تىلشىلەرىمىز حۋاڭ يان، پاتيما، سۇن ي - نان حابارلايدى. نارەستەنىڭ ىڭگالاپ جىلاعان ۇنىمەن كەزەكشى اۆتوموبيلدەگى ۋاڭ دان جانە بوسانعان ايەل قاليميرا ىبىرايىم قاتارلىلار تەرەڭ ٴبىر تىنىستاپ قالعانداي بولدى.

11 - ايدىڭ 28 - كۇنى جوعارى قارقىندى تاس جولدا كەلە جاتقان كەزەكشى اۆتوموبيلدە اي - كۇنى تولماعان ٴبىر ايەلدىڭ كەنەتتەن تولعاعى جيىلەدى، وسى اۆتوموبيلدەگى موڭعۇلكۇرە اۋداندىق پارتكوم پارتيا مەكتەبىنىڭ ايەل وقىتۋشىسى، 90 - جىلداردىڭ تۇلەگى ۋاڭ دان بوساندىرۋشى بولىپ، جۇكتى ايەلدىڭ ٴساتتى بوسانۋىنا، ٴسابيدىڭ امان - ەسەن دۇنيەگە كەلۋىنە كومەكتەستى.

”كومەك قولىن سوزعان بويجەتكەنگە العىسىم شەكسىز، ەگەر ول بولماعاندا قىزىم قاتتى قينالاتىن ەدى. ونىڭ ىستەرىنىڭ ٴساتتى بولۋىن تىلەيمىن! “ دەدى 11 - ايدىڭ 29 - كۇنى قۇلجا اۋداندىق حالىق شيپاحاناسىنىڭ تۋىت ٴبولىمى بولنيتساسىندا بوسانعان ايەلدىڭ اناسى گۇلسىماي ماسۇم تەبىرەنە.

سول كۇنى ٴتىلشى شيپاحانانىڭ جاڭا تۋعان نارەستەلەردى باقىلاۋ بولمەسىنەن شالا تۋىلعان نارەستەنىڭ جىلۋ ساقتاۋ ساندىعىندا تىنىش جاتقانىن، ەمدەۋ قىزمەتكەرلەرىنىڭ ونى بارىنشا كۇتىمدەپ جاتقانىن كوردى.

”ول كەزدە قورىققانىمنان ەكى اياعىمدا جان قالمادى، الايدا پارتيا مۇشەسى بولعان مەنىڭ شەشۋشى ساتتە شەگىنشەكتەۋىمە بولمايتىن ەدى“ دەدى ۋاڭ دان. ۇيلەنبەگەنىن بىلاي قويعاندا، شيپاگەر دە ەمەس - تى، ٴبىراق قاتەرلى جاعدايدا ونىڭ باتىلدىق كورسەتۋى كەرەك بولدى.

11 - ايدىڭ 28 - كۇنى 6 جولاۋشى وتىرعان كەزەكشى اۆتوموبيل موڭعۇلكۇرە اۋدانىنان قۇلجا قالاسىنا بەت الادى. جۇكتى ايەل قاليميرا ىبىرايىم كەنەت قاباعىن ٴتۇيىپ، ٴالسىن - ٴالى قولىمەن بەلىن ۇستاپ مازاسىزدانادى. قاسىندا وتىرعان ۋاڭ دان وعان ٴجىتى نازار اۋدارىپ، قامقورلىق جاساپ وتىردى.

”قيىن بولدى، باس سۋى جارىلىپ كەتتى! ۋاڭ دان كەنەت ايعايلاپ جىبەردى، اۆتوموبيلدەگى ادامدار دا شوشىپ كەتتى. شوفەر اۆتوموبيلدى دەرەۋ جول شەتىنە توقتاتتى، ەرلەر ماشينادان ٴتۇسىپ، ايەلدەر بوسانعان ايەلگە قارايلاسىپ قالدى.

