توپىراقتىڭ دىمقىل كەزەڭىن، اۋا رايىن مىقتى يگەرىپ، تۇقىم ٴسىڭىرۋدىڭ قىزۋ ورلەۋى كوتەرىلدى

وبلىسقا توتە قاراستى ورىنداردىڭ كوكتەمگى ەگىس ٴوندىرىسى جاپپاي باستالدى

ٴتىلشىمىز دۋلەي، ەرىكتى ٴتىلشى شياۋ جيانچياڭ حابارلايدى. 4 - ايدىڭ 8 - كۇنى قۇلجا اۋدانى ٴۇشون حۇيزۋ ۇلتتىق اۋىلىنىڭ توقشىجۇزى قىستاعىنا ورنالاسقان يۇننان بەييۇي تۇقىمشىلىق كاسىبى عىلىم - تەحنيكا شەكتى سەرىكتەستىگىنىڭ تۇقىمدىق جۇگەرى ەگىمشىلىگى بازاسىندا ٴتىلشى تراكتورلاردىڭ دالمە - ٴدال تۇقىم سەبۋ ماشيناسىمەن تۇقىم سەبۋ، تامشىلاتىپ سۋارۋ  تاسپاسىن جاتقىزۋ، سۋلياۋ جارعاق توسەۋ، توپىراق جابۋ جۇمىستارىن ٴبىر جولدا تىندىرىپ جاتقاندىعىن كوردى. اتىزداردا كوكتەمگى ٴوندىرىستىڭ قاربالاس كۇيى مەنمۇندالادى.

«بيىل سەرىكتەستىگىمىز 2 مىڭ 400 مۋ جەردى اينالىمعا سالدى. مۇنىڭ ىشىندە 2 مىڭ 100 مۋ جەرگە تۇقىمدىق جۇگەرى، 300 مۋ جەرگە جازدىق ٴبيداي ەگىلدى. بازامىزداعى ٴبيداي 4 - ايدىڭ 4 - كۇنىنەن بۇرىن تۇگەلدەي ەگىلىپ بولعان، قازىر تۇقىمدىق جۇگەرى ەگۋگە كىرىستىك. ٴبىز 6 جوعارى ات كۇشىندىك تراكتوردى ىسكە قوسىپ، ۇستەمەلەپ ىستەۋدەمىز، 4 - ايدىڭ 11 - كۇنىنەن بۇرىن تۇقىمدىق جۇگەرى ەگۋ مىندەتىن تولىق ورىندايمىز» دەدى يۇننان بەييۇي تۇقىمشىلىق كاسىبى عىلىم - تەحنيكا شەكتى سەرىكتىگى تۇقىمدىق جۇگەرى ەگىمشىلىگى بازاسىنىڭ تەحنيكالىق جاۋاپتىسى يان گۇيلين.

وبلىستىق اۋىل شارۋاشىلىعى، اۋىل - قىستاق مەكەمەسى ەگىمشىلىك جانە اۋىل شارۋاشىلىق دارىلەرى باسقارماسىنىڭ جاۋاپتىسى سۇڭ سايميڭ تىلشىگە بىلاي دەدى: «كۇن اشىلعاننان كەيىن وبلىسقا توتە قاراستى اۋدان، قالالار ۋاقىتتى مىقتى يگەرىپ، كوكتەمگى ەگىس ٴوندىرىسى قىزمەتىن جاپپاي باستاپ، توپىراقتىڭ دىمقىل كەزەڭىن مىقتى يگەرىپ، ۋاقىت ۇتىپ ەگىس داقىلدارىن ەگۋ جۇمىسىنا كىرىستى. وبلىستىق اۋىل شارۋاشىلىعى، اۋىل - قىستاق مەكەمەسى تاعى قىزمەت وتەۋ، جەتەكشىلىك ەتۋ گرۋپپاسىن قۇرىپ، اۋدان، قالالارعا  بارىپ تۇيىندە تۇرىپ قىزمەت وتەۋگە، جەتەكشىلىك ەتۋگە جىبەرىپ، وبلىسقا توتە قاراستى ورىنداردىڭ كوكتەمگى ەگىس ٴوندىرىسى قىزمەتىنىڭ 4 - ايدىڭ سوڭىنان بۇرىن جالپى بەتتىك اياقتالۋىنا كەپىلدىك ەتتى».

