چىن جۋ شينجياڭعا كەلىپ ”قىزىل كرەستتىڭ مەيىرىن بارشا وتباسىنا جەتكىزۋ“ قيمىلىن ورىستەتتى

　　جۇڭگوشا ەرەكشەلىككە يە قىزىل كرەست ىستەرىنىڭ جوعارى ساپالى دامۋىن ىلگەرىلەتۋ كەرەك

انار بۇلت / شينجياڭ گازەتىنىڭ ءتىلشىسى لياڭ ليحۋا 1 - ايدىڭ 7 - كۇنى قاشقاردان حابارلايدى. 1 - ايدىڭ 4 - كۇنىنەن 7 - كۇنىنە دەيىن مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىعى، جۇڭگو قىزىل كرەست قوعامىنىڭ باستىعى چىن جۋ شينجياڭعا كەلىپ ”قىزىل كرەستتىڭ مەيىرىن بارشا وتباسىنا جەتكىزۋ“ قيمىلىن ورىستەتتى، قيىنشىلىعى بار بۇقارا، كەدەيلىكتەن ارىلعان وتباسىلارى، ساقا اسكەري تىڭ يگەرۋشىلەر، دەنە مۇشەسىن تارتۋ ەتكەندەردىڭ ۇي ىشىندەگىلەر، قان جاساۋشى تەك كلەتكا تارتۋ ەتۋشى ەرىكتىلەر جانە تۋما جۇرەك ناۋقاسى بويىنشا قۇتقارۋ - ەمدەۋ، ساۋىقتىرۋ جۇرگىزىلگەن بالالار قاتارلىلاردان احۋال ۇعىسىپ، حال سۇرادى ءارى قىزىل كرەست قىزمەتىنە ىشكەرىلەي تەكسەرۋ - زەرتتەۋ جۇرگىزدى.

جۇڭگو قىزىل كرەست قوعامى پارتيا باسشىلىق گرۋپپاسىنىڭ شۋجيى، ۇنەمىلىك ىستەرگە جاۋاپتى ورىنباسار باستىعى ۋاڭ كى حال سۇراۋدا جانە تەكسەرۋ - زەرتتەۋدە بىرگە بولدى، اۆتونوميالى رايوننىڭ جانە بيڭتۋاننىڭ باسشىلارىنان لي يفي، لي نيڭپيڭ، ليۋ سۋشى، لۋ شۇيپيڭ قاتارلىلار قاتىستى حال سۇراۋعا نەمەسە تەكسەرۋ - زەرتتەۋگە قاتىناستى.

وسى رەتكى قيمىلدا شينجياڭعا جالپى قۇنى 18 ميلليون 525 مىڭ 900 يۋاندىق قىزىل كرەست مەيىرىمدىلىك مەكەن نىسانىن، مەيىرىمدىلىك شيپاحانا (پۋنكت) نىسانىن، مەيىرىمدىلىك مەكتەپ ەمحاناسى نىسانىن، بالالار سالماقتى اۋرۋىن سارالاپ تەكسەرۋ جانە قۇتقارۋ - كومەكتەسۋ نىسانىن، سونداي - اق حال سۇراۋ زاتتىق ماتەريالدارىن الا كەلدى.

