جۇڭگو توقىماشىلىق ونىمدەرى يمپورت - ەكسپورت ساۋدا قوعامى مالىمدەمە جاريالاپ

امەريكا جاقتى شينجياڭ ونىمدەرىنە قاراتىلعان جازالاۋ، قىسىم كورسەتۋ شاراسىن كۇشىنەن قالدىرۋعا قاتاڭ قۋزادى 

شينحۋا اگەنتتىگىنىڭ 12 - ايدىڭ 25 - كۇنى بەيجيڭنەن بەرگەن حابارى. جۇڭگو توقىماشىلىق ونىمدەرى يمپورت - ەكسپورت ساۋدا قوعامى 12 - ايدىڭ 25 - كۇنى امەريكا جاقتىڭ شينجياڭعا ساياتىن زاڭ جوباسىنا قارسى تۇرۋ جونىندە مالىمدەمە جاريالاپ، امەريكا جاقتىڭ جۇڭگو شينجياڭىنىڭ توقىماشىلىق، كيىم - كەشەك قامداۋ تىزبەگى جانە وعان قاتىستى ونىمدەرى جونىندە جۇرگىزگەن ٴارقانداي شەكتەۋىنە باتىل قارسى تۇرىپ، امەريكا جاقتى ٴتۇرلى جازالاۋ، قىسىم كورسەتۋ شارالارىن كۇشىنەن قالدىرۋعا قاتاڭ قۋزادى.

امەريكا شىعىس ۋاقىتى 12 - ايدىڭ 23 - كۇنى امەريكا ايتىلمىس «ۇيعۇرلاردى زورلىقپەن ەڭبەككە سالۋدىڭ الدىن الۋ زاڭ جوباسىنا» قول قويىپ زاڭعا اينالدىرىپ، شينجياڭدا وندىرىلگەن بارلىق ونىمدەردى تۇگەلدەي ايتىلمىس «زورلىقپەن ەڭبەككە سالۋ» ونىمدەرى دەپ بەلگىلەدى ٴارى شينجياڭعا قاتىستى ونىمدەردى يمپورت ەتۋگە تيىم سالدى.

مالىمدەمەدە بىلاي دەلىندى: بۇل ارەكەت فاكتپەن، شىندىقپەن ساناسپاي، بازار پرينسيبى مەن دۇنيە جۇزىلىك ساۋدا ۇيىمى ەرەجەسىنە بۇكىلدەي قايشى كەلىپ، قالىپتى حالىقارالىق ساۋدا ٴتارتىبىن اۋىر دارەجەدە ٴبۇلدىرىپ، جۇڭگو - امەريكا ەكى ەلدىڭ توقىماشىلىق، كيىم - كەشەك كاسىپورىندارى مەن تۇتىنۋشىلاردىڭ مۇددەسىنە اۋىر دارەجەدە زيان جەتكىزىپ، بۇكىل الەمنىڭ توقىماشىلىق، كيىم - كەشەك كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن ٴبۇلدىردى، جۇڭگو توقىماشىلىق ونىمدەرى يمپورت - ەكسپورت ساۋدا قوعامى بۇعان قاتاڭ نارازىلىق بىلدىرەدى جانە باتىل قارسى تۇرادى.

مالىمدەمەدە مىنالار اتاپ كورسەتىلدى: امەريكا جاقتىڭ شينجياڭدا ايتىلمىس «زورلىقپەن ەڭبەككە سالۋ» ماسەلەسى ٴومىر ٴسۇرىپ وتىر دەپ جازعىرۋى بۇكىلدەي ويدان قۇراستىرىلعان، ونىڭ ەشقانداي فاكت نەگىزى جوق. جۇڭگو توقىماشىلىق، كيىم - كەشەك كاسىپتەرى ەڭبەكشىلەردىڭ ابىرويلى ەڭبەك ىستەۋى سياقتى ۇقىق - مۇددەسىن قورعاۋعا باستان - اياق كۇش سالىپ، بۇكىل الەمنىڭ توقىماشىلىق، كيىم - كەشەك بازارىنا ورنىقتى، جوعارى ٴونىمدى قامداۋ تىزبەگى قىزمەت وتەۋىن ازىرلەپ كەلەدى. شينجياڭنىڭ توقىماشىلىق، كيىم - كەشەك كاسىپتەرىندەگى ەڭبەكشىلەر جۇڭگونىڭ باسقا جەرلەرىندەگى بۇقارامەن بىردەي ازاماتتاردىڭ ەڭبەكپەن جۇمىستانۋ ۇقىق - مۇددەسى مەن ەكونوميكالىق دامۋ ۇقىعىنان زاڭ بويىنشا تولىق يگىلىكتەندى.

