شينحۋا اگەنتتىگىنىڭ 11 - ايدىڭ 4 - كۇنى بەيجيڭنەن بەرگەن حابارى (تىلشىلەر حۋ جى، ۋاڭ لينلين). مەملەكەتتىك كەڭەستىڭ اقپارات كەڭسەسى 11 - ايدىڭ 4 - كۇنى «جاڭا داۋىردەگى جۇڭگو بەيدوۋى» اق تىستى كىتابىن جاريالاپ، جاڭا داۋىردەگى جۇڭگو بەيدوۋىنىڭ دامۋ تابىستارى مەن بولاشاق جوسپارىن تانىستىرىپ، جۇڭگو بەيدوۋىنىڭ دامۋ ۇستانىمىمەن جانە امالياتتىق تاجىريبەلەرىمەن ورتاقتاستى.

اق تىستى كىتاپ مولشەرمەن 12 مىڭ ٴارىپ، العى ٴسوزى مەن سوڭعى سوزىنەن باسقا جيىنى 6 بولىكتى قامتيدى، جەكە - جەكە: بەيدوۋدىڭ دامۋى جاڭا داۋىرگە ٴوتتى، دۇنيە جۇزىندە بىرەگەي جۇڭگو بەيدوۋى، جۇيەنىڭ اينالىم، باسقارۋ ورەسىن جوعارىلاتۋ، قولدانىلمالى كاسىپ سالاسىنىڭ باياندى دامۋىن ىلگەرىلەتۋ، وسىزاماندانعان باسقارۋ ورەسىن جوعارىلاتۋ، ادامزاتتىڭ تاعدىرلاس ورتاق تۇلعاسىن قۇرۋعا دەم بەرۋ.

اق تىستى كىتاپتا مىنالار اتاپ كورسەتىلدى: بەيدوۋ جاساندى سەرىك جول نۇسقاۋ جۇيەسى − جۇڭگونىڭ مەملەكەت حاۋىپسىزدىگى مەن ەكونوميكالىق، قوعامدىق دامۋدىڭ قاجەتىن كوزدە ۇستاپ، ٴوز كۇشىنە سۇيەنىپ قۇرعان، دەربەس جۇمىس جۇرگىزەتىن جاساندى سەرىك جول نۇسقاۋ جۇيەسى. تالاي جىل دامىتۋ ارقىلى بەيدوۋ جۇيەسى دۇنيە ٴجۇزى قولدانۋشىلارىنا باعىتتالعان بارلىق جاعدايدا بىردەي بولۋ، بارلىق ۋاقىتتا بىردەي بولۋ، جوعارى دالدىكتە ورىن تۇراقتاندىرۋ، جول نۇسقاۋ جانە ۋاقىت قىزمەتى بويىنشا قىزمەت وتەۋ ازىرلەيتىن ماڭىزدى جاڭا تيپتەگى نەگىزدىك قۇرىلعىعا اينالدى.

اق تىستى كىتاپتا مىنالار باسا دارىپتەلدى: پارتيا 18 - قۇرىلتايىنان بەرى، بەيدوۋ جۇيەسى جىلدام دامىعان جاڭا داۋىرگە ٴوتتى. 2020 - جىلى 7 - ايدىڭ 31 - كۇنى باس شۋجي شي جينپيڭنىڭ دۇنيە جۇزىنە بەيدوۋ 3 - ٴنومىرلى الەمدىك جاساندى سەرىك جول نۇسقاۋ جۇيەسىنىڭ رەسمي اشىلعاندىعىن جاريالاۋى بەيدوۋ جۇيەسىنىڭ جاھاندانعان دامۋدىڭ جاڭا كەزەڭىنە وتكەندىگىن اڭعارتادى. رەفورما جاساعان، ەسىك اشقان جاڭا مەزگىلدەن جۇڭگونىڭ دامۋى جاڭا داۋىرگە وتكەنگە دەيىن، بەيدوۋ 1 - نومىردەن بەيدوۋ 3 - نومىرگە دەيىن، قوس جاساندى سەرىك ارقىلى ورىن تۇراقتاندىرۋدان بۇكىل الەمدە تور قالىپتاستىرۋعا دەيىن، ازيا - تىنىق مۇحيتتى قامتۋدان بۇكىل الەمگە قىزمەت وتەۋگە دەيىن، بەيدوۋ جۇيەسى مەملەكەتتىڭ دامۋىمەن تەڭ جيىلىكتە گۇلدەنىپ، ۇلتتىڭ گۇلدەنۋىمەن ٴبىر باعىتتا بىرگە ىلگەرىلەدى.

اق تىستى كىتاپتا مىنالار اتاپ كورسەتىلدى: بولاشاققا بەت العاندا، جۇڭگو تەحنيكاسى اناعۇرلىم وزىق، يقۋاتى اناعۇرلىم قۋاتتى، قىزمەت وتەۋى اناعۇرلىم ساپالى بەيدوۋ جۇيەسىن قۇرىپ، اناعۇرلىم جالپىلاما، اناعۇرلىم توعىسقان، اناعۇرلىم زەردەلى كەشەندى ۋاقىت - كەڭىستىك جۇيەسىن ورناتىپ، جوعارى سەرپىمدىلىكتى، جوعارى زەردەلى، جوعارى دالدىكتى، جوعارى حاۋىپسىزدىكتى ورىن تۇراقتاندىرۋ، جول نۇسقاۋ، ۋاقىت قىزمەتى قىزمەت وتەۋىن ازىرلەپ، حالىق تۇرمىسىنىڭ قۇت - ىرىسىنا اناعۇرلىم ويداعىداي تيىمدىلىك جەتكىزىپ، ادامزاتتىڭ دامۋىنا، العا باسۋىنا قىزمەت ەتەدى.

اق تىستى كىتاپتا مىنالار باسا دارىپتەلدى: جۇڭگو بەيدوۋ جۇيەسى قۇرىلىسىنىڭ دامۋ جەتىستىكتەرىن ٴارقايسى ەلدەرمەن بىرگە ورتاقتاسىپ، دۇنيە ٴجۇزى جاساندى سەرىك جول نۇسقاۋ ىستەرىنىڭ قارىشتاپ دامۋىن بىرگە جەبەپ، اناعۇرلىم كەڭ جۇلدىزدار الەمىنە قول ۇستاسا بىرگە قادام تاستاپ، ادامزاتتىڭ تاعدىرلاس ورتاق تۇلعاسىن قۇرۋعا، اناعۇرلىم كوركەم دۇنيە ٴجۇزىن قۇرۋعا تىڭ دا اناعۇرلىم زور ۇلەس قوسۋدى قالايدى.