توعىزتاراۋ اۋدانىنىڭ قىسقى كاسىپتىك شەبەرلىككە تاربيەلەۋ كۋرسى قىستاق تۇرعىندارىنىڭ اۋقاتتانۋىنا مۇمكىندىك جاراتتى

  • كەلۋ قاينارى: ىلە گازەتى
  • 03:34:34 07/01/2021

 

      ءتىلشىمىز يان ليڭ، ەرىكتى تىلشىلەر گو چيڭ، جاۋ ميڭياڭ، جاڭ شوۋفاڭ توعىزتاراۋدان حابارلايدى. جاقىنعى كۇندەردەن بەرى توعىزتاراۋ اۋدانىنىڭ ءارقايسى اۋىل، قالاشىعىندا، رايون - اۋماقتارىندا اماندىق ساقتاۋ، دانەكەرلەۋ، كيىم تىگۋ، ءۇي شارۋالارىن ىستەۋ، بالكۇلشە، پراندىك پىسىرۋ سياقتى قازىرگى كەزدە ءوتىمدى بولىپ تۇرعان كاسىپتىك شەبەرلىككە تاربيەلەۋ قيمىلدارى ورىستەتىلدى، قيمىلعا ءار ۇلت بۇقاراسى قىزۋ ىنتامەن قاتىناستى، بۇل شارۋالاردىڭ ءبىلىم - ونەر ۇيرەنىپ، تەحنيكانىڭ تەتىگىن مەڭگەرەتىن، وزىندىك ساپانى جوعارىلاتاتىن، كاسىپ اشىپ، اۋقاتتاناتىن ماڭىزدى تاسىلىنە اينالدى.

    12 - ايدىڭ 22 -كۇنى توعىزتاراۋ اۋدانى اقتۇبەك قالاشىعى كورجىلعا قىستاق كوميتەتى اشقان تىگىنشىلىك شەبەرلىگىنە تاربيەلەۋ كلاسىندا وقىتۋشى تىگىنشىلىك نەگىزگى بىلىمدەرىن كۋرسانتتارعا ەگجەي - تەگجەيلى ۇعىندىرىپ، ولارعا ەلەكترلى تىگىن ماشيناسىن قولدانۋ، ءپىشۋ تەحنيكاسى بىلىمدەرىن ۇيرەتتى.

    كۋرسانت اينۇر بۇرىن وتباسى ايەلى بولاتىن، قىزمەت تاجىريبەسى جانە كاسىپتىك شەبەرلىك جاعىندا بەلگىلى تاجىريبە جيناقتاي قويماعان ول ءبىر ايلىق قۇلشىنىسىنىڭ ناتيجەسىندە تىگىن ماشيناسىنان قالاي پايدالانۋدى، كەزدەمەنى كەسىپ - ءپىشىپ شاپان، سىم، جەيدە تىگۋدى ۇيرەندى. ول بىلاي دەدى: «وسى ونەردى يگەرۋىم مەنىڭ كەلەر جىلى سىرتقا شىعىپ جۇمىس ىستەپ، تىڭ كىرىس كوزىن اشۋىما زور مۇمكىندىك تۋدىردى» دەدى.

    قىستاقتا اينۇرمەن بىرگە ونەر ۇيرەنگەن تاعى 28 ايەل بار. ولار 45 كۇندىك كاسىپتىك شەبەرلىككە تاربيەلەنىپ، ەمتيحاننان تولىمدى بولعاننان كەيىن كاسىپتىك شەبەرلىكتەن تولىمدىلىق كۋالىگىن الماقشى. وقىتۋشى نۇرگۇلدىڭ ايتۋىنشا، قازىر كلاستاعى كۋرسانتتاردىڭ ءبارى تىگىنشىلىك ونەرىنىڭ نەگىزگى تەتىگىن يگەرىپ ۇلگىرگەن، ۇيىندە وتىرىپ تا كاسىپتەنە بەرۋلەرىنە بولادى ەكەن.

    كورجىلعا قىستاعى پارتيا ياچەيكاسىنىڭ شۋجيى لىڭ جيڭنىڭ ايتۋىنا قاراعاندا، كاسىپتىك شەبەرلىككە تاربيەلەنگەن ايەلدەر ەڭبەك ونەرىنە جەتىلىپ، كوز ايالارى كەڭىپ، يدەيالارىندا ۇلكەن بۇرىلىس تۋىلعان. كاسىپتىك شەبەرلىكتەن تولىمدىلىق كۋالىگىن العان ولار ەگەر وزدەرى دەربەس دۇكەن اشىپ كاسىپتەنگىسى كەلسە، قىستاق قارىز اقشا جاعىنان كومەكتەسەدى ەكەن.

    ءتىلشى توعىزتاراۋ اۋدانىنىڭ وتباسى جۇمىستارىنا كاسىپتىك تاربيەلەۋ مەكتەبىنىڭ كلاسىنا كىرگەندە، 40 تان استام كۋرسانتتىڭ ۇن تاعامدارىن ازىرلەپ جاتقانىن كوردى. شاكىرتتەر ۇستازدارىنىڭ جەتەكشىلىگىندە ۇن يلەۋ، اشىتۋ، بۋلاۋ، قاقتاۋ جۇمىستارىن ءبىر – بىرلەپ ىستەۋدە، ولار پىسىرعان ۇن تاعامدارىنىڭ حوش ءيىسى مۇرنىڭدى جارادى.

    وسى 45 كۇندىك كۋرستا قۇلجا اۋدانى سىيۋان كاسىپتىك شەبەرلىككە تاربيەلەۋ مەكتەبىنىڭ وقىتۋشىسى ساباق بەردى. كۋرس بارىسىندا وقىتۋشى پراندىكتىڭ ماتەريالى، ەرەكشەلىگى، جاسالۋ بارىسى، گۇلدى پراندىكتەردى جاساۋ شەبەرلىگى سياقتىلاردى ەگجەي ـ تەگجەيلى ۇيرەتتى. كۋرسانتتار ٴبىر جاعىنان مۇقيات تىڭداپ، ەستەلىك الىپ، ٴبىر جاعىنان امالياتپەن ۇشتاستىرىپ جاتتىقتى. ەڭ نەگىزگى نان يلەۋ، نان جايۋ سياقتى شەبەرلىكتەردەن تارتىپ الۋان فورمالى، الۋان رەڭدى، ءدامى تاڭدايدا قالاتىن گۇلدى پراندىك جاساۋعا دەيىن ۇيرەندى.

جاۋاپتى رەداكتور: گۇلدەن ماقسات قىزى