مالىمدەمەدە مىنالار ٴبىلدىرىلدى: امەريكا ۇكىمەتىنىڭ دورەكىلىكپەن قىسىم كورسەتۋى سان ميلليونداعان شينجياڭ ماقتاشىلارى مەن توقىماشىلىق جۇمىسشىلارىنا تىكە زيان جەتكىزىپ، جۇڭگونىڭ توقىماشىلىق، كيىم - كەشەك قامداۋ تىزبەگىنىڭ قالىپتى اينالىمىن ٴبۇلدىرىپ قانا قويماي، تاعى امەريكانىڭ توقىماشىلىق، كيىم - كەشەك تۇتىنۋشىلارىنىڭ، بولشەك ساتۋ ساۋداگەرلەرىنىڭ، ٴبولىپ ساتۋ ساۋداگەرلەرىنىڭ جانە يمپورت ساۋداگەرلەرىنىڭ مۇددەسىنە دە اۋىر دارەجەدە زيان جەتكىزىپ، جۇڭگو مەن امەريكانىڭ توقىماشىلىق، كيىم - كەشەك ەكونوميكا - ساۋدا سەلبەستىگى قارىم - قاتىناسىن قاتەرلى جاعدايعا تۇسىرەدى ٴارى ەڭ سوڭىندا دۇنيە ٴجۇزىنىڭ توقىماشىلىق، كيىم - كەشەك قامداۋ تىزبەگى مەن كاسىپ سالاسى تىزبەگى جاقتارىن زياندايدى، مىنە بۇل ادامدىق ۇقىققا ناعىز سۇعاناقتىق جاساۋ بولىپ تابىلادى.

جۇڭگو توقىماشىلىق ونىمدەرى يمپورت - ەكسپورت ساۋدا قوعامى جۇڭگونىڭ توقىماشىلىق، كيىم - كەشەك كاسىپتەرىنىڭ حالىقارالىق سەلبەستىك سەرىكتەرىن، قۇرىلىمدارىن جانە كاسىپورىندارىن شينجياڭعا كەلىپ ارالاپ، كورىپ، شينجياڭنىڭ شىنايى جاعدايىن ۇعىسۋىن قاي - قاشان دا قارسى الادى، سونداي - اق ٴار ەل كاسىپورىندارىنىڭ شينجياڭدا ساۋدالىق قارجى قوسۋىنا بەلسەنە قولداۋ كورسەتۋىن قالايدى.

مالىمدەمەدە مىنالار ٴبىلدىرىلدى: ساۋدا قوعامى جۇڭگو - امەريكا ەكى ەل كاسىپ سالاسىنىڭ ورتاق مۇددەسىن شىعار ٴتۇيىن ەتىپ، امەريكانىڭ قاتىستى كاسىپتىك ۇيىمدارىمەن جانە كاسىپ سالاسىمەن بايلانىستى، اۋىس - كۇيىستى كۇشەيتىپ، جۇڭگو - امەريكا توقىماشىلىق، كيىم - كەشەك سالاسىنىڭ ەكونوميكا - ساۋدا قارىم - قاتىناسىنىڭ ورنىقتىلىعىن كۇش سالا قورعاۋدى قالايدى. سونىمەن بىرگە، امەريكانى قامتىعان بۇكىل الەمدىك توقىماشىلىق، كيىم - كەشەك كاسىپورىندارى مەن تۇتىنۋشىلاردىڭ امەريكا جاقتىڭ ۇزاق ۋاقىتتان بەرى «ادامدىق ۇقىقتى» جەلەۋ ەتىپ، جۇڭگونىڭ وبرازىنا كۇيە جاعىپ، جۇڭگونىڭ دامۋىن شاۋجايلاۋ قاسكۇنەمدىگىن جىعا تانىپ، فاكت پەن شىندىقتى نەگىزگە الا وتىرىپ ٴوز الدىنا دەربەس تۇجىرىم جاساۋىن ٴۇمىت ەتەدى.

مالىمدەمەدە تاعى مىنالار ٴبىلدىرىلدى: ساۋدا قوعامى جۇڭگو ۇكىمەتىنىڭ امەريكا جاقتىڭ قيسىنسىز ارەكەتى جونىندە قاجەتتى شارا قولدانىپ، پارمەندى قارسى شارا قولدانىپ، جۇڭگو كاسىپورىندارىنىڭ زاڭدى ۇقىق - مۇددەسىن قورعاۋىن باتىل قولدايدى.