72 ميلليارد 620 ميلليون دوللار! 3 - كەزەكتى يمپورت كورمەسى ەكونوميكا - ساۋدا سەلبەستىگىنىڭ تابىسى تاعى ءبىر رەت جاڭا ورە جاراتتى

  • كەلۋ قاينارى: شينجياڭ گازەتى تورى
  • 09:20:01 12/11/2020

  

    شينحۋا اگەنتتىگىنىڭ 11 - ايدىڭ 10 - كۇنى شاڭحايدان بەرگەن حابارى (تىلشىلەر يۇي جياشين، جوۋ رۇي). 3 - كەزەكتى جۇڭگو حالىقارالىق يمپورت كورمەسى 11 - ايدىڭ 10 - كۇنى جابىلدى. جۇڭگو حالىقارالىق يمپورت كورمە مەكەمەسىنىڭ ورىنباسار باستىعى سۇن چىڭحاي بىلاي دەدى: بۇكىل جەر شارىندا جاڭا تيپتى ايدارشا ۆيرۋس وكپە قابىنۋ ىندەتى ءالى دە ۇزدىكسىز ورشۋدە، ءبىراق 3 - كەزەكتى يمپورت كورمەسىندە تاراپتاردىڭ سەلبەسۋ تىلەگىنىڭ قىزۋى باسەيمەدى، ءبىر جىل بويىنشا ەسەپتەگەندە، جيىنى 72 ميلليارد 620 ميلليون دوللارىندىق توقتام جاساسۋ تىلەگى ورىندالىپ، الدىڭعى كەزەكپەن سالىستىرعاندا %2.1 ارتتى.

    سۇن چىڭحاي سول كۇنى 3 - كەزەكتى يمپورت كورمەسىنىڭ جابىلۋ سالتىنىڭ اقپاراتتىق حابارلاندىرۋ ماجىلىسىندە بىلاي دەدى: 3 - كەزەكتى يمپورت كورمەسى ىندەتتەن ساقتانۋ - تىزگىندەۋدى ۇدايىلاندىرۋ شارت - جاعدايىندا، جۇڭگونىڭ وتكىزگەن كولەمى ەڭ ۇلكەن، قاتىناسقان مەملەكەت ەڭ كوپ، ينتەرنەت جەلىسى مەن جەلىدەن تىسقارى ۇشتاستىرىلعان حالىقارالىق ەكونوميكا - ساۋدانىڭ سالتاناتتى كورمەسى بولدى. كورمەنىڭ جالپى اۋدانى 360 مىڭ شارشى مەترگە تاياۋ، الدىڭعى كەزەكپەن سالىستىرعاندا 30 مىڭ شارشى مەتر كەڭەيتىلىپ، 400 مىڭعا تاياۋ كاسىپتىك كورەرمەن تىركەلىپ تىزىمدەلىپ، كورمەگە كىرگەن ادامنىڭ جالپى سانى 612 مىڭ ادام - رەتكە تايادى.

    كەزەكتەگى ەرەكشە جاعدايدا، وسى كەزەكتى يمپورت كورمەسىندە ەكونوميكا - ساۋدا سەلبەستىگىنىڭ تابىسى بۇرىنعى ەكى كەزەكتەگىدەن اسىپ ءتۇستى، 3 جىلعى ەكونوميكا - ساۋدا سەلبەستىگىنىڭ ناتيجەلەرى ادىمداپ جوعارىلاپ، ”وتكىزگەن سايىن جاقسى بولۋدى“ جۇزەگە اسىردى: ءبىر جىل بويىنشا ەسەپتەگەندە، تۇڭعىش كەزەكتە 57 ميلليارد 830 ميلليون دوللارىندىق، 2 - كەزەكتە 71 ميلليارد 130 ميلليون دوللارىندىق، 3 - كەزەكتە 72 ميلليارد 620 ميلليون دوللارىندىق توقتام جاساسۋ تىلەگى بولدى.

    سۇن چىڭحاي بىلاي دەدى: وسى كەزەكتى يمپورت كورمەسىندە 411 ءتۇرلى جاڭا ءونىم، جاڭا تەحنيكا، جاڭاشا قىزمەت وتەۋ كورمەگە قويىلدى، دۇنيە جۇزىندەگى 500 بىرەگەي كاسپورىننىڭ، سونداي - اق كاسىپ سالاسىنىڭ باستاماشى كاسىپورىندارىنىڭ جالعاستى كورمەگە قاتىناسۋ سالىستىرماسى %80كە تايادى. ءارقايسى ۇلكەن كورمە رايونىندا، ازىق - تۇلىك، سونداي - اق اۋىل شارۋاشىلىعى ونىمدەرى كورمە رايونىندا كورمەگە قاتىناسقان كاسىپورىنداردىڭ سانى ەڭ كوپ بولىپ، 1264 كاسىپورىن كورمەگە قاتىناستى؛ تۇتىنۋ بۇيىمدارى كورمە رايونىنىڭ كورمە اۋماعى 90 مىڭ شارشى مەتردەن اسىپ، كولەمى ەڭ ۇلكەن كورمە رايونى بولدى؛ مەديتسينالىق جابدىقتار، سونداي - اق ەمدەۋ، ءدارى - دارمەك، سالاماتتىق كورمە رايونىندا جاڭا ونىمدەردىڭ، جاڭا تەحنيكالاردىڭ تۇڭعىش كورسەتىلىم سانى ەڭ كوپ بولىپ، جالپى سانى 120 تۇردەن استى. تۇڭعىش رەت قۇرىلعان الەۋمەتتىك دەنساۋلىق ساقتاۋ، ىندەتتەن ساقتانۋ ارناۋلى رايونىندا حالىقارالىق وزىق دەڭگەيدەگى الەۋمەتتىك دەنساۋلىق ساقتاۋ، ىندەتتەن ساقتانۋ ونىمدەرى، تەحنيكالارى جانە قىزمەت وتەۋلەرى شوعىرلى كورمەگە قويىلىپ، جەر اۋماعىن تالاي رەت كەڭەيتتى.

    وسى كەزەكتى يمپورت كورمەسى ”حاۋىپسىز، تارتىمدى، ونىمدىلىككە باي“ نىساناسىن جۇزەگە اسىردى، مۇندا، قولداۋ ساياساتىنىڭ ونىمدىلىگى كورنەكتى بولدى. شاڭحاي قالالىق ۇكىمەتىنىڭ ورىنباسار باس حاتشىسى، يمپورت كورمەسى قالالىق قىزمەت وتەۋ، قامتاماسىز ەتۋ باسشىلىق گرۋپپاسىنىڭ كەڭسە مەڭگەرۋشىسى شاڭ يۇييىڭ تانىستىرىپ بىلاي دەدى: كورمەگە قويىلعان بۇيىمداردى كورمەدەن كەيىن ەرەكشە باقىلاۋ - باسقارۋ رايونىنا جوتكەپ اپارىپ، شەكارا اتتاعان ەلەكتروندى ساۋدا ىستەرىن جۇرگىزۋگە رۇقسات ەتۋ سياقتى 19 ءتۇرلى قولداۋ ساياساتى تۇگەلدەي تياناقتانىپ اتقارىلدى.

جاۋاپتى رەداكتور: گۇلدەن ماقسات قىزى