شينجياڭعا كىرىپ - شىعاتىن 3 - جوعارى جىلدامدىقتى تاس جول ۇلكەن ارناسى قالىپتاستى

شينجياڭ گازەتىنىڭ حابارى (ٴتىلشى لۋ فىڭباۋ). اۆتونوميالى رايوندىق قاتىناس - تاسىمال مەڭگەرمەسىنەن ۇعىسۋىمىزشا، 8 - ايدىڭ 30 - كۇنى تۇستەن بۇرىن يىتىمبۇلاقتان چارقىلىققا دەيىنگى جوعارى جىلدامدىقتى تاس جولدا اۆتوكولىك قاتىناپ، G30 لەنياسىنداعى ليانيۇنگاڭ − قورعاس جوعارى جىلدامدىقتى تاس جولىنان، G7 لەنياسىنداعى بەيجيڭ − شينجياڭ جوعارى جىلدامدىقتى تاس جولىنان كەيىنگى شينجياڭعا كىرىپ - شىعاتىن 3 - جوعارى جىلدامدىقتى تاس جولدىڭ ۇلكەن ارناسىنا اينالعان.

يىتىمبۇلاق − چارقىلىق جوعارى جىلدامدىقتى تاس جولىنىڭ تۇتاس لەنياسى چارقىلىق اۋدانىنىڭ ىشىندە، جالپى ۇزىندىعى 294 كيلومەتر، مەملەكەتتىڭ ماڭىزدى جوعارى جىلدامدىقتى تاس جولى، وڭتۇستىكتە يىتىمبۇلاق قالاشىعىنىڭ شىعىسىنان 3 كيلومەتر كەلەتىن جەردەن باستالىپ، باشقورعاننان، ميلاننان ٴوتىپ سولتۇستىكتە چارقىلىق اۋدان قالاشىعىنىڭ سولتۇستىگىندەگى G218 لەنياسىمەن تۇتاسادى، جوعارى جىلدامدىقتى تاس جول ولشەمى بويىنشا سالىنعان، جوباداعى ساعاتتىق جىلدامدىعى 120 كيلومەتر. نىسان بويىنداعى تاۋ قويناۋىنداعى كۇردەلى ادىرلى ٴوڭىر بولىگىنىڭ تەڭىز دەڭگەيىنەن ورتاشا بيىكتىگى 3300 مەترگە تايايدى، ەلسىز مەكەندى كەسىپ وتەدى، گەولوگيالىق ورتاسى كۇردەلى، جاراتىلىستىق ورتاسى سۇركەيلى. 

قۇرىلىس بارىسىندا بارلىق قۇرىلىسشىلار قۇبا ٴتۇزدى ەندەي ٴوتىپ، ٴشول دالانى باسىپ، تاۋ اسىپ، تاس باسىپ، توتەنشە سۇركەيلى، جاپالى جاراتىلىستىق ورتانى جەڭىپ، مىڭ تاۋلىككە جۋىق ۋاقىت ەرلىكپەن شايقاس جاساپ، يىتىمبۇلاق − چارقىلىق جوعارى جىلدامدىقتى تاس جولىندا اۆتوكولىك قاتىناۋدى جۇزەگە اسىردى.

يىتىمبۇلاق − چارقىلىق جوعارى جىلدامدىقتى تاس جولىندا اۆتوكولىك قاتىناعاننان كەيىن، يىتىمبۇلاق ارقىلى شينجياڭعا كىرەتىن اۆتوكولىكتەر چارقىلىق، چەرشەن، حوتان، اۋەلى، قاشقار سياقتى جەرلەرگە جوعارى جىلدامدىقتى تاس جولمەن توتە بارا الادى. سونىمەن بىرگە يىتىمبۇلاق − چارقىلىق جوعارى جىلدامدىقتى تاس جولى سولتۇستىكتە لوپنۇردان چارقىلىققا دەيىنگى جوعارى جىلدامدىقتى تاس جولمەن، G0711 لەنياسىنىڭ ۇرىمجىدەن لوپنۇرعا دەيىنگى جوعارى جىلدامدىقتى تاس جولىمەن تۇتاسىپ، S21 لەنياسىنىڭ التايدان ۇرىمجىگە دەيىنگى جوعارى جىلدامدىقتى تاس جولىمەن تۇتاسىپ، يىتىمبۇلاقتان التايعا دەيىنگى وڭتۇستىك، سولتۇستىك شينجياڭ جوعارى جىلدامدىقتى تاس جولى ۇلكەن ارناسىن قالىپتاستىردى.

«يىتىمبۇلاق − چارقىلىق جوعارى جىلدامدىقتى تاس جولىندا اۆتوكولىك قاتىناپ، شينجياڭعا كىرىپ - شىعاتىن 3 - جوعارى جىلدامدىقتى تاس جول ۇلكەن ارناسىن قالىپتاستىرىپ، مەملەكەت پەن شينجياڭنىڭ تاس جول تورىن اناعۇرلىم كەمەلدەندىردى. قازىرگە دەيىن رايونىمىزدىڭ جوعارى جىلدامدىقتى تاس جولىنىڭ ۇزىندىعى 7500 كيلومەتردەن اسىپ، جوعارى جىلدامدىقتى تاس جول تورىنىڭ نەگىزگى قاڭقاسى اناعۇرلىم كەمەلدەنىپ، شينجياڭ ىشىندە شەڭبەر قالىپتاستىرۋدى، شينجياڭعا كىرىپ - شىعۋدى تەزدەتۋدى، وڭتۇستىك - سولتۇستىك شينجياڭدى ىركىلىسسىزدەندىرۋدى، شەكارادان كىرىپ - شىعۋدى بايلانىستىرۋدى بارىنشا ىلگەرىلەتىپ، جىبەك جولى ەكونوميكالىق بەلدەۋى وزەكتى رايونى قۇرىلىسىن ىلگەرىلەتۋ، توڭىرەكتەگى ەلدەرمەن بايلانىسۋدى، تۇتاسۋدى جەبەۋ، شينجياڭنىڭ، اسىرەسە، وڭتۇستىك شينجياڭ ٴوڭىرىنىڭ ەكونوميكاسىنىڭ، قوعامىنىڭ جوعارى ساپالى دامۋىن ىلگەرىلەتۋ جونىنەن ماڭىزدى رولعا يە»، - دەدى اۆتونوميالى رايوندىق قاتىناس - تاسىمال مەڭگەرمەسى پارتكومىنىڭ ورىنباسار شۋجيى، مەڭگەرمە باستىعى اسەنجان احمەت.