汉文 ىلە اقپارات تورابىنا حوش كەلدىڭىزدەر!
”ءبىز ءومىر بويى جاقسى ۇستاز - شاكىرت بولامىز“
2021-11-11 22:50:16     كورىلىم:رەت كەلۋ قاينارى:تيانشان تورى  جاۋاپتى رەداكتور:جازيرا بولاتباي قىزى

انار بۇلت / شينجياڭ گازەتىنىڭ ءتىلشىسى ياڭ شۋحان


كۇن شۋاعىن توگىپ تۇر، اسپان شايداي اشىق، 10 - ايدىڭ 27 - كۇنى اۆتونوميالى رايوندىق كەن تاۋ شۇعىل جاعدايعا توتەپ بەرۋ بويىنشا قۇتقارۋ - كومەكتەسۋ باس اترەتىنىڭ ۇلكەن اۋلاسىنا بارعانىمىزدا كۇزگى اعاش ەگۋ دابىرالى جۇرگىزىلىپ جاتىپتى. كوپشىلىك جۇمىس ءبولىسى بويىنشا سەلبەسىپ، كۇرەك ۇستاپ توپىراق كۇرەپ، قالامشا تىكتەپ، اعاش ەگىپ، سۋارىپ جاتىر، كوز الدىڭىزعا دۋماندى ەڭبەك كورىنىسى كەلەدى.

”بۇل اعاشتى ەككەندە توپىراقتى اعاش قالامشاسىنىڭ توڭىرەگىنە تەگىستەپ تولتىرىپ، سوڭىندا اياقپەن تاپتاۋ كەرەك“. قۇتقارۋ - كومەكتەسۋ باس اترەتىنە توتە قاراستى (ەرەكشە مىندەت وتەۋشى) ورتا اترەت 2 - شاعىن اترەتىنىڭ 45 جاستاعى جەتەكشىسى ءماردان نامان شاكىرتى حوۋ جياڭيمەن بىرگە اعاش ەگىپ جاتىر ەكەن. حوۋ جياڭي كۇرەكپەن توپىراق تاستاپ، ءماردان اياعىمەن تاپتاپ جاتتى.

ەكەۋى قىزمەتتەس بولعان 5 جىلدان استام ۋاقىتتا ءماردان اعاش ەگۋ تاجىريبەسىن ۇيرەتىپ قالماستان، اۋەل باستان - اق اق كوڭىل دە مومىن حوۋ جياڭيدى ءوز ىنىسىنە بالاپ كەلگەن بولاتىن.

2016 - جىلى 21 جاستاعى حوۋ جياڭي ءماردان تۇرعان شاعىن اترەتكە بولىنەدى، ءمارداننىڭ وزىنە ۇستاز بولىپ بەلگىلەنگەنىن بىلگەن كەزدە حوۋ جياڭي: بۇل اعايىمنىڭ پۋتۇڭحۋا سويلەۋى جاقسى ەمەس ەكەن، ول ماعان نە ۇيرەتە الار دەيسىڭ، - دەپ ەكى ۇداي بولعان ەدى.

ءبىراق ونىڭ بۇل ويى كوپ وتپەي - اق وزگەردى.

” ءبىر جولى قۇتقارۋ - كومەكتەسۋ جابدىعىنىڭ وتتەگى تىنىس الدىرۋ اسپابىن كۇتىمدەگەن كەزدە جۋىقتا عانا تەكسەرىلگەندىكتەن، مەن انشەيىن ءبىر كورىپ قانا قويا سالعان بولاتىنمىن، ناتيجەدە ۇستازىم مۇنى بايقاپ قالىپتى“. حوۋ جياڭي ءوزىنىڭ جالقاۋلىعى بايقالىپ قالعانىن ەسىنە الىپ: ”جايشىلىقتا اشىق - جارقىن جۇرەتىن ۇستازىم اشۋلى بەينەمەن وتتەگى تىنىس الدىرۋ اسپابىن الىپ شىعىپ، وزىمە قايتادان مۇقيات تەكسەرتىپ شىقتى“، - دەدى.

”جايشىلىقتا ىستەتىلە قويمايتىنى راس، ءبىراق ىستەتىلە قالسا، بۇل سەنىڭ جانىڭا اراشا بولادى“، - دەيدى ءماردان ونى جازعىرا سويلەپ، - ”ەگەر تىنىس الدىرۋ اسپابىندا ماسەلە بولسا، قۇدىق تۇبىندە ءوز ومىرىڭە حاۋىپ تونۋمەن بىرگە، باسقا دا قۇتقارۋ - كومەكتەسۋگە ىقپال جەتكىزەسىڭ، مۇنىڭ بوداۋى وتە زور“.

ءمارداننىڭ بۇل ءسوزىن حوۋ جياڭي ەسىندە بەرىك ساقتادى. سودان باستاپ حوۋ جياڭي ءاربىر ءىستى مۇقيات، ىجداعاتتى ىستەيتىن، تيتتەي دە كومەسكى قاتەردى قاعىس قالدىرماي قاداعالايتىن بولادى. قۇلشىنا ۇيرەنەتىن بۇل شاكىرتىنە ءماردان دا ەرەكشە ءمان بەرە باستايدى.

حوۋ جياڭي ءبىر ءۇيدىڭ جالعىزى بولاتىن، وقۋ تاۋىسقاننان كەيىن قۇتقاۋ - كومەكتەسۋ باس اترەتىنە قىزمەتكە كەلگەن ول بۇل جەردە كوللەكتيۆتىڭ مەيىر - شاپاعاتىن سەزىنۋمەن بىرگە، اكەسىندەي ايالاعان ءمارداننىڭ شىنايى قامقورلىعىنا بولەنەدى. ”ول مەنى ۇنەمى شابىتتاندىرىپ، قىزمەتىمىز قاراماققا وتە قاراپايىم كورىنگەنىمەن، قىسىلتاياڭ شاقتا ادام قۇتقارامىز، بۇل ەرەكشە ۇلىلىق قوي دەيتىن، ءار رەت قىزمەت بارىسىندا شارشاپ - شالدىققاندا نەمەسە ۇمىتسىزدەنگەن كەزىمدە ۇستازىمنىڭ شابىتتاندىرۋىن ويلاسام، تۇلا بويىمدى كۇش كەرنەيدى“، - دەيدى حوۋ جياڭي.

ءماردان: ”حوۋ جياڭي مەنىڭ قىزمەتتەسىم، شاكىرتىم، ونان دا ماڭىزدىسى، قيىنشىلىقتى، بەينەتتى بىرگە كورەتىن جاقسى باۋىرىم“، - دەيدى.

”مەنىڭ ءمارداننان ۇيرەنەتىندەرىم وتە كوپ، ءبىز ءومىر بويى جاقسى ۇستاز - شاكىرت بولامىز“، - دەگەن حوۋ جياڭي ءوزىنىڭ ءماردان ۇيرەتكەن ءاربىر شەبەرلىكتى ەسىنە مىقتى ساقتايتىنىن ءارى بۇل شەبەرلىكتەردى جاڭادان كەلگەن جاۋىنگەر سەرىكتەرىنە ۇيرەتەتىنىن ايتا كەلىپ :”مەن ولارعا بۇل تاجىريبەلەردىڭ بارلىعىن جاقسى اعايىم ءمارداننىڭ ۇيرەتكەندىگىن ايتامىن“، - دەدى.