چىن جۋ مەن ساپارلاستارى ىلگەرىندى - كەيىندى ءۇرىمجى قالاسىنداعى، قاشقار ايماعىنداعى جانە بيڭتۋان 6 - شىداعى، 3 - شىداعى حال سۇراۋ وبيەكتىلەرىنىڭ ۇيىنە كەلىپ، جۇڭگو قىزىل كرەست قوعامى اتىنان ءاربىر ۇيگە تۇرمىستىق زاتتىق ماتەريالدار سالىنعان وتباسىلىق جاشىك ۇسىندى. چىن جۋ ولاردىڭ وتباسى تۇرمىس احۋالىن تاپتەشتەي سۇراپ، ءىس جۇزىندىك قيىنشىلىقتارىن ۇعىستى. ول بىلاي دەپ باسا دارىپتەدى: ”ادامگەرشىلىك، مەيىرىمدىلىك، ۇلەس قوسۋ“ سىندى قىزىل كرەست رۋحىن ۇزدىكسىز اسقاقتاتىپ، قيىنشىلىعى بار قاۋىمعا باعىتتاي وتىرىپ ادامگەرشىلىك كومەك ورىستەتۋ كەرەك. جۇمىستانۋ شەبەرلىگىن ۇزدىكسىز ارتتىرىپ، ورنىقتى جۇمىستانۋ قابىلەتىن جوعارىلاتىپ، كەدەيلىكتەن ارىلعاننان كەيىن قايتالاي كەدەيلەسپەۋگە شىنايى كەپىلدىك ەتىپ، اۋىل - قىستاقتى گۇلدەندىرۋدىڭ ”سەركەسى“ بولۋعا ۇمتىلۋ كەرەك. بيڭتۋان رۋحىن بار كۇشپەن جالعاستىرىپ جانە اسقاقتاتىپ، بيڭتۋان رۋحىن جاڭا داۋىردەگى جۇڭگوشا سوتسياليستىك شينجياڭ قۇرۋدىڭ قۋاتتى كۇشىنە اينالدىرۋ كەرەك. جۇڭحۋا ۇلتى ورتاق تۇلعا تانىمىن بەرىك ورناتۋدى نەگىزگى جەلى ەتىپ، ۇلتتاردىڭ ۇلى ىنتىماعىن ۇزدىكسىز بەكەمدەۋ كەرەك. سۇيەكتى، دەنە مۇشەسىن جانە قان جاساۋشى تەك كلەتكانى تارتۋ ەتۋ جونىندەگى بىلىمدەردى ويداعىداي ۇگىتتەپ، اناعۇرلىم كوپ ادامنىڭ تارتۋ ەتۋ ەرىكتىلەرى قوسىنىنا قوسىلۋىنا مۇمكىندىك جاساۋ كەرەك.

قيمىل كەزىندە چىن جۋ مەن ساپارلاستارى تاعى ءۇرىمجى قالالىق 1 - حالىق شيپاحاناسى، ءۇرىمجى قالالىق دوستىق شيپاحاناسى، شينجياڭ مەديتسينا داشۋەسى، اقتاۋ اۋدانىنداعى كۇنلۇن جيايۋان الەۋمەتتىك اۋماعى سياقتى جەرلەرگە بارىپ، قىزىل كرەست قىزمەتى جونىندە ىشكەرىلەي تەكسەرۋ - زەرتتەۋ جۇرگىزدى. چىن جۋ بىلاي دەپ اتاپ كورسەتتى: قىزىل كرەست قىزمەتىندە شي جينپيڭ جاڭا ءداۋىر جۇڭگوشا سوتسياليزم يدەياسىن ىشكەرىلەي دايەكتىلەندىرىپ، پارتيانىڭ باسشىلىعىنا تاباندى بولىپ، دۇرىس بەتالىستان جازباي، ادامگەرشىلىك كۇشىن ۇيىستىرىپ، ءومىر مەن سالاماتتىقتى قورعاۋ كەرەك. قىزىل كرەست قوعامىنىڭ پارتيا مەن ۇكىمەتتىڭ ادامگەرشىلىك ىستەرى سالاسىنداعى قولعاناتى جانە بۇقارامەن بايلانىس ورناتۋداعى كوپىرى رەتىندەگى دانەكەرلىك رولىن تولىق ساۋلەلەندىرىپ، ادامگەرشىلىك ىستەرى بويىنشا قىزمەت وتەۋ قابىلەتى دەڭگەيىن كۇش سالا جوعارىلاتىپ، جۇڭگوشا ەرەكشەلىككە يە قىزىل كرەست ىستەرىنىڭ جوعارى ساپالى دامۋىن ىلگەرىلەتۋ كەرەك.