”تەرەڭ تىنىس ال، كۇشەن، قورىقپا، بالانى جەردەن مەن كوتەرىپ الامىن...“ نارەستەنىڭ باسى كورىنگەنىن بايقاعان ۋاڭ دان قيىن - قىستاۋ ساتتە ساسقالاقتاماي، سابىر ساقتاپ، دەرەۋ ٴوزىنىڭ مامىق كيىمىن شەشىپ بوسانعان ايەلدىڭ ۇستىنە جاۋىپ، ەكى قولىن بوسانعان ايەلدىڭ استىنا اپارىپ بالانى الۋعا دايىندالدى، سونداي - اق بوسانعان ايەلگە ٴالسىن - ٴالى دەم بەرىپ وتىردى، باسقالار دا قاعاز ورامال سياقتى زاتتاردى دايىنداپ جابىلا كومەكتەسىپ جاتتى.

اۋدەم ۋاقىت جانتالاستان كەيىن بالا دا جارىق دۇنيەگە كەلدى، كوپشىلىكتىڭ كوڭىلى جاي تاپقانداي بولدى. ”بالا نەگە جىلامايدى؟“ ۋاڭ دان نارەستەنى كوتەرىپ العاندا جاعدايدىڭ باسقاشا ەكەنىن سەزدى، بۇل ٴىس كوپشىلىكتىڭ كوڭىلىن تاعى دا قوبالجىتتى. قىسىلتاياڭ ساتتە، ”تۋىت ٴۇيىنىڭ“ سىرتىندا كۇتىپ تۇرعان ەر جولاۋشىلار قۇتقارۋ اۆتوموبيلىمەن بىرگە سول جەرگە بارا جاتقان قۇلجا اۋداندىق حالىق شيپاحاناسى تۋىت ٴبولىمىنىڭ شيپاگەرى باي فاڭنىڭ تەلەفونىن قابىلدايدى. باي فاڭنىڭ تەلەفوندا ۋاڭ دانعا جەتەكشىلىك ەتۋىندە ول وكشەسىن قىتىقتاۋ، ارقاسىن سيپاۋ سياقتى شۇعىل شارالار ارقىلى جاڭا تۋعان نارەستەنى قۇتقارىپ قالدى.

”جىلاي عوي، بالام، جىلاي عوي، زارەمىزدى ۇشىرماشى، قانە جىلاي عوي! “ ۋاڭ دان نارەستەنى تەز - تەز ٴسۇرتىپ العاننان كەيىن، جوتاسىن قاققىلاپ، ساسقالاقتاي ٴۇن قاتىپ، كوپشىلىكتىڭ كومەگىندە قالىڭ كيىممەن جاڭا تۋعان نارەستەنى وراپ الادى.

بارىن سالا ٴجۇرىپ، كوپشىلىكتىڭ دەگبىرسىزدەنە كۇتكەن ۇمىتىندە، ”تۋىت بولمەسىنەن“ نارەستەنىڭ جىلاعان داۋىسى شىقتى، كوپشىلىكتىڭ جۇزىنە كۇلكى، ۋاڭ داننىڭ كوزىنە جاس ٴۇيىرىلدى. اۆتوموبيل ٴىشىنىڭ شارت - جاعدايى شەكتى بولعاندىقتان، ۋاڭ دان شيپاگەردىڭ جەتەكشىلىگىندە سۋلياۋ قالتانى ەسىپ ٴجىپ جاساپ، كىندىگىن بايلاپ، ينفەكسيالانۋدان ساقتاندى.

بالا تۋىلىپ، اۆتوموبيل جوعارى قارقىندى تاس جولدىڭ قاس وزەنىنىڭ شىعىس اقى الۋ پۋنكتىنە جەتكەندە قۇلجا اۋداندىق حالىق شيپاحاناسىنىڭ قۇتقارۋ اۆتوموبيلى انالى - بالالى ەكەۋىن قابىلداپ الدى، ۋاڭ دان اقىرىنا دەيىن سەرىك بولىپ، انا مەن بالانىڭ اماندىعىنا ابدەن كوزى جەتكەننەن كەيىن عانا ٴوز جونىنە كەتتى.

سۋرەتتە: نارەستەلەر ٴبولىمىنىڭ باقىلاۋ بولمەسىندە قامقورلىققا الىنعان نارەستە. سۇن ي - نان فوتوسى