سۋرەتتە: شاڭحاي قالالىق الەۋمەتتىك دەنساۋلىق ساقتاۋ كلينيكالىق ورتالىعىنىڭ قاتىستى جاۋاپتىسى وركەشكە داڭق كۋالىگىن بەرۋدە. سۋرەتتى وركەش قامداعان

ٴتىلشىمىز ليۋ چۇنشيڭ حابارلايدى. شاڭحايداعى ىندەت بۇكىل ەل حالقىنىڭ نازارىن اۋداردى، جىجياڭنىڭ ي - ۋ قالاسىندا تۇراتىن ىلەلىك ۇيعىر ازامات وركەش كايبي كومەككە نان اتادى. 4 - ايدىڭ 3 - كۇنى ول ٴوز كولىگىمەن 700 ناندى شاڭحاي قالالىق الەۋمەتتىك دەنساۋلىق ساقتاۋ كلينيكالىق ورتالىعىنىڭ ەمدەۋ قىزمەتكەرلەرى مەن جول بويىنداعى تەكسەرۋ پۋنكتىندەگى حالىق ساقشىلارىنىڭ قولىنا جەتكىزىپ، ٴىس جۇزىندىك ارەكەتى ارقىلى ىنتىماقتى، ٴتاتۋ - ٴتاتتى، ٴوزارا كومەكتەسەتىن جۇڭحۋا ۇلتىنىڭ ٴداستۇرلى تاماشا ٴمورالىن ايگىلەدى. 

بيىل 2 - ايدىڭ ورتا شەنىندە، وركەش قۇلجا قالاسىنان جىجياڭنىڭ ي - ۋ قالاسىنا بارىپ، دوستارىمەن بىرلەسىپ تىكە تارالىمدا زات ساتۋ ساۋداسىن باستاعان. ول ٴار كۇنى قاربالاس بولعانىمەن ەل ٴىشى حابارلارىنا نازار اۋداراتىن. شاڭحايداعى ىندەت جاعدايىنىڭ اۋىرلىعىن بىلگەن ول تاعات تاپپاي، ىندەتتەن ساقتانۋ - تىزگىندەۋدىڭ الدىڭعى شەبىندە شايقاس جاساپ جاتقان ەمدەۋ قىزمەتكەرلەرى مەن مىندەت وتەپ جاتقان حالىق شاقشىلارىنا نان تارتۋ ەتىپ، ولارعا مەيىرىم جەتكىزۋ بەكىمىنە كەلەدى. «ىندەتتەن ساقتانۋ - تىزگىندەۋ ٴىرى ٴىس، شاڭحاي مەن ي - ۋ قالاسىنىڭ اراسى ونشا الىس ەمەس، قول قۋسىرىپ قاراپ وتىرعاندى ٴجون كورمەدىم»، - دەدى وركەش.

3 - ايدىڭ 31 - كۇنى وركەش شاڭحاي قالالىق الەۋمەتتىك دەنساۋلىق ساقتاۋ كلنيكالىق ورتالىعىمەن نان تارتۋ ەتۋ، مەيىرىم جەتكىزۋ ٴىسىن كەلىسكەننەن كەيىن، نانعا تاپسىرىس بەرۋگە كىرىسەدى. قىسقا ۋاقىت ىشىندە ىلەدەن ونشالىقتى كوپ نانعا تاپسىرىس بەرە المايتىن بولعاندىقتان، ول ي - ۋ قالاسىنداعى ىلەدەن كەلگەن نان ساتاتىن جەرلەسىن ىزدەپ تاۋىپ، وعان ٴوز ويىن جەتكىزگەننەن كەيىن، ول تەز ارادا 700 نان جاۋىپ، سىرتىنا «شينجياڭ ىلە وبلىسىنىڭ مەيىرىم جەتكىزۋ نانى» دەگەن جازۋ جازىلعان جاشىككە سالىپ بەرەدى. 

4 - ايدىڭ 3 - كۇنى ساعات 6 مولشەرىندە وركەش دوسىنىڭ كولىگىن سۇراپ الىپ، 700 ناندى تيەپ ي - ۋ قالاسىنان شاڭحايعا اتتانادى. وركەش ٴاربىر تەكسەرۋ پۋنكتىنە بارعاندا ناندى حالىق ساقشىلارىنا بەرىپ، «جاپا شەكتىڭىزدەر، بۇل ناندار مەنىڭ ازعانتاي كوڭىلىم، سىزدەر ىندەتتەن ساقتانۋ - تىزگىندەۋدىڭ الدىڭعى شەبىندە شايقاس جاساپ جاتىرسىزدار، تاماق ىشۋگە مۇرسالارىڭىز تيمەگەن كەزدەردە جۇرەك جالعاڭىزدار!» دەيدى. 

ساعات 11 مولشەرىندە وركەش قالعان 500 ناندى شاڭحاي قالالىق الەۋمەتتىك دەنساۋلىق ساقتاۋ كلينيكالىق ورتالىعىنىڭ ەمدەۋ قىزمەتكەرلەرىنىڭ قولىنا جەتكىزدى. شاڭحاي قالالىق الەۋمەتتىك دەنساۋلىق ساقتاۋ كلينيكالىق ورتالىعىنىڭ جاۋاپتىسى وركەشكە داڭق كۋالىگىن بەرىپ، العىس ايتىپ بىلاي دەدى: «شاڭحاي قالالىق الەۋمەتتىك دەنساۋلىق ساقتاۋ كلينيكالىق ورتالىعىنىڭ ەمدەۋ ىستەرىنە كوڭىل بولگەنىڭىزگە جانە قولداۋ كورسەتكەنىڭىزگە العىس ايتامىن». ول جۇمىسى بىتكەن سوڭ كوپ ايالداماي ي - ۋعا قايتىپ كەتەدى. 

مەيىر باعىشتاۋ جولى ماڭگى توقتامايدى، بۇل وركەشتىڭ بيىلعى 3 ـ رەتكى نان جەتكىزۋ ارقىلى كومەك كورسەتۋى. وسىدان بۇرىن ول 1 - ايدىڭ 13 - كۇنىنەن 21 - كۇنىنە دەيىن قۇلجا قالاسىنان جولعا شىعىپ، جەكە اۆتوكولىكپەن جالپى 6 مىڭ 800 كيلومەتر جول باسىپ، شي ـ ان قالالىق 1 ـ شيپاحانانىڭ ەمدەۋ قىزمەتكەرلەرىنە 3 مىڭ نان جانە 2 جاشىك انار جەتكىزگەن ەكەن؛ 1 - ايدىڭ 8 - كۇنى ول تاعى اۆتوكولىگىمەن قورعاس قالالىق حالىق شيپاحاناسىنىڭ ەمدەۋ قىزمەتكەرلەرىنە 500 مەيىر باعىشتاۋ نانىن  جەتكىزىپتى. 

وسىنداي قاراپايىم ىزگى ىستەرى جونىندە ٴسوز قوزعاعاندا، 4 ـ ايدىڭ 6 ـ كۇنى تۇستەن بۇرىن وركەش ٴۇنحات ارقىلى «ىندەت كەزىندە ٴار ۇلت حالقى اناردىڭ دانىندەي تىعىز ۇيىسۋى كەرەك، ٴبارىمىز بىرگە قۇلشىنساق بولعانى جەڭە المايتىن قيىنشىلىق بولمايدى»، ـ دەدى.