شينحۋا اگەنتتىگىنىڭ 5 - ايدىڭ 8 - كۇنى شياڭگاڭنان بەرگەن حابارى (ءتىلشى ليۋ ميڭياڭ). ”كانديدات لي جياچاۋ مىرزا سايلاندى“! 5 - ايدىڭ 8 - كۇنى ساعات 12دەن 20 مينۋت وتكەن مولشەردە شياڭگاڭ ءماجىلىس - كورمە ورتالىعىندا شياڭگاڭ ەرەكشە اكىمشىلىك رايونىنىڭ 6 - رەتكى اكىم سايلاۋىندا سايلاۋ مەڭگەرۋشىسى وسىلاي دەپ سالتاناتپەن جاريالادى.

ءسوز اياقتالا سالىسىمەن، مايداندا قىزۋ شاپالاق ءۇنى كوتەرىلدى. بۇل شاپالاق ءۇنى شياڭگاڭنىڭ جاڭا سايلاۋ تۇزىمىندە تۇڭعىش كەزەكتى 3 مايدان ماڭىزدى سايلاۋدى ءساتتى تامامداۋداعى سىرگە جيار ەڭبەككە جاسالعان قۇتتىقتاۋ، ونان دا ماڭىزدىسى، شياڭگاڭنىڭ ابزال ساياسات ارقىلى تاماشا باسقارۋعا قاراي تاعى شەشۋشى ءبىر قادام تاستاعاندىعىنا جاۋدىرعان ماداق.

سول كۇنى وتكىزىلگەن شياڭگاڭ ەرەكشە اكىمشىلىك رايونىنىڭ 6 - رەتكى اكىمىن سايلاۋ بارىسىندا لي جياچاۋ جوعارى داۋىسپەن 6 - رەتكى اكىم كانديداتى بولىپ سايلاندى. بۇل شياڭگاڭنىڭ سايلاۋ ءتۇزىمىن كەمەلدەندىرگەننەن كەيىنگى تۇڭعىش رەتكى اكىم سايلاۋى، شياڭگاڭ ەرەكشەلىگىندەگى دەموكراتيانىڭ تاعى ءبىر رەتكى ماڭىزدى تابىستى امالياتى.

”شياڭگاڭنىڭ بولاشاعىنا جاۋاپتى بولۋ تۇرعىسىنان ءبىر بەلەت تاستاڭىز“! سول كۇنى تۇستەن بۇرىن ساعات 9دان ساعات 11دەن 30 مينۋت وتكەنگە دەيىن، شياڭگاڭ ەرەكشە اكىمشىلىك رايونى سايلاۋ كوميتەتىنىڭ مۇشەلەرى ءماجىلىس - كورمە ورتالىعىنا ىركەس - تىركەس كەلىپ، ءبىر ادام ءبىر بەلەت تاسىلىمەن كانديدات لي جياچاۋعا جاسىرىن داۋىس بەردى.

شياڭگاڭ ءتۇبىرلى زاڭىنىڭ 1 - قوسىمشاسىندا اكىمدى كەڭ كولەمدە ۋاكىلدىك سيپاتقا يە، شياڭگاڭ ەرەكشە اكىمشىلىك رايونىنىڭ ءىس جۇزىندىك جاعدايىنا ۇيلەسەتىن، قوعامنىڭ تۇتاس تۇلعالىق مۇددەسىن ايگىلەيتىن سايلاۋ كوميتەتى سايلاپ شىعادى، ورتالىق حالىق ۇكىمەتى تاعايىندايدى دەپ بەلگىلەنگەن. جاڭا سايلاۋ ءتۇزىمى بويىنشا سايلاۋ كوميتەتىنىڭ زاڭدا بەلگىلەنگەن ادام سانى 1500 ادام، كانديدات، ءسوزسىز، 750دەن استام قولداۋ بەلەتىنە يە بولعاندا عانا سايلانا الادى.

ءماجىلىس - كورمە ورتالىعىنا ورنالاستىرىلعان ورتالىق بەلەت ساناۋ ورنى سالتاناتتى، قىزۋ بەينەگە شومدى، زالدىڭ الدىڭعى جاعىنىڭ ءدال ورتالىعىنا بەلەت ساناۋ جانە جاريالاۋ تەكشەسى ورناتىلدى. الىپ ارتقى كورىنىس تاقتاسىنداعى بەس جۇلدىزدى قىزىل تۋ جانە زىجيڭ گۇلدى ەرەكشە اكىمشىلىك رايون تۋى ايرىقشا كوز تارتادى.

