ٴبىر ورىندا قىزمەت ەتۋ ۇلگىسىندەگى حالىقارالىق ساۋدا تۇعىرى ىرگە تەپتى

قورعاس شەكارا تۇرعىندارىنىڭ ٴوزارا بازارشىلاۋ ساۋدا رايونى رەسمي تەكسەرىپ وتكىزىپ الىندى

ٴتىلشىمىز مىڭ شيا، ەرىكتى ٴتىلشى حۋاڭ يۇيحۇي حابارلايدى. 6 - ايدىڭ 14 - كۇنى جۇڭگو - قازاقستان شەكاراسىنداعى قورعاس شەكارا تۇرعىندارىنىڭ ٴوزارا بازارشىلاۋ ساۋدا رايونى اۆتونوميالى رايوننىڭ بىرلەسىپ تەكسەرىپ وتكىزىپ الۋ گرۋپپاسىنىڭ رەسمي تەكسەرىپ وتكىزىپ الۋىنان ٴوتتى.

قورعاس شەكارا تۇرعىندارىنىڭ ٴوزارا بازارشىلاۋ ساۋدا رايونى قورعاس تاس جول شەكارا وتكەلىنە ورنالاسقان، يەلەگەن جەر اۋماعى 81 مىڭ شارشى مەتر، جالپى 180 ميلليون يۋان قارجى قوسىلعان، 1 - شەپ كەدەن باقىلاۋ - باسقارۋ اۋماعى جانە 2 - دارەجەلى ساۋدا بازارى بولىپ ەكىگە بولىنگەن. 1 - شەپ كەدەن باقىلاۋ - باسقارۋ اۋماعىندا قازىر يمپورت - ەكسپورت ونىمدەرىن ساقتايتىن 6 قامبا بار، جەكە - جەكە اۋىل شارۋاشىلىعى ونىمدەرىنە ارنالعان قامبا، جاي تاۋارلارعا ارنالعان قامبا، يمپورتتىق الدىن الا قوراپتالعان ازىق - تۇلىككە ارنالعان قامبا بولىپ بولىنەدى؛ 2 - دارەجەلى ساۋدا بازارىنىڭ نەگىزگى يقۋاتى تاۋاردى كورمەلەپ ساتۋ، ەسەپ جابۋ، ساۋدالىق كەڭەس وتكىزۋ بولىپ، وندا جۇڭگو جاقتا كورمەلەپ ساتاتىن جالپى 128 بولمە بار ٴارى قاتىستى بىرلەسىپ تەكسەرۋ ورىندارىنىڭ كەڭسە رايونى، سونداي - اق شەكارا تۇرعىندارىنىڭ مالىمدەۋ، ەسەپ جابۋ رايونى ورنالاستىرىلعان. 

«قورعاس شەكارا تۇرعىندارىنىڭ ٴوزارا بازارشىلاۋ ساۋدا رايونى ٴبىر ورىندا ساتىپ الۋ، مالىمدەۋ، ەسەپ جابۋ كاسىبىن جۇرگىزەتىن، شىن مانىندەگى <ٴبىر ورىندا قىزمەت ەتۋ> ۇلگىسىندەگى حالىقارالىق ساۋدا تۇعىرى سانالادى، بۇل جەرگىلىكتى ورىننىڭ جانە ماڭايداعى مەملەكەتتەردىڭ مول اۋىل شارۋاشىلىق قوسىمشا ونىمدەرىنىڭ، مال شارۋاشىلىعى سياقتى ساپالى ونىمدەرىنىڭ يمپورت - ەكسپورت ساۋداسىن ونان ارى جەبەيدى» دەدى قورعاس شەكارا تۇرعىندارىنىڭ ٴوزارا بازارشىلاۋ ساۋدا رايونىندا جۇمىس جۇرگىزەتىن كاسىپورىن، قورعاس كايجيان توبى شەكتى سەرىكتەستىگىنىڭ جاۋاپتىسى ان شينلۇڭ.

قورعاس كەدەن تەكسەرۋ 2 - ٴبولىمىنىڭ باستىعى حاميت سامەت بىلاي دەدى: «شەكارا تۇرعىندارىنىڭ ٴوزارا بازارشىلاۋ ساۋدا رايونىندا يمپورت تاۋارلارىنا قاراتا سالىق الماۋ، شەكتەلگەن سالالار تىزىمدىگىنە ەنگىزبەۋ سىندى باسقارۋ شاراسى قولدانىلادى، ماڭايداعى 18 مەملەكەتتىڭ كەدەندىك تەكسەرۋ، كارانتيندەۋ تالابىنا ۇيلەسەتىن تاۋارلارى تۇگەلدەي شەكارا تۇرعىندارىنىڭ ٴوزارا بازارشىلاۋ ساۋدا رايونى ارقىلى ەل ىشىندەگى بازارعا كىرگىزىلەدى. شەكارا تۇرعىندارىنىڭ ٴوزارا بازارشىلاۋ ساۋدا بازارى رەسمي ىسكە قوسىلعاننان كەيىن ەلىمىز تۇرعىندارىنىڭ شەكارا تۇرعىندارى سالاۋاتىمەن يمپورت - ەكسپورت ساۋداسىنا قاتىناسۋىنا بولادى، ٴار ادامنىڭ كۇنىنە 8 مىڭ يۋاندىق باجىسىز تاۋاردى الىپ رايوننان شىعۋىنا بولادى، ەل ىشىندەگى ساۋدا باجىسىن تولەگەننەن كەيىن تاعى 2 - رەت ساۋدا جاساي الادى». 

ۇعىسۋعا قاراعاندا، قورعاس شەكارا تۇرعىندارىنىڭ ٴوزارا بازارشىلاۋ ساۋدا رايونى 1992 - جىلى اشىلىپ، 2008 - جىلى شەكارا تۇرعىندارىنىڭ ٴوزارا بازارشىلاۋ ساۋدا رايونىنىڭ يمپورت - ەكسپورت ساۋدا مولشەرى ەڭ جوعارى شەككە جەتىپ، تۇتاس جىلداعى ساۋدا سوماسى 240 ميلليون دوللارعا جەتكەن. قورعاس شەكارا وتكەلىنىڭ يمپورت - ەكسپورت ساۋداسىنىڭ بىرتىندەپ كولەمدەنۋىنە بايلانىستى، شەكارا ساۋداسىنا قاتىناساتىن تۇلعالار بىرتىندەپ شەكارا تۇرعىندارىنان يمپورت - ەكسپورت ساۋدا كاسىپورىندارىنا ويىسقان، شەكارا تۇرعىندارىنىڭ ٴوزارا بازارشىلاۋ ساۋدا رايونىنىڭ ساۋداسى بىرتىندەپ السىرەپ، 2010 - جىلى كاسىبىن ۋاقىتشا توقتاتقان. 2019 - جىلى مەملەكەتتىك كەڭەس شەكارا تۇرعىندارىنىڭ ٴوزارا بازارشىلاۋ ساۋدا رايونىنىڭ تيپن وزگەرتىپ، دارەجەسىن جوعارىلاتۋ ٴتيىمدى ساياساتىن شىعارعان، قورعاس قالاسى وسى ورايدى مىقتى يگەرىپ، 2 جىلدىق قۇرىلىس جۇرگىزۋ ارقىلى قازىرگى فۋنكتسياسى تولىق وسىزاماندانعان شەكارا تۇرعىندارىنىڭ ٴوزارا بازارشىلاۋ ساۋدا رايونىن قايتادان ىسكە قوسقان.