ۇعىسۋعا قاراعاندا، بيىل مەجەمەن وبلىسقا توتە قاراستى ورىنداردا ەگىس داقىلدارى ەگىلەتىن جەر كولەمى 6 ميلليون 262 مىڭ 700 مۋ بولىپ، قازىرگە دەيىن 191 مىڭ 300 مۋ جەرگە ەگىس داقىلى ەگىلىپ بولعان. مۇنىڭ ىشىندە 153 مىڭ 700 مۋ جەرگە استىق داقىلى، 12 مىڭ مۋ جەرگە مايلى داقىل، 10 مىڭ 400 مۋ جەرگە قىزىلشا، 14 مىڭ 900 مۋ جەرگە كوكونىس، 300 مۋ جەرگە ٴدارى ٴشوپ ەگىلگەن.

قازىرگى كوكتەمگى ەگىس ٴوندىرىسىنىڭ شەشۋشى مەزگىلىندە ٴوندىرىس تەبىنىن جەدەلدەتىپ، استىق حاۋىپسىزدىگى جاۋاپكەرلىگىن تياناقتاندىرۋ ٴۇشىن وبلىستىق اۋىل شارۋاشىلىعى، اۋىل - قىستاق مەكەمەسىنىڭ كادرلارى اتىز باسىنا بارىپ، ناق مايداندا قىزمەت وتەپ، استىق ەگەتىن ديقانداردىڭ ٴىس جۇزىندىك قيىنشىلىعىن شەشۋىنە كومەكتەسىپ، كوكتەمگى ەگىس ٴوندىرىسىنىڭ ٴتۇرلى قىزمەتتەرىن كۇش سالا ويداعىداي مىقتى يگەردى.

وبلىستىق اۋىل شارۋاشىلىعى، اۋىل - قىستاق مەكەمەسى كوتەرمەگە العان اۋدان، قالالارعا قىزمەت وتەۋ ٴتۇزىمى بويىنشا 6 قىزمەت وتەۋ، جەتەكشىلىك ەتۋ گرۋپپاسىن، 11 اۋدان، قالاعا قىزمەت وتەۋ شاعىن اترەتىن قۇرىپ، مەكەمە پارتيا باسشىلىق گرۋپپاسى باسشىلىق القاسىنىڭ مۇشەلەرى  گرۋپپاعا جەتەكشىلىك ەتىپ، مەكەمەگە قاراستى ورىنداردىڭ نەگىزگى جاۋاپتىلارى مەن كاسىپتىك تەحنيكتەردى باستاپ اۋدان، قالالارعا بارىپ 10 كۇن تۇيىندە تۇرىپ قىزمەت وتەدى. ولار ماسەلەنى جەتەكشى ەتۋگە تاباندى بولىپ، ناق مايداندا قىزمەت وتەۋ ٴتاسىلى ارقىلى اۋىل - قالاشىقتارعا، قىستاق - اترەتتەرگە، ديقان وتباسىلارىنا ىشكەرىلەي بارىپ، اۋدان، قالالاردىڭ كوكتەمگى ەگىس وندىرىسىندە جولىققان ٴىس جۇزىندىك قيىنشىلىقتارىن شەشۋىنە كومەكتەستى. جەتەكشىلىك ەتەتىن، قىزمەت وتەيتىن اۋىل، قالاشىق %30 تەن، قىستاق، اترەت %30 تەن، ديقان وتباسى %30 تەن كەم بولماۋ تالابىنا ساي كوكتەمگى ەگىس داقىلدارىن ەگۋ قىزمەتىنە جەتەكشىلىك ەتىپ، اۋدان، قالالاردىڭ (موڭعۇلكۇرە مەن تەكەس اۋدانىنان تىس) 4 - ايدىڭ 15 - كۇنىنەن بۇرىن كوكتەمگى ەگىس ٴوندىرىسى مىندەتىن تولىق ورىنداۋىنا كەپىلدىك ەتتى. 

