”سەن جولىققان قيىنشىلىقتى ٴبىز قول ۇستاسا جەڭەمىز!“
اشىلىبۇلاق قىستاعىنىڭ ناۋقاسقا شالدىققان تۇرعىنى مەيىرگە بولەندى
ساۋ يۋەمەي، فىڭ جانبو (ٴوز تىلشىلەرىمىز)
4 - ايدىڭ 6 - كۇنى كەشتە 59 جاستاعى قازاق ازاماتى جالەل ٴابدىراحمان ۇلى ىلە وبلىستىق دوستىق شيپاحاناسى وسپە اۋرۋلار ٴبولىمىنىڭ سىرتقى كاريدورىنىڭ تامىنا سۇيەنىپ، تەرەزە سىرتىنداعى جارقىراعان سانسىز شىراقتارعا كوز سالعانىمەن، ونىڭ كوڭىلىن ۋايىم مەڭدەتكەندەي ەدى. ايەلى كاميلا ايىپقان قىزى ۇيىقتاپ قالعاندا، ول سىرتقا شىعىپ ٴبىر تىنىش جەر تاۋىپ، ٴوزىن سابىرعا شاقىرىپ، ٴبىر ٴسات كوڭىل كۇيىن تىنىشتاندىرماقشى بولدى. جارىم ايدان بەرى جالەلدىڭ وتباسىنا تونگەن كەلەڭسىزدىك ونى كوڭىل كۇي جاقتان كۇيرەتىپ كەتەردەي بولعان ەدى. ايەلى بالنيتساعا جاتقان بىرنەشە كۇننەن بەرى اقشاسى دا سۋشا جۇمسالدى، وپەراتسيا مەن سوڭعى مەزگىلدەگى ەمدەلۋ قاراجاتى ٴالى شەشىلمەدى... بۇرىننان تاتۋ - ٴتاتتى وسى وتباسىن اۋرۋ ازابى قىسپاققا الىپ، بولاشاعىن بەيمالىم كۇيگە ٴتۇسىردى، قيىنشىلىق قىسپاعىنان قالاي قۇتىلار ەكەن؟
وسىلاي ٴتۇڭىلىپ تۇرعاندا قالتاسىنداعى قولفون كەنەتتەن شىرىلداي جونەلەدى. ول قولفونىن العان ەدى، ٴبىر سالماقتى داۋىس: ”جالەل اعا، جەڭگەمنىڭ قازىرگى جاعدايى قالاي؟ قىزمەت اترەتىنىڭ مۇشەلەرى مەن قىستاق كادرلارى بىرگە سىزدەرگە جىلۋ جيناپ جاتىر، قىستاقتاعى ’مەيىربان انالار‘ ۇجىمى دا جىلۋ جيناۋدا. اقشا كوپ بولماعانىمەن، بۇل ٴبىزدىڭ بولىمسىز كوڭىلىمىز. مەن ٴسىزدىڭ وتباسىڭىزدىڭ جاعدايىن مەكەمە باسشىلارىنا مالىمدەدىم، ارتقى تىرەك ورىن دا جىلۋ جيناماقشى، قىزمەت اترەتى امالىن تاۋىپ، سىزدەر جولىققان قيىنشىلىقتى شەشپەكشى. قانداي قيىنشىلىق بولسا دا ارتىڭىزدا ٴبىزدىڭ بار ەكەنىمىزدى ۇمىتپاڭىز! “
جانارىنا جاس ىركىلگەن جالەل بەينە كەرەمەت كۇش دەم بەرگەندەي ەرىكسىزدەن ەڭسەسىن كوتەردى؛ تەلەفوندى كۇنەس اۋدانى بەستوبە اۋىلى اشىلىبۇلاق قىستاعىنىڭ ٴبىرىنشى شۋجيى، ىلە گازەتى مەكەمەسىنىڭ وسى قىستاقتا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ جاڭادان مىندەتكە تاعايىندالعان باستىعى حان شينيۇڭ بەرگەن ەدى. قىستاق تۇرعىندارىنىڭ گرۋپپا باستىعى جالەل 3 - ايدىڭ ورتا شەنىندە قىستاق تۇرعىندار كوميتەتىندە ەندى عانا مىندەتكە وتىرعان حان شينيۇڭمەن بىرنەشە رەت جۇزدەسكەن - دى، سودان كەيىن ول شيپاحانادا ايەلىنە قارايلاسۋمەن ابىگەر بولىپ كەتتى، ەكەۋى ٴجوندى اڭگىمەلەسە دە الماعان ەدى، ٴتىپتى، ىشكەرىلەي تانىسىپ تا ۇلگىرمەگەن بولاتىن. ول قيىنشىلىق قىسپاعىندا قالعان كەزدە جاڭادان قىزمەتكە كەلگەن شۋجي تەلەفون سوعىپ، ومىرگە دەگەن ٴۇمىتىن قايتا مازداتاتىنىن ويلاماعان ەدى.