بەلەت تاستاۋ اياقتاعاننان كەيىن، قىزمەتكەرلەر ءبىر - بىرلەپ ساناپ اداقتاپ، سايلاۋ بەلەتىن تۇراقتاندىردى. شياڭگاڭ ەرەكشە اكىمشىلىك رايونىنىڭ سايلاۋدى باسقارۋ كوميتەتىنىڭ، سايلاۋ كوميتەتىنىڭ، كانديداتتاردىڭ جانە ولاردىڭ وكىلەتشىلەرىنىڭ، مەديالاردىڭ، الەۋمەتتىڭ باقىلاۋىندا سايلاۋ جانە بەلەت ساناۋ قىزمەتى قاربالاس تا ءتارتىپتى جۇرگىزىلدى. ساناۋ ناتيجەسى لي جياچاۋدىڭ 1416 قولداۋ داۋىسىنا يە بولعاندىعىن كورسەتتى.

قازىر 64 جاستاعى لي جياچاۋ بيىل 4 - ايدا ەرەكشە اكىمشىلىك رايونى ۇكىمەتىنىڭ اكىمشىلىك ىستەر مەكەمەسىنىڭ باستىعى مىندەتىنەن بوساپ، سايلاۋعا قاتىناسۋعا تىزىمدەلدى. سايلاۋ ناتيجەسى جاريالانعاننان كەيىن، لي جياچاۋ ورتالىق بەلەت ساناۋ ورنىنىڭ جاريالاۋ تەكشەسىندە تۇرىپ، سول مايدانداعى سايلاۋ كوميتەتىنىڭ مۇشەلەرىنە جانە شياڭگاڭ قالا تۇرعىندارىنىڭ ۋاكىلدەرىنە ءيىلىپ العىس ءبىلدىردى.

ول سول مايداندا سايلانۋ اسەرىن سويلەپ، وسىندا كەلىپ بەلەت تاستاعان سايلاۋ كوميتەتىنىڭ ءاربىر مۇشەسىنە، سونداي - اق تەلەۆيزور الدىنداعى شياڭگاڭ قالا تۇرعىندارىنا شىن جۇرەكتەن العىس ايتتى، كوپشىلىكتىڭ قولداۋ كورسەتكەندىگىنە جانە دەم بەرگەندىگىنە العىس ايتتى.

لي جياچاۋ سايلاۋ باسەكەسى ساياسي باعدارلاماسىندا بىلاي دەپ باسا دارىپتەدى: ”ۇكىمەتتىڭ باسقارۋ قابىلەتىن كۇشەيتىپ، ءبىر نيەتپەن ىنتىماقتاسىپ، حالىقتىڭ قيىنشىلىعىن شەشەمىن“. ول الداعى بيلىك جۇرگىزۋدە ناتيجەنى نىسانا ەتىپ، قالا تۇرعىندارىنا ءىس تىندىراتىن، ىستەن ناتيجە شىعاراتىن ۇكىمەت سيلاپ، شياڭگاڭنىڭ باسەكەلىك قۋاتىن جاپپاي جوعارىلاتىپ، شياڭگاڭنىڭ دامۋىنىڭ ورنىقتى ىرگە تاسىن قالايتىندىعىن العا قويدى.

سايلاۋ كوميتەتىنىڭ مۇشەسى دىڭ في سايلاۋ ناتيجەسى جارىققا شىققاننان كەيىن تىلشىلەردى قابىلداعاندا مىنالاردى ءبىلدىردى: 2022 - جىلى شياڭگاڭ وتان قۇشاعىنا ورالعاندىعىنىڭ 25 جىلدىعىن قارسى الادى، بۇل الدىڭعىلاردىڭ ءىزىن باسىپ، بولاشاققا جول اشۋدا كەلەلى ءمان الادى. الداعى 5 جىلدا شياڭگاڭ بىلىقپالىقتان جونگە سالۋعا قاراي وتكەن تىنىش ورتانى بەكەمدەپ جانە ويداعىداي يگەرىپ، تەرەڭ قاتپارلى قايشىلىقتاردى شەشىپ، دامۋدىڭ تىڭ ساتىسىنا كوتەرىلۋدى شۇعىل قاجەت ەتەدى. ”سايلاۋ كوميتەتىنىڭ مۇشەلەرى جاڭا كەزەكتى ەرەكشە اكىمشىلىك رايون ۇكىمەتىنىڭ باسقارۋ - جونگە سالۋ ۇجىمىنان قوعامداعى ءار سالانى ىنتىماقتاستىرىپ، ورايدى يگەرىپ، ’وتانشىلدار شياڭگاڭدى باسقارۋ‘ جاعدايىندا باسقارۋدان گۇلدەنۋگە قادام تاستاعان جاڭا پاراقتى اشۋدى كۇتەدى“.

شياڭگاڭ ەرەكشە اكىمشىلىك رايونىنىڭ 6 - رەتكى اكىمىنىڭ مىندەت وتەۋ مەرزىمى 2022 - جىلى 7 - ايدىڭ 1 - كۇنىنەن 2027 - جىلى 6 - ايدىڭ 30 - كۇنىنە دەيىن بولادى.