قۇلجا قالاسىنىڭ نان كاسىبى بۇقارانىڭ بايۋ جولىن كەڭەيتتى

  • كەلۋ قاينارى: ىلە گازەتى
  • 03:12:27 20/11/2020

  ەرىكتى تىلشىلەر جاڭ يان، ساي ليشىن حابارلايدى. بيىل قۇلجا قالاسى نان كاسىبى باقشاسى قۇرىلىسىن وراي، قازىرگى بار نان كاسىبى بايلىعىن نەگىز ەتە وتىرىپ، «ءبىر كاسىپ باقشاسى + 10 بازا + 1 كوشە رايونى + بىرنەشە شەبەرحانا» ۇلگىسىندەگى نان كاسىبىن دامىتۋ جۇيەسىن قۇرىپ، مۇنى بۇقارانىڭ كىرىسىن ارتتىرىپ، اۋقاتتانۋعا باستايتىن ۇتىمدى جولعا اينالدىردى.

    ىلە وزەنى سۋ ايدىنى كورىنىسى باقشاسىنا ورنالاسقان، قۇرىلىس كولەمى 5 مىڭ 310 شارشى مەتر كەلەتىن قۇلجا قالاسى جەر ۇيىعى - نان كاسىبى باقشاسىنىڭ تيجارات باستاعانىنا ءبىر ايدان استى، باقشا رايونى ءوندىرۋ مانەرلەۋ رايونى، باستان كەشىرۋ رايونى جانە تۇرمىس رايونى بولىپ بولىنەدى. قازىر ءوندىرۋ - مانەرلەۋ رايونىنداعى 80 ولشەمدى ەلەكتر تونار مەن 61 ءتۇرلى تۇلعالى جابدىق تۇگەل سەپتەلىپ پايدالانۋعا بەرىلىپ، وندا كۇنىنە 40 مىڭ دانا نان جابىلۋدا. جەر ۇيىعى ازىق – تۇلىك شەكتى سەرىكتىگى «ىلە وزەنى نان پاتشاسى»، «جەر ۇيىعى ناندارى» سياقتى ساۋدا ماركاسىن تىزىمگە الدىرعان، نان كاسىبى باقشاسىنا ورنالاسقان ساۋداگەرلەر 20 دان اسادى، نەگىزىنەن ىشكە، سىرتقا ساتۋ، جەلىدە، جەلى سىرتىندا ساتۋ ءوزارا ۇشتاستىرىلعان تيجارات ۇلگىسى قولدانىلىپ، كۇنىنە 30 مىڭنان استام نان جابىلادى ەكەن.

    وسى سەرىكتىكتىڭ اكىمشىلىك كادرلار ءبولىمىنىڭ باستىعى ما لي تىلشىگە: «قازىر سەرىكتىك ساتۋ جولدارىن جان - جاقتى كەڭەيتىپ، قۇلجا قالاسىنداعى اۋىل شارۋاشىلىق، ساۋدا توپتارىنداعى، قازىرگى بار ءسۇت ساتۋ دۇكەندەرى مەن كوجە - قاتىق تىكە ساتۋ دۇكەندەرى ارقىلى، ءونىمدى قۇلجا قالاسىنداعى ءارقايسى كوشەلەر مەن الەۋمەتتىك اۋماقتارعا جەتكىزبەكشى. نانجيڭنىڭ شينجياڭعا باعىتتامالى كومەك بەرۋ قولباسشىلىق گرۋپپاسىنىڭ كومەگىندە سەرىكتىك تاعى نانجيڭدەگى 5 رايونداعى ساۋداگەرلەرمەن نان ونىمدەرىن ساتۋ توقتامىنا قول قويىستى، سونىمەن بىرگە، تاعى شي – ءان، چىڭدۋ سياقتى جەرلەردەگى ساۋداگەرلەرمەن دە بايلانىس جاساپ كەلىسىمگە كەلىپ، قۇلجا قالاسىنىڭ نان كاسىبىن الۋەتتەندىرۋگە قۇلشىنۋدامىز» دەدى.

    نان كاسىبىنىڭ دامۋىمەن، قۇلجا قالاسىنىڭ ءارقايسى اۋىل – قالاشىقتارىندا دا نان كاسىبى بازاسى قۇرىلدى. كەپەكجۇزى اۋىلى نان كاسىبى بازاسى 9 – ايدىڭ 17 – كۇنى رەسمي پايدالانۋعا بەرىلدى، جانە دە قۇلجا قالالىق ءدامدى نان جاساۋ كاسىپتىك سەلبەستىك كووپەراتيۆى قۇرىلىپ، مۇشەسى 9 عا جەتتى. قازىر وسى اۋىلداعى نان كاسىبى بازاسىندا 26 ادام جۇمىسقا ورنالاسقان، كۇنىنە 8 مىڭ نان ساتىلىپ، ساتۋ ارناسى كەڭەيگەن.

    نان كاسىبى بىتىراندى تيجاراتتان شوعىرلى دامۋعا ويىسىپ، كاسىپ سالاسىنىڭ شوعىرلانۋ ءونىمىن كورنەكتىلەندىرىپ، نان جابۋشىلاردى اۋقاتتانۋعا جەبەپ قانا قالماستان، جەرگىلىكتى ورىنداعى بوس ەڭبەككۇشتەردىڭ جۇمىستانۋ ماسەلەسىن دە شەشتى.

    بيىل قۇلجا قالاسىنداعى ءارقايسى اۋىل – قالاشىق، ءمالى باسقارماسى نان كاسىبىمەن شۇعىلداناتىن 436 ادامدى توپقا ءبولىپ تاربيەلەدى، تاربيەلەۋدەن كەيىن نان ءتۇرى دە مولايدى، جىبەك جولى شۇعىلاسى ساياحات شاعىن قالاشىعىنا ورنالاسقان جىبەك جولى شاعىن نان دۇكەندەرى كۇنىنە 20 تۇرگە جۋىق نان شىعارىپ، كوپتەگەن تۇتىنۋشىلاردى باۋرادى.

جاۋاپتى رەداكتور: جازيرا بولاتباي قىزى