وڭتۇستىك - سولتۇستىك شينجياڭ جوعارى جىلدامدىقتى (1 - دارەجەلى) تاس جولى قوس اينالما جەلىسى بيىل سالىنىپ بولادى

  • كەلۋ قاينارى: تيانشان تورى
  • 08:42:37 21/02/2021

    انار بۇلت / شينجياڭ گازەتىنىڭ ءتىلشىسى لۋ فىڭباۋ 2 - ايدىڭ 19 - كۇنى ۇرىمجىدەن حابارلايدى. اۆتونوميالى رايوندىق قاتىناس - تاسمال مەڭگەرمەسىنەن ۇعىسۋعا قاراعاندا، بيىل رايونىمىزدىڭ جوعارى جىلدامدىقتى تاس جولىنىڭ جالپى ۇزىندىعى 6000 كيلومەتردەن اسىپ، وڭتۇستىك - سولتۇستىك شينجياڭ جوعارى جىلدامدىقتى (1 - دارەجەلى) تاس جولى قوس اينالما جەلىسى سالىنىپ بولادى ەكەن.

    كەزەكتە ۇزارتىلعان مەملەكەت، ولكە نەگىزگى جەلىسى وڭتۇستىك - سولتۇستىك شينجياڭدا اينالما جەلى قالىپتاستىردى، دەسە دە سولتۇستىك شينجياڭدا جوڭعار ويپاتىن اينالاتىن جانە وڭتۇستىك شينجياڭدا تارىم ويپاتىن اينالاتىن جوعارى جىلدامدىقتى (1 - دارەجەلى) تاس جول شەڭبەرى ءالى قالىپتاسپادى.

    ”تۇتاس شينجياڭنىڭ تاس جولىن اينالمالى ەتىپ قانا قويماي، جىلدامدىعىن دا تەزدەتۋ كەرەك. تاياۋ جىلدان بەرى رايونىمىز تاس جول قۇرىلىسى تەبىنىن ارتتىرىپ، جوڭعار ويپاتىن اينالاتىن جانە تارىم ويپاتىن اينالاتىن جوعارى جىلدامدىقتى تاس جول قۇرىلىسىن ۇزدىكسىز ىلگەرىلەتىپ، وڭتۇستىك - سولتۇستىك شينجياڭ جوعارى جىلدامدىقتى (1 - دارەجەلى) تاس جولى قوس اينالما جەلىسى جۇلگەسىن بىرتىندەپ قالىپتاستىردى“، - دەدى اۆتونوميالى رايوندىق قاتىناس - تاسمال مەڭگەرمەسىنىڭ ورىنباسار مەڭگەرمە باستىعى دارەجەلى كادرى جىڭ ميڭچۋان.

    سولتۇستىك شينجياڭ جونىنەن ايتقاندا، G30 ليانيۇنگاڭ - قورعاس جوعارى جىلدامدىقتى تاس جولى، كۇيتۇننەن التايعا دەيىنگى جوعارى جىلدامدىقتى تاس جول، سونداي - اق G216 جەلىسىنىڭ كوكتوعايدان ۋسايۋانعا دەيىنگى تاس جولى سالىنىپ ءبىتىپ پايدالانۋعا بەرىلىپ، رايونىمىزدىڭ جوڭعار ويپاتىن اينالاتىن جوعارى جىلدامدىقتى (1 - دارەجەلى) تاس جول شەڭبەرى نەگىزىنەن قالىپتاسادى. بيىل G216 جەلىسىنىڭ بەيتۇننەن كوكتوعايعا دەيىنگى تاس جولى سالىنادى، كەزى كەلگەندە، جوڭعار ويپاتى جوعارى جىلدامدىقتى (1 - دارەجەلى) تاس جولى جابىق اينالما قالىپتاستىرىپ، سولتۇستىك شينجياڭ جوعارى جىلدامدىقتى (1 - دارەجەلى) تاس جول اينالما جەلىسى تۇلعالانادى.

    وڭتۇستىك شينجياڭ جوعارى جىلدامدىقتى تاس جولىنىڭ دامۋى دا تەز ارناعا ءتۇستى، تۇرپاندى باسىپ وتەتىن قاشقار قالاسىنان حوتان قالاسىنا دەيىنگى جوعارى جىلدامدىقتى تاس جول بار. كەزەكتە، لوپ - نيە - چارقىلىق باعىتىنداعى تاس جول جانە لوپنۇر - 35 - تۋان - چارقىلىق تاس جولى سالىنۋدا، بيىل تۇتاستىرۋ جوسپارلاندى، كەزى كەلگەندە، تارىم ويپاتىن اينالاتىن جوعارى جىلدامدىقتى (1 - دارەجەلى) تاس جول شەڭبەرى قالىپتاسىپ، وڭتۇستىك شينجياڭنىڭ جوعارى جىلدامدىقتى (1 - دارەجەلى) تاس جول جەلىسى بۇكىلدەي تۇتاستىرىلادى.

    ۇعىسۋعا قاراعاندا، 2020 - جىلدىڭ سوڭىنا دەيىن رايونىمىزدا جوعارى جىلدامدىقتى تاس جول 5500 كيلومەتردەن اسىپ، بارلىق ايماق، وبلىس، قالا جوعارى جىلدامدىقتى تاس جول داۋىرىنە قادام تاستاعان.

جاۋاپتى رەداكتور: جازيرا بولاتباي قىزى