ٴوزى مەن ايەلىنە ٴتىپتى دە كوپتەگەن ادامداردىڭ كوڭىل بولەتىنىن ويلاپ تا كورمەگەن ەدى. وسىدان كەيىنگى بىرنەشە كۇندە كوپتەگەن كونە دوستارى ارت - ارتىنان كەلىپ حال سۇرادى، ولار ٴتۇرلى قورەكتىك زاتتاردى الا كەلۋمەن بىرگە، جالەلدىڭ قالتاسىنا اقشالارىن سالىپ، كوڭىل سۇراعان جىلى سوزدەرىن ايتىپ، ونىڭ جابىرقاعان كوڭىلىن جۇباتتى. 30 جىلعا جۋىق قىستاق تۇرعىندارىنىڭ گرۋپپا باستىعى بولعان جالەل قىزمەت اترەتىنىڭ ٴاربىر مۇشەسىمەن بىرگە جۇمىس ىستەۋ بارىسىندا تەرەڭ دوستىق ورناتقان - دى. وسى تانىس بەينەلەردى كورگەندە جالەل مەن كاميلانىڭ كوڭىلىن كەرەمەت جىلىلىق كەرنەگەندەي بولدى. 4 - ايدىڭ 8 - كۇنى قىزمەت اترەتىنىڭ مۇشەلەرى الدىمەن باستاماشىلدىقپەن جالەلگە جىلۋ اتادى، قىستاق كادرلارى دا ارت - ارتىنان جومارتتىق ىستەدى، سول كۇنى تۇستەن كەيىن جالەل قىزمەت اترەتىنىڭ 26 مۇشەسى مەن قىستاق كادرلارى اتاعان 2200 يۋان اقشانى تاپسىرىپ الدى.
4 - ايدىڭ 9 - كۇنى اشىلىبۇلاق قىستاعىنىڭ ”مەيىربان انالار“ ۇجىمى دا جىلۋ اتاۋ قيمىلىن باستايدى، كوپشىلىك كاميلاعا جابال كومەك قولىن سوزدى، قىسقا عانا ٴبىر ساعاتتا 63 ادام 1490 يۋان جىلۋ اتادى. ”مەيىربان انالار“ ۇجىمىنىڭ مۇشەسى زىبيلا راحمەتبەك قىزى بىلاي دەدى: ”جالەل اعا سوڭعى جىلدارى قىستاق تۇرعىندارىنا بار ىنتا - پەيىلىمەن قىزمەت ەتىپ كەلدى، قازىر كاميلا اۋرۋعا كىرىپتار بولدى، ٴبىز ولاردىڭ قيىن وتكەلدەن وتۋىنە كومەكتەسەمىز“.
اشىلىبۇلاق قىستاعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ ارتقى تىرەگى رەتىندە ىلە گازەتى مەكەمەسى جىلۋ اتاۋ قيمىلىن بەلسەنە ۇيىمداستىردى، قىسقا عانا 2 كۇندە ىلە گازەتى مەكەمەسى بويىنشا جيىنى 9700 يۋان جىلۋ جينالدى. بۇل جىلۋ اقشا ىلە وبلىستىق قىزىل كرەست قوعامى ارقىلى كاميلانىڭ قولىنا تابىس ەتىلمەكشى.