سياقتى 28 سىناق ءتۇيىنى ءاسىلى ساۋدادا جاڭالىق جاراتا دامۋعا قىزمەت وتەۋدىڭ سىناق ءتۇيىنى جاپپاي ىلگەرىلەتىلەتىن وڭىرلەر ەكەن. شىنجىن، سۋجوۋ، شۇڭ – ان جاڭا رايونى، چىڭدۋ جەكە – جەكە بەيجيڭ – تيانجين – حىبەي، چاڭجياڭ اتىراۋى، گۋاڭدۇڭ – شياڭگاڭ – اۋمىن ۇلكەن شىعاناق رايونى جانە ورتا – شىعىس بولەككە ۋاكىلدىك ەتەدى ەكەن دە، جۇڭگو حالىق بانكەسى جوعارىداعى ءتۇرت جەردە سيفرلى حالىق اقشاسىنىڭ سىناق قىزمەتىن ورىستەتەدى ەكەن.

    سيفرلى حالىق اقشاسى تەگى نە نارسە؟

    كەزەكتە كوپتەگەن مەملەكەت زاڭدى سيفرلى اقشا جونىندە زەرتتەۋ جٷرگىزگەنىمەن، ءبىراق تەحنيكا جەلىسى، اينالىم جۇيەسى، بازارعا سالۋ ارناسى جاعىندا ۇقساماستىقتار ورىن تەۋىپ وتىر. جۇڭگو حالىق بانكەسىنىڭ باستىعى ي گاڭ كەزىندە ەلىمىزدىڭ زاڭدى سيفرلى حالىق اقشاسىن اۋىزعا الىپ، حالىق بانكەسىنىڭ سيفرلى حالىق اقشاسى مەن ەلەكتروندى ەسەپ ايىرۋ قۇرالدارىن ءوزارا ۇشتاستىرۋ ارقىلى ءبىرقىدىرۋ جوسپارلاردى العا قويۋداعى نىسانا – وعان ءبىر ءبولىم ناق اقشانىڭ ورنىن باستىرۋ ەكەندىگىن تانىستىرعان.

    دەمەك، ەلىمىزدىڭ زاڭدى سيفرلى اقشاسى قاعاز اقشانىڭ سيفرلانۋى، «حالىق اقشاسىنىڭ سيفرلانعان» نۇسقاسى. وسىنىڭ الدىنداعى ورتالىق بانكەنىڭ سيفرلى اقشا زەرتتەۋ ورنىنىڭ باستىعى مۋ چاڭچۇن سيفرلى اقشانىڭ يقۋاتى مەن قاسيەتى قاعاز اقشامەن تۇگەلدەي ۇقساس، تەك ونىڭ كۇيىنىڭ سيفر فورماسىندا ەكەندىگىن ءبىلدىردى.

    ي گاڭ تانىستىرىپ بىلاي دەدى: كەزەكتە سيفرلى ەكونوميكا الەم ەكونوميكاسىنىڭ ارتۋىندا كۇننەن – كۇنگە ماڭىزدى ورىنعا كوتەرىلگەن قوزعاۋشى كۇشكە اينالدى. زاڭدى سيفرلى اقشانى زەرتتەپ اشۋ جانە قولدانۋ حالىق جۇرتشىلىعىنىڭ سيفرلى ەكونوميكا شارت – جاعدايىندا زاڭدى اقشاعا بولعان قاجەتىن جوعارى ءونىمدى قاناعاتتاندىرۋعا ءتيىمدى بولىپ، پارشا ساتۋداعى ەسەپ ايىرۋدىڭ قولايلىلىعىن، حاۋىپسىزدىگىن جانە جالعان اقشا جاساۋدىڭ الدىن الۋ ورەسىن جوعارىلاتىپ، ەلمىزدىڭ سيفرلى ەكونوميكاسىنىڭ جەدەل دامىتۋىن ىلگەرىلەتەدى.

    سيفرلى حالىق اقشاسىن قالاي ىستەتەدى؟

    قاعاز اقشانى قالاي ىستەتەتىنىن بارلىعىمىز بىلەمىز، ءبىراق ونى سيفرلى اقشاعا اينالدىرعاننان كەيىن قالاي ىستەتۋگە بولادى، بۇل كوپتەگەن ادامداردى سيفرلى حالىق اقشاسىنا قىزىقتىرىپ وتىر.

    ارينە، جىلجىمالى ەسەپ ايىرۋدىڭ كۇندەلىكتى تۇرمىسىمىزعا ىشكەرىلەي توعىسۋىنا ىلەسە، سيفرلى حالىق اقشاسىنىڭ ىستەتىلۋ كولەمى دە بىزگە بەيتانىس بولمايتىن بولدى. مۋ چاڭچۇن كەزىندە ىستەتىلۋ كولەمىن بىلاي بەينەلەگەن ەدى: قولفونىڭىزدا سيفرلى حالىق اقشاسىنىڭ سيفرلى اقشا قاپشىعى بولسا بولعانى، توراپقا جالعانباسا دا بولادى، قولفوندا توك بولسا بولعانى، ەكى قولفوندى ءبىر – بىرىنە تيگىزسە بولعانى ءبىر جاقتىڭ سيفرلى اقشا قاپشىعىنداعى سيفرلى اقشا ەكىنشى ادامعا جوتكەلەدى.

جاۋاپتى رەداكتور: جازيرا بولاتباي قىزى