يان گۇيلين بىلاي دەدى: «وبلىس، اۋدان ەكى دارەجەلى اۋىل شارۋاشىلىعى تەحنيكتەرى اتىز باسىنا ىشكەرىلەي بارىپ، ەگىس داقىلدارىن ەگۋ قىزمەتىنە جەتەكشىلىك ەتىپ، كاسىپورىنداردىڭ ٴىس جۇزىندىك قيىنشىلىعىن بەلسەنە شەشىپ، ٴبىزدى ۋايىمنان ارىلتتى. بيىل ٴبىز تۇقىمدىق جۇگەرىنىڭ مۋ باسىندىق ٴونىمىن 500 كيلوگرامعا، مۋ باسىندىق كىرىسىن 3 مىڭ 600 يۋانعا جەتكىزۋ، جازدىق ٴبيدايدىڭ مۋ باسىندىق ٴونىم مولشەرىن 400 كيلوگرامنان اسىرۋداي تىڭ ناتيجە جاراتۋ نىساناسىن جۇزەگە اسىرۋعا قۇلشىنامىز».

چاپچال سىبە اۆتونوميالى اۋدانى اسىل تۇقىمدى قوي فەرماسى رايونىن باسقارۋ كوميتەتىنىڭ قۇدىقپەن سۋارۋ رايونىنداعى ەگىمشىلىكپەن شۇعىلداناتىن ٴىرى وتباسى شۇي جيانلياڭ بيىل 5 مىڭ مۋ جەرگە تۇقىمدىق جۇگەرى ەكپەكشى. 4 - ايدىڭ 1 - كۇنىنەن باستاپ جەر جىرتتى دا 4 - ايدىڭ 3 - كۇنى تۇقىم سىڭىرە باستادى. ول 9 ٴىرى تۇرپاتتى اۋىل شارۋاشىلىق ماشيناسىن قاتار ىسكە قوستى. مەجەمەن 4 - ايدىڭ 14 - كۇنىنەن بۇرىن  تۇقىم ٴسىڭىرۋ قىزمەتىن تولىق اياقتاتادى.

شۇي جيانلياڭ بىلاي دەدى: «ەگىمشىلىكپەن شۇعىلداناتىن ٴىرى وتباسىلار قاتىستى كاسىپورىندارمەن تاپسىرىس توقتامىنا قول قويىستىق. تەك تۇقىمدىق جۇگەرىنىڭ ساپاسى مەن ٴونىم مولشەرىنە كەپىلدىك ەتسەك بولدى، ايتارلىقتاي كىرىس كىرگىزەتىندىگىمىز داۋسىز. بيىل ٴبىز ەگىس اتىزىن باپتاۋ - باسقارۋدى اناعۇرلىم كۇشەيتىپ، جۇگەرىنىڭ ساپاسى  جانە ٴونىم مولشەرى جاعىنان مول ٴونىم الۋعا كەپىلدىك ەتەمىز».

4 - ايدىڭ 7 - كۇنىنە دەيىن وبلىسقا توتە قاراستى ورىنداردىڭ ٴتۇرلى اۋىل شارۋاشىلىق ماتەريالدارىنىڭ زاپاس قور مولشەرى 318 مىڭ 200 توننا بولىپ، جوسپار زاپاس قورىنىڭ %105 ىندەي بولدى. مۇنىڭ ىشىندە تۇقىم 51 مىڭ 600 توننا، حيميالىق تىڭايتقىش 251 مىڭ 200 توننا، اۋىل شارۋاشىلىق ماتەريالدارىمەن قامداۋى جەتكىلىكتى بولىپ، قازىرگى اۋىل شارۋاشىلىعى ٴوندىرىسىنىڭ قاجەتىن تولىق قامتاماسىز ەتە الادى ەكەن. 119 مىڭ 800  ٴتۇرلى اۋىل شارۋاشىلىق ماشيناسى ىسكە قوسىلىپ، بارلىعى تولىق تەكسەرىلىپ - رەمونتتالعان. بۇدان تىس، ٴتۇرلى كوكتەمگى وندىرىسكە قاجەتتى قارىز اقشادان  7 ميلليارد 426 ميلليون يۋان تاراتىلعان.