تراكتورعا تولتىرا تيەلگەن كۇرىشتەن مول ٴونىم بەينەسى بايقالادى. حۋا يانميڭ فوتوسى
ەرىكتى ٴتىلشى حۋا يانميڭ حابارلايدى. جۋىردا چاپچال سىبە اۆتونوميالى اۋدانى بەسسۇمىن قالاشىعى شولپان قىستاعىنداعى 10 مىڭ مۋلىق كۇرىش اتىزى بازاسىنداعى كۇرىشكە وراق قويىلدى. گۇرىلدەگەن 3 كومباين اتىزدا ارلى ـ بەرلى قايشالىسادى. قاتار - قاتار سالالى اتىزدارداعى كۇرىش جەبەسى كومبايننىڭ كومەيىنەن ٴوتىپ، اقتالعاننان كەيىن، تراكتورلارعا تيەلىپ تاسىلىپ جاتتى.
بەسسۇمىن قالاشىعى شولپان قىستاعىنىڭ ٴبىرىنشى شۋجيى، چاپچال اۋداندىق اۋىل شارۋاشىلىعى، اۋىل - قىستاق مەكەمەسىنىڭ وسى قىستاقتا تۇراتىن قىزمەت اترەتىنىڭ باستىعى باي جيانشين قىزمەت اترەتىنىڭ مۇشەسى مەن قىستاق ”ەكى كوميتەتى“ كادرلارىنان ۇيىمداسقان كۇزگى جيىن - تەرىنگە ەرىكتى قىزمەت وتەۋ اترەتىن باستاپ، تراكتورلارعا تيەلگەن كۇرىشتەردى كۇرەكپەن تەگىستەپ جايمالاي باستادى.
”ەگەر كۇرىشتى دەر كەزىندە تەگىستەپ جايمالاماساق، كومبايننىڭ ساندىعىنان شىققان كۇرىش تراكتور تىركەمەسىنىڭ سىرتىنا توگىلىپ، زيان تۋىلادى“. باي جيانشيننىڭ ٴسوزى اياقتاماي جاتىپ تاعى ٴبىر كومباين كەلىپ كۇرىش توكتى، ول اترەت مۇشەلەرىمەن بىرگە تاعى قاربالاس بولىپ كەتتى.
”بۇگىن قىزمەت اترەتىنىڭ مۇشەلەرى مەن قىستاق كادرلارىنىڭ كومەگىندە وتباسىمىزدىڭ كۇرىشى ٴبىر كۇندە ورىلىپ ٴبىتتى، ەشقانداي ىسىراپ بولمادى“. تراكتورعا تولتىرا تيەلگەن كۇرىشتى كورگەندە ديقان ران بياۋدىڭ جۇزىنە كۇلكى ٴۇيىرىلدى. بيىل ران بياۋ وتباسى 340 مۋ جەرگە ەككەن كۇرىشتىڭ مۋ باسىندىق ورتاشا ٴونىم مولشەرى 700 كيلوگرامنان اسىپ، مۋ باسىندىق ورتاشا كىرىسى 2300 يۋاننان اينالعان.
باي جيانشين بىلاي دەدى: ”قازىر قىستاعىمىزدا ەگىلگەن 10 مىڭ مۋ جەردەگى جوعارى ٴونىمدى كۇرىش تۇگەلدەي پىسىپ، ىركەس - تىركەس ورىلىپ جاتىر. قىزمەت اترەتىنىڭ مۇشەلەرى مەن قىستاق ’ەكى كوميتەتىنىڭ‘ كادرلارىنان ۇيىمداسقان كۇزگى جيىن ـ تەرىنگە ەرىكتى قىزمەت وتەۋ گرۋپپاسى اتىز باسىنا كەلىپ، ديقاندارعا كومەكتەسىپ، اۋىل شارۋاشىلىق ماشينالارىنىڭ شوعىرلى ورۋىنا دەر كەزىندە سايكەسىپ، كۇرىشتى قامبالاۋعا كەپىلدىك ەتتى.
چاپچال اۋداندىق اۋىل شارۋاشىلىعى، اۋىل ـ قىستاق مەكەمەسى اۋىل شارۋاشىلىق ماشينالارى كەڭسەسىنىڭ قىزمەتكەرى چۇن جىنجۇن بىلاي دەپ تانىستىردى: بيىل 9 ـ ايدىڭ سوڭىندا بۇل اۋداننىڭ كۇرىشى ورىلا باستادى، مەجەمەن 10 ـ ايدىڭ سوڭىندا مىندەت ورىندالادى. قازىر اۋدان بويىنشا 122 كومباين ىسكە قوسىلىپ، بۇكىل اۋدانداعى 86 مىڭ 500 مۋ جەردەگى كۇرىشتى ماشينامەن ورۋعا كەپىلدىك ەتىلدى.