شينحۋا اگەنتتىگى ”جۇڭ حۋالۇننىڭ“ ماقالاسىن تاراتتى

«زىجيڭ گۇلى ماڭگى قۇلپىرادى»

شينحۋا اگەنتتىگىنىڭ 6 - ايدىڭ 26 - كۇنى بەيجيڭنەن بەرگەن حابارى. 6 - ايدىڭ 26 - كۇنى شينحۋا اگەنتتىگى ”جۇڭ حۋالۇننىڭ“ ماقالاسىن تاراتتى، تاقىرىبى: «زىجيڭ گۇلى ماڭگى قۇلپىرادى».

ماقالادا بىلاي دەلىندى: ۋاقىتتىڭ الىپ قالامى ءاردايىم وراسان زور وزگەرىس ۇستىندە كەرەمەتتەر كەستەلەيدى.

تاريح تولعانىسى ەكىنىڭ بىرىندە تەرەڭ سۇيىسپەنشىلىكپەن قايىرىلا قاراۋ كەزىندە ونان سايىن ايقىن اڭعارىلادى.

2022 - جىلى 6 - ايدىڭ 25 - كۇنى استانا بەيجيڭ مىناداي حابار جاريالادى: جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شياڭگاڭنىڭ وتان قۇشاعىنا ورالعاندىعىنىڭ 25 جىلدىعىن قۇتتىقتاۋ جينالىسىنا جانە شياڭگاڭ ەرەكشە اكىمشىلىك رايونى 6 - كەزەكتى ۇكىمەتىنىڭ مىندەتكە وتىرۋ سالتىنا قاتىناسادى.

شياڭگاڭ وتان قۇشاعىنا ورالعاندىعىنىڭ 25 جىلدىق مەرەيتويىنىڭ قۋانىشىنا شومعان شياڭگاڭداعى 7 ميلليوننان استام باۋىرلاستىڭ جىگەرى تاسقىنداپ، كوڭىلى كولدەي تولقىدى.

25 جىلعى كوكتەم مەن كۇز كۋا، بەس جۇلدىزدى قىزىل تۋ مەن زىجيڭ گۇلدى رايون تۋى شياڭجياڭ جاعالاۋىندا اسقاق جەلبىرەدى. 25 جىلدىق ۋاقىت كوشىندە ورتالىق ۇكىمەت ۇسىنعان التىن زىجيڭ گۇل ءمۇسىنى بايسالدى، بەرەكەلى تىنىشتىققا مۇلگىپ، جارقىراپ نۇر شاشۋدا.

ماقالادا مىنالار اتاپ كورسەتىلدى: سەرگەلدەڭ كۇندەر، شىنىندا، تىم ۇزاققا سوزىلدى. قايتا ورالعان جاھانگەز وڭىرىنە جۇققان شاڭدى قاعىپ - سىلكىپ، تۇلا بويىن كەرنەگەن ادالدىقپەن انا كوكىرەگىنە ماڭداي تىرەدى. 25 جىلدان بەرى، ”ءبىر ەل، ەكى ءتۇزىمنىڭ“ شياڭگاڭداعى امالياتى كۇللى دۇنيە مويىنداعان تابىسقا قول جەتكىزدى. شياڭگاڭ وتاننىڭ ۇلى شاڭىراعىندا اعا - ءىنى، اپەكە - سىڭلىلەرىمەن بىرگە كۇرەس جۇرگىزىپ، دامىپ، وتاننىڭ گۇلدەنگەن، بايىعان، قۇدىرەتتەنگەن ۇلى داڭقىنان بىرگە يگىلىكتەندى. بولاشاقتىڭ جارقىن كورىنىسىنە قۇشاق اشىپ، جۇڭگو ارمانىنىڭ ۇندەۋىندە جاڭا داۋىردەگى شياڭجياڭ كەرەمەتى ونان ارى ايدىندانىپ، ايباتتانا تۇسپەك.

ماقالادا مىنالار اتاپ كورسەتىلدى: 20 - عاسىردىڭ 80 - جىلدارىنىڭ باسىندا دىڭ شياۋپيڭ جولداس ”ءبىر ەل، ەكى ءتۇزىم“ عىلمي يدەياسىن جاسامپازدىقپەن العا قويدى. ”ءبىر ەل، ەكى ءتۇزىم“ جۇڭگونىڭ ۇلى جاڭالىعى رەتىندە، حالىقارالىق قوعامنىڭ وسى تەكتەس ماسەلەلەردى شەشۋىنە جاڭا وي جەلىسىن، جاڭا جوبا ۇسىندى. شىندىق ”ءبىر ەل، ەكى ءتۇزىمنىڭ“ تاريحتان قالعان شياڭگاڭ ماسەلەسىن شەشۋدىڭ ەڭ تاماشا جوباسى ەكەندىگىن، سونداي - اق شياڭگاڭنىڭ وتان قۇشاعىنا ورالعان سوڭ ۇزاق ۋاقىت گۇلدەنۋىن، ورنىقتىلىعىن ساقتايتىن ەڭ جاقسى ءتۇزىم ەكەندىگىن، ونىڭ اتقارىلاتىندىعىن، ورىندالاتىندىعىن، حالىق قالاۋىنا يە بولاتىندىعىن دالەلدەدى.

ماقالادا مىنالار اتاپ كورسەتىلدى: پارتيا 18 - قۇرىلتايىنان بەرى، باس شۋجي شي جينپيڭ مەن پارتيا ورتالىق كوميتەتى ستراتەگيالىق جانە جالپى جاعداي تۇرعىسىن نەگىزگە الىپ، ”ءبىر ەل، ەكى ءتۇزىم“، شياڭگاڭ قىزمەتى جونىندە ءبىرسىپىرا ماڭىزدى بايىمداۋلار جانە كەلەلى شەشىم - ورنالاستىرۋلار جاساپ، ”ءبىر ەل، ەكى ءتۇزىم“ ىستەرىنىڭ جاڭا تاجىريبەگە قول جەتكىزۋىن، جاڭا دامۋدى جۇزەگە اسىرۋىن ىلگەرىلەتتى.

ماقالادا بىلاي دەلىندى: بۇل ساپاردا بوران - شاشىن مەن كەدەرگى كەس - كەستەگەنىمەن، وتان قاشاندا شياڭگاڭنىڭ داۋىلدى تولقىنعا توتەپ بەرىپ، سىن - سايىستى ەڭسەرۋىنىڭ پارمەندى ارتقى تىرەگى، شياڭگاڭنىڭ گۇلدەنۋ مەن ورنىقتىلىقتى ساقتاۋىنىڭ ەڭ مىعىم سەنىمى بولىپ كەلەدى.

ماقالادا مىنالار اتاپ كورسەتىلدى: ەتباۋىر جاقىندىق، تاعدىرلاستىق. مەيلى بۇرىن، قازىر نەمەسە بولاشاقتا بولسىن، مىنا ءبىر قاراپايىم اقيقات ەشقاشان تۇعىرىنان تايمايدى: شياڭگاڭ جاقسى بولسا، مەملەكەت جاقسى بولادى؛ مەملەكەت جاقسى بولسا، شياڭگاڭ ءتىپتى دە جاقسى بولادى!

ماقالادا مىنالار اتاپ كورسەتىلدى: شياڭجياڭ ايدىنىندا سان كەمە جارىسا جەلكەن كوتەرىپ، كۇش بىرىكتىرىپ، تىلەك توعىستىرىپ ساپارعا قايتا اتتاندى. وتكەنگە قايىرىلا قاراساق، عاسىردىڭ بوران - شاشىنىنا ءجۇزىن جۋىپ، 100 جىلدىق وراسان زور وزگەرىستى باستان كەشكەن ”شىعىس مەرۋەرتى“ نانحاي تەڭىزىنىڭ جاعاسىندا وزگەشە شۇعىلا شاشتى. بولاشاققا كوز جىبەرسەك، شياڭگاڭداعى 7 ميلليوننان استام قالا تۇرعىنى رۋحتارىن سەرپىلتىپ، شىزى تاۋىنىڭ ەتەگىندە دامۋدىڭ جاڭا حيكاياسىن، گۇلدەنۋدىڭ تىڭ كەرەمەتىن جازۋدى جالعاستىرۋدا. ”ءبىر ەل، ەكى ءتۇزىمنىڭ“ شياڭگاڭداعى امالياتى، ءسوزسىز، اناعۇرلىم زور تابىستارعا قول جەتكىزىپ، وتاننىڭ بۇكىلدەي بىرلىككە كەلۋىن جۇزەگە اسىرۋ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ءۇشىن قاجىماي - تالماي كۇرەس جۇرگىزۋگە قالىڭ جۇڭحۋا پەرزەنتتەرىن شابىتتاندىرادى جانە ىنتىماقتاستىرادى.

شياڭجياڭ سۋى توقتاۋسىز وركەشتەنە جوڭكىلىپ، زىجيڭ گۇلى ماڭگى قۇلپىرادى. اناعۇرلىم جارقىن كەلەشەككە قادام تاستاعان شياڭگاڭعا باقىت تىلەيمىز، وتانعا باقىت تىلەيمىز!