ٴتىلشىمىز نۇركەلدى نۇراقىن ۇلى، جاڭ جينفىڭ حابارلايدى. 7 -ايدىڭ 25 - كۇنى ىلە وبلىسىنىڭ ۇلتتار ىنتىماعى گارمون وركەسترى قوعامى قۇلجا قالاسى التىشۋار كوشەسى كورىنىس رايونىندا (بۇرىنعى سايرام الەۋمەتتىك اۋماعى) ماڭدايشالىق استى.

قيمىل تارتىمدى دا ماعىنالى بولدى. قۇتتىقتاي اتىلعان تورسىلداق ٴۇنى ىشىندە ىلە وبلىسىنىڭ ۇلتتار ىنتىماعى گارمون وركەسترى قوعامى رەسمي ماڭدايشالىق اسىپ، الاڭنان قىزۋ شاپالاق ٴۇنى كوتەرىلدى.

گارمون وركەسترىنىڭ مۇشەلەرى مەن باستاۋىش مەكتەپ وقۋشى ۋاكىلدەرى ناق مايداندا گارمون تارتىپ «ىلە ٴسىزدى قارسى الادى»، «مەن جانە وتانىم» اتتى اندەردى ورىندادى، ىلە - شالا ولار وسى ورتالىقتىڭ كەڭسەسى مەن ساباقحاناسىن ەكسكۋرسيالادى.

بۇل قوعام ىلە وبلىسى ۇلتتار ىنتىماعى گارمون وركەسترىن وزەك ەتىپ، ىلە وبلىسىنا توتە قاراستى اۋدان، قالالاردان كەلگەن حانزۋ، سىبە، قازاق، ورىس، تاتار، ۇيعۇر سياقتى 13 ۇلتتىڭ 60 نەشە گارمون اۋەسكەرىنەن قۇرالعان.

اتالعان قوعام «ٴمورالدى دا ونەرلى، كوپ نەگىزدى ۇلتتىق ەرەكشەلىككە يە وركەستر قۇرۋ» نەگىزگى ماقساتىن ۇستانىپ، ٴتۇرلى قىزمەتتەردى جاقسى ىستەپ، ىلە وبلىسى مەن قۇلجا قالاسىنىڭ ۇگىت قىزمەتى جانە ادەبيەت ـ كوركەمونەرشىلەر بىرلەستىگى، مادەنيەت ـ ساياحات توبى سياقتى قاتىستى تاراۋلار ورنالاستىرعان كونسەرتتەرگە ەڭ تاسقىنداعان ىنتا جانە ىسىلعان مۋزيكالىق ونەرمەن بەلسەنە ات سالىسىپ كەلەدى.

ىلە وبلىسى ۇلتتار ىنتىماعى گارمون وركەسترى قوعامىنىڭ باس حاتشىسى يۋان گۇيمەي بىلاي دەدى: بۇدان بىلاي ٴبىز ٴتىپتى دە كوپ الەۋمەتتىك يگىلىك قيمىلدارىن ورىستەتىپ، كونسەرتتى اۋىل ـ قالاشىقتارعا، الەۋمەتتىك اۋماقتارعا جالپىلاستىرىپ، گارمونعا اۋەس ورتا، باستاۋىش مەكتەپ وقۋشىلارى مەن قارتتاردى نەگىز ەتىپ تاربيەلەپ، گارمون ٴۇنىن ىلە وبلىسىنىڭ تۇكپىر - تۇكپىرىنە جەتكىزۋدى جوسپارلاپ وتىرمىز.

ۇعىسۋعا قاراعاندا، ىلە وبلىسى ۇلتتار ىنتىماعى گارمون وركەسترى 2019 ـ جىلى قۇرىلعان، وركەستر العاشقى 8 ادامنان دامىپ، قازىر 60 نەشە ادامعا جەتكەن، قازىرگە دەيىن 300 رەتتەن استام كونسەرت قويعان، سونداي ـ اق ورتالىق تەلەۆيزياسى مۋزيكا ارناسىنىڭ «جۇڭگونىڭ حالىق اندەرى» باعدارلاماسى مەن امبەباپ كوركەمونەر ارناسىنىڭ «التىن 100 سەكۋند» باعدارلاماسى وتكىزگەن قيمىلعا قاتىناسقان.

سۋرەتتە: گارمون قوعامى ۋاكىلدەرى «مەن جانە وتانىم» ٴانىن ورىنداۋدا.             جاڭ جينفىڭ